Mukanda wa Mbadi Gudi Enya gu Kolinto 9:1-15
9 Uvi henyaha mukunda nu mudimo wa gukuatesa athu a gijila, ishigo diago nu ndando egi ngumisonegele
2 handaga ngudi mujiya egi muakhala hehi ha gukuatesa athu ako. Ngana gumishimana gudi Aklisto a gu Maseduane. Ngaawambelele egi Aklisto a mu provense ya Akaya atshiginyile ha gukuatesa aphangi ako givo gia mudidi. Khadilo dienu dia gukuatesa athu ako nu mutshima umoshi, diatumile Aklisto ako avula a gu Maseduane ha gutshita gifua enue.
3 Uvi ngudi mutuma aphangi hagula gudisunzula tuadisunzuile mukunda nu enue, gukhadigo gua githuhu mu ndaga eyi. Ngenyi mukhale agudilonda gifua luholo ngayizuelele.
4 Nga ndo, gula ngaza nu enya gu Maseduane, ene amona egi mushigo agudilonda, mbatuvua musonyi luholo tuadisunzuile mukunda nu enue, enue nji mbamuvua musonyi.
5 Hene ngamonele egi ngudi naye guwambela aphangi hagula adiange guza gudi enue gutuama diami ha gudianga gulonda ima ya khenda imuatulayele. Ngenyi ima mudi mutshigina guhana nu mutshima umoshi ikhale hehi, uvi ikhadigo gifua ima mudi muhana gu ngolo.
6 Uvi jiyenu egi muthu udi mukuna mbuto jiazonda, mbawukatula mbuto jiazonda. Uvi muthu udi mukuna mbuto jiavula, mbawukatula nji mbuto jiavula.
7 Muthu nu muthu ahane gifua luholo mutshima wenji udi gumutuma ha gutshita, uvi ikhadigo ndaga ya gudisagesa nga ya gushinjigiwa gu ngolo, handaga Nzambi wana tshigina muthu wana hana nu gusuanguluga.
8 Luko, Nzambi wajiya gumivila khenda jiavula, hagula egi mukhale tangua diagasue nu ima mudi nayo funu, mukhale nji nu ima yavula ha gutagenesa midimo yagasue yabonga.
9 (Gifua luholo yasonegewe egi: “Wakhaphele athu ima yavula diago;* wahanele phutu ima. Mutshima wenji wabonga ushigo nu gisugishilo.”
10 Muthu wana hana mbuto jiavula gudi mukunyi nu wana hana mapha hagula athu adie, mbawumihana nu mbawumivudishila mbuto hagula mukune. Mbawuvudisa nji mbuto jia mutshima wenu wabonga.)
11 Nzambi wana gumikuatesa mu maluholo agasue, hagula enue nji muajiya gukhaphela athu ima mu maluholo agasue. Ngenyi athu avula mbaahana Nzambi mersi mukunda nu ima yenu mbatuahana.
12 Handaga mudimo owu mudi mukalagala ushigo phamba mukunda nu guhana athu a gijila ima adi nayo funu, uvi udi nji mukuatesa athu avula ha guhana Nzambi mersi.
13 Ima yenu mudi muhana mbayimonesa diago egi mudi athu ahana. Mbayituma nji athu ha gutumbuisa Nzambi handaga mudi mutumagela lukuma luabonga luatadila Klisto mudi mulongesa, handaga muana guahana ene nu muana hana nji athu agasue nu mutshima umoshi.
14 Tangua mbaabubila Nzambi mukunda nu enue, mbaamonesa egi ana gumizumba mukunda nu khenda jiavula jiana gumivila Nzambi.
15 Tudi muhana Nzambi mersi mukunda nu guhana guenji guakoma gua khenda.*
Mbimbi goshi'a diyiji
^ Nga “wahanele nu mutshima umoshi.”
^ Nga “guhana guenji guakoma gua khenda tuajiyilego gukotelesa.”
