Mukanda wa Mbadi wa Phetelo 2:1-22
2 Luholo baprofete a mambo akhalele mukatshi dia athu, alongeshi a mambo mbaazoga nji mukatshi dienu. Mbaanginyisa ukhaphumunyi mukatshi dienu mu gisuegi, ukhaphumunyi wene mbawubolesa gutshigina guenu. Ene mbaatuna fumu wawo waasumbile; ngenyi, mbaadibatela gufua muphushi.
2 Athu avula mbaalandula ndaga jiawo jia musonyi,* ndaga eyi mbayituma athu ha gusegulula njila ya giamatshidia.
3 Mukunda nu nzala yawo ya guheta ima, mbaakamba gumihuiga nu mbimbi jia mambo, uvi ndola yawo a abambele sendese mualeha ishigo mushipha, gufua guawo gushigo gualeha.
4 Nzambi wahanele ndola gudi anjelo anyi atshitshile masumu, waambile mu Tartare,* waajitshigile malenge mu fundo* diabalega gubuita, waabambele guene mukunda nu usopheshi.
5 Wahanele mavu akulu ndola, uvi wahuluishile Nowa mulongeshi wa ndaga jiabonga nu athu ako sambadi tangua dianogesele muene mvula yakola ha mavu, ha gushiya athu akhalelego munemesa Nzambi.
6 Nzambi washiyile membo a Sodoma nu Gomola, waabuishile fuphi, waahanele ndola, wahanele gifezegeselo gia ndaga jidi muza mukunda nu athu anyi anago gunemesa Nzambi.
7 Wahuluishile Lota muthu wabonga, munu wakhalele gudisagesa muavula mukunda nu ndaga jia musonyi* jia athu anyi akhalele mushiya mikhuala,
8 handaga lusugu nu lusugu, muthu yowu wabonga wakhalele gudisagesa muavula mukunda nu ndaga jiabola jiakhalele mumona muene nu jiakhalele muvua muene hakhalele muene mukatshi diawo.
9 Yehowa wana jiya luholo lua guhuluisa athu adi a gujinginyina gudi muene tangua adi mutagana nu malamba. Uvi wana bamba athu abola mukunda nu guashiya mu lusugu lua gusophesa,
10 gifua athu anyi ana kamba gubolesa mila ya athu ako nu ana segulula mafumu.
Akhala enya lulendo, enya mito yakola nu ana vua ndo woma ha guzuela ndaga jiabola mukunda nu enya lutumbu,
11 ikhale anjelo adi nu ngolo jiavula gubalega alongeshi a mambo, uvi mukunda nu gunemesa* Yehowa, ana funda ndo alongeshi ene nu mbimbi jia mashingo.
12 Uvi athu wawa adi gifua shitu jishigo nu ndunge jinyi jiavualewe ha gukuatewa nu ha gushiyiwa, adi muzuela mbimbi jiabola gu ndaga ashigo mujiya. Ene mbaashiyiwa mukunda nu makalegelo awo abola,
13 malamba mbaatagana nawo adi lufuto lua ndaga jiabola akhalele mukalagala.
Ana mona egi gutagenesa nzala jiawo ikhale mu muanya gudi ndaga yabonga. Athu anyi ana suanguluga nu malongo awo a mambo, anyi muana tshita nawo mawano hamoshi adi gifua matona mu milele nu adi gifua phuta gu phala.
14 Meso awo adi a guzala pha nu uthambi, ene ajiyilego gubemba gukalagala gubola, ana tuma athu adi aleba mu nyuma ha gulumbuga, mitshima yawo idi ya guzala pha nu nzala jiabola, adi ana atewe mikumbu.
15 Abembele gale njila yabonga, awunganele gale, alanduile gale njila ya Balama mun’a Beole munu wazumbile lufuto luamuhanewe ha gukalagala ndaga jiabola,
16 uvi amubalele mukunda nu ndaga jiabola jiatshitshile muene. Shitu yana bata inemo yana zuela ndo uvi yazuelele nu dijui dia muthu ha gukanga profete njila hagula gatshitshigo ndaga yabola.
17 Ene adi ito ishigo nu meya, adi gimbundu-mbundu gidi muhungumuiwa gu muhehe wakola, a abambele gale fundo diawo mu phipha yabalega gubuita.
18 Ana zuela ndaga jiakoma jia gituhu, ana suanguluga nu nzala jia muila nu ana tshita ndaga jia musonyi,* ana lumbugisa athu anyi akatuga guzoga mukatshi dia athu ana tshita ndaga jiabola.
19 Ana laya ha gukatula athu mu uhiga, uvi ene hakhawo ana khala ahiga a ndaga jiabola; muthu wagasue wakhala muhiga wa muthu* munu udi nu ufumu holu dienji.
20 Gula alenga ndaga jiji jia usala jia ha mavu mu njila ya ujiyi wa giamatshidia wa Fumu wetu Yesu Klisto Muhuluishi wetu, uvi gungima ajivutugila luko nu ndaga jiene jiaabinga, mbaabua athu abola gubalega luholo akhalele thomo.
21 Yabendele gukhala ndaga yabonga mukunda nu ene gula nga ahetele ndo ujiyi wa giamatshidia wa njila yabonga, uvi ene ayijiyile, gungima atunyile mukhuala wa gijila unu watshiginyile ene.
22 Ndaga yaabuidile idi mutshiginyisa ndaga yana zuela gishima gia giamatshidia egi: “Imbua yavutuga luko mudia ima yalushi yene, ngulu yazuishiwe meya yavutuga luko mudibidinga mu ithotho.”
Mbimbi goshi'a diyiji
^ Mu Greke: aselgeya. Tala Ukoteleshi wa Mbimbi.
^ Tala Ukoteleshi wa Mbimbi.
^ Nga ndo yajiya gukotelesa egi “ambiwe mu mawina.”
^ Mu Greke: aselgeya. Tala Ukoteleshi wa Mbimbi.
^ Nga “gutuama.”
^ Mu Greke: aselgeya. Tala Ukoteleshi wa Mbimbi.
^ Nga “muhiga wa gima.”
