Mukanda wa Mbadi wa Phetelo 3:1-18
3 Aphangi ami ngana zumba, wuwu mukanda wa mbadi ngudi gumisonegela gifua luholo ngamisonegele wa thomo, ngudi nji gumitoga ha gukalegela ndunge jienu jia gutangigiza ha gumiwunguluisa
2 egi mudi naye guwunguluga ndaga jiazuelele* baprofete a gijila sendese mualeha, nu mukhuala wa Fumu Muhuluishi wetu unu wamilongesele apostolo enu.
3 Mudi naye thomo gujiya egi mu masugu a gisugishilo enya gulela mbaakhala gumilela. Mbaakhala mukalagala ndaga ha gulandula nzala jiawo.
4 Mbaazuela egi: “Muene walayele egi mbawuza, udi giwa gui? Akhakh’etu ahuile gale nu gufua, uvi ima yagasue idi luholo lumoshi gifua luholo yakhalele sendese gu gisendeselo hafugiwe ima.”
5 Ene adi mujimbila nu mutshima umoshi egi sendese mualeha dilu diakhalele, mu njila ya mbimbi ya Nzambi mavu adikhaphumuine nu meya, nu akhalele hakatshi dia meya.
6 Mu njila ya ima eyi, mavu a mu tangua dinyinyi ashiyiwe tangua diazalele ene nu meya.
7 Mu njila ya mbimbi yene imoshi, dilu nu mavu a mangino abambewe mukunda nu gushiyiwa nu tshuya. Adi mubambewa uu nu mu lusugu lua gusophesa nu lua gushiya athu ashigo munemesa Nzambi.
8 Hene, aphangi ami ngana zumba, mujimbilago ndaga eyi, gutuama dia Yehowa lusugu lumoshi ludi gifua ivo 1 000, ivo 1 000 idi gifua lusugu lumoshi.
9 Yehowa gashigo mushipha mu ndaga yatadila laji dienji gifua luholo athu ako ana mona egi washipha. Uvi muene udi nu guhuiminyina mukunda nu enue, handaga gana tshiginago egi nga muthu mumoshi afue, uvi wana tshigina egi athu agasue abalumune mutshima.
10 Uvi lusugu lua Yehowa mbaluza gifua nzangi, mu lusugu luene, dilu mbadibalega nu matululu akola, ima idi mu dilu nu ha mavu mbayikuata tshuya tuakola nu mbayishiginyina, mavu nu midimo yenji mbayimonega haphelo.
11 Luholo ima yagasue idi naye gushiginyiga ngegi, tangizenu ha gujiya gula mudi naye gukhala athu a luholo lutshi mu ndaga yatadila makalegelo a gijila nu midimo idi mumonesa egi mudi ya gujinginyina gudi Nzambi,
12 hamudi munengenena nu mudi mutangiza* tangua diagasue lusugu lua Yehowa, lunu dilu mbadishiyiwa gu tshuya, ima yagasue mbayizoza mukunda nu tshuya tuakola!
13 Uvi tudi munengena dilu dihe-dihe nu mavu ahe-ahe gifua muatendelele muene, fundo ndaga mbajikalegewa mu luholo luabonga.
14 Aphangi ami ngana zumba, luholo mudi munengena ndaga eji, tshitenu yagasue hagula gu gisugishilo muene mbagamisangigo nu ditona nga nu ndaga imoshi yabola, uvi mbaamisange mu guhuima.
15 Khalenu mutadila guhuiminyina gua Fumu wetu gifua luendu lua guhuluishiwa, gifua luholo luamisonegela phangi’etu wa guzumba Phaula ha gutadila ndunge jiamuhanewe.
16 Udi muzuelela ndaga eji muavula mu mikanda yenji yagasue. Uvi ndaga jiko mukatshi dia ndaga jiene jidi diago jiakola ha gukotelesa, athu anyi ashigo mujiya nga gima nu adi nu gutshigina gualeba ana gujihengelesa gifua luholo ana hengelesa ndaga jiko jidi mu Mukanda wa Nzambi. Gutshita ngenyi mbaguabata mu gufua.
17 Aphangi ami ngana zumba muavula, luholo mudi mujiya ndaga eji gutuama, temenu hagula athu anyi ana shiya mikhuala amiwunganesago nu hagula mutotesago ngolo jienu.
18 Uvi landulenu gukula mu khenda jiavula jia Nzambi nu mu ujiyi wa Fumu wetu Yesu Klisto, Muhuluishi wetu. Muene atumbuishiwe sendese mangino uu ivo nu ivo. Amen.
Mbimbi goshi'a diyiji
^ Nga “ndaga jiadiangele guzuelewa.”
^ Nga “mudi munengena nu nzala yagasue.” Mu Greke: “phushi-phushi.”
