Mukanda wa Mbadi wa Phetelo 1:1-21
1 Ame Simona Phetelo, muhiga nu mupostolo wa Yesu Klisto. Ngudi musonegela athu ahetele gutshigina gudi nu ndando gifua guetu, mu njila ya gubonga gua Nzambi wetu nu gua Muhuluishi Yesu Klisto:
2 Khenda jiavula jia Nzambi nu guhuima gudivudise mukatshi dienu mu njila ya ujiyi wa giamatshidia watadila Nzambi nu Fumu wetu Yesu,
3 handaga ngolo jienji jia unzambi jiatuhanele ima yagasue yana gutukuatesa ha gukhala nu monyo, ha gukhala yagujinginyina gudi Nzambi mu njila ya ujiyi wa giamatshidia wa muthu watutamegele mu lutumbu luenji nu mu makalegelo enji abonga.
4 Mu njila ya ndaga eji, muene watuhanele mafelela a ndando yavula, abalega gukoma hagula muajiya guheta khapho mu unzambi wenji. Muene wakalegele ngenyi handaga tualengele makalegelo abola a ha mavu awa ana katuga mu nzala jiabola.
5 Gishina giene, tshitenu ngolo hagula, holu dia gutshigina guenu mulunde makalegelo abonga, holu dia makalegelo enu abonga mulunde ujiyi,
6 holu dia ujiyi wenu mulunde gudikanda, holu dia gudikanda guenu mulunde gukolesela, holu dia gukolesela guenu mulunde gujinginyina gudi Nzambi,
7 holu dia gujinginyina guenu gudi Nzambi mulunde guzumba gua uphangi, holu dia guzumba guenu gua uphangi mulunde guzumba mukunda nu athu agasue.
8 Gula makalegelo awa adi mukatshi dienu nu adi mulandula gudivudisa, mbamuzola mbuto nu mbamukhadigo imonya mu ndaga yatadila ujiyi wa giamatshidia wa Fumu wetu Yesu Klisto.
9 Muthu wagasue udi gashigo nu makalegelo awa udi gifofo, udi mubatega meso enji gu muanya* nu udi mujimbila egi gubola guenji gua mualeha guatotesewe gale.
10 Hene aphangi, tshitenu yagasue ha gutshiginyisa gutamegewa guamitamegewe nu gutombewa guamitombewe. Gula muatshita ndaga eji, mbamubuigo nga hazonda.
11 Ngenyi, mbamuheta luendu luakoma, yakotelesa egi mbamuhanewa njila ya gungina mu Ufumu wa mayilago wa Fumu wetu Yesu Klisto, Muhuluishi wetu.
12 Gishina giene, ngudi gumiwunguluisa ndaga eji ngatshima muana gujijiya nu mudi ya gujinginyina muabonga mu giamatshidia gidi mukatshi dienu.
13 Uvi ngudi mumona egi idi nu ndando ha gumiwunguluisa ndaga eji, hangudi nu muila wuwu udi gifua inzo ya tenta.
14 Handaga ngudi mujiya egi gualeha ndo inzo yami ya tenta imukatudiwa gifua luholo Fumu wetu Yesu Klisto wanguwambelele.
15 Mbangutshita yagasue hagula mbamusale muwunguluga* ndaga eji jiagasue gula ngaya gami.
16 Idi yadiago egi tangua tuamiwambelele ndaga yatadila ngolo nu guza gua Fumu wetu Yesu Klisto, tualanduilego ishima ya mambo ya athu, uvi tuamiwambelele ndaga yatadila lutumbu luenji lunu tuamonele nu meso etu.
17 Handaga muene wahetele ginemua nu lutumbu gudi Tata Nzambi. Ndaga eyi* yamonegele tangua fumu wa lutumbu wazuelele mbimbi eji mukunda nu muene egi: “Yowu Mun’ami ngana zumba muavula, wana gungusuanguluisa.”
18 Ayi, tuavile mbimbi eji jiakatugile mu dilu tangua tuakhalele n’enji holu dia mulundu wa gijila.
19 Mbimbi jia baprofete jiabuile diago jia giamatshidia mukunda nu esue. Enue muana tshita muabonga luholo muana gujitegelela gifua luholo muenda wana lema fundo diabuita (uu nu tangua gisugu giana gutshia nu hana zoga themua ya gimenegena) mu mitshima yenu.
20 Mudi mujiya thomo egi gushigo nga profesi imoshi idi mu Mukanda wa Nzambi yakatugile mu matangi a muthu.
21 Handaga gushigo nu profesi imoshi yajile mu gutshigina gua muthu, uvi nyuma ya Nzambi yatumile athu ha guzuela ndaga jiakatugile gudi Nzambi.
Mbimbi goshi'a diyiji
^ Nga ndo yajiya gukhala egi, “gifofo, nga muthu gashigo mutema gumona.”
^ Nga “mbamusale muzuelela.”
^ Mu Greke: “dijui.”
