Mukanda wa Mbadi wa Samuele 1:1-27
1 Gungima dia gufua gua Saula, Davidi wakatugile guma ayile mushiya* enya Amaleke. Wavutugile gu Sikelage, watshitshile masugu mbadi.
2 Mu lusugu lua thathu, muthu mumoshi wakatugile gu phundo ya Saula, wakhalele nu milele ya gutawuga nu fuphi mu muto. Hahetele muene gudi Davidi, wafugamele, washiwugile phala yenji mu mavu.
3 Davidi wamuhudile egi: “Wakatuga gui?” Muene wamuvutudile egi: “Ngalengi mu phundo ya enya Isalele.”
4 Davidi wamuhudile egi: “Ngabuba nguwambele, ndaga jiabalega gikuatshi?” Muene wamuvutuile egi: “Masuta alengi gu ita, avula mukatshi diawo afui. Saula nu mun’enji Yonatana nji afui.”
5 Gungima Davidi wahudile muvuala muene egi: “Luholo lutshi wajiyi egi Saula nu mun’enji Yonatana afui?”
6 Muvuala muene wamuvutuile egi: “Ngatugila ngudi gale gu Mulundu wa Gileboa. Ngamonyi Saula yaguzegemena gu mulumbu wenji. Phusu-phusu jia ita nu athu akhadi holu dia tubalu akhadi musuena gudi muene.
7 Tangua diabalumuga muene, wangumonyi, wangutamega. Hene ngatayi egi: ‘Ame yowu!’
8 Wanguhudi egi: ‘Aye nanyi?’ Ngamuvutudila egi: ‘Ngudi muenya Amaleke.’
9 Gungima wanguwambela egi: “Ngabuba, iza ungushiye; handaga ngudi nu monyo, uvi ngudi mu lamba diakola.’
10 Hene ngasuenyi hehi n’enji, ngamushiya. Ngakhadi mujiya egi udi mufua genji, handaga wakhadi yagubua hashi, wagunamana muavula. Ngazudi gifulu gia ufumu giakhadi gu muto wenji nu gabanda gakhadi gu koko dienji, hene ngagubatela nayo fumu.”
11 Davidi watawile milele yenji, athu agasue akhalele n’enji atawile nji milele yawo.
12 Adidile mangololo, atunyile nji gudia uu nu mu ngueze mukunda nu Saula nu mun’enji Yonatana nu athu a Yehowa nu mukunda nu enya Isalele avula ashiyiwe gu phogo ya khusa.*
13 Davidi wahudile muvuala wajile gumutela lumene egi: “Udi muenya gui?” Muene wamuvutuile egi: “Ngudi mun’a muenya Amaleke mumoshi wajile mukhala gu Isalele.”
14 Wamuhudile luko egi: “Mukunda natshi wavuilego woma ha gushiya muthu Yehowa watombele ha gukhala fumu?”
15 Davidi watamegele muvuala mumoshi, wamuwambelele egi: “Iza ushiye muthu yowu.” Muvuala muene wajile, wamushiyile.
16 Davidi wawambelele muthu muene egi: “Mahatshi aye adi ha muto waye, handaga aye hakhaye wadifuisa milonga tangua wazuedi egi: ‘Ame ngashiyi muthu Yehowa watombele ha gukhala fumu.’”
17 Gungima Davidi wayimbile lungimbo lua masaga mukunda nu Saula nu mun’enji Yonatana.
18 Wambile nji mukhuala egi enya Yuda adi naye gulonguga lungimbo luene, ludi nu muto wa lumene egi: “Uta wa Manana.” Lungimbo luene ludi luagusonega mu mukanda wa Jashale:
19 Oo Isalele, lutumbu luaye luashiyiwa mu milundu yaye.
Athu aye a ngolo abua!
20 Mutshigo lumene gu Gate;Muzuelelago ndaga yene mu mabala-bala a Asekelone,Gula ndo ana a akhetu a enya Filistiya mbaasuanguluga,Ana a akhetu a athu ambiwego gu mukanda mbaadihala.
21 Enue milundu ya Gileboa,Mame amibuilago luko, mvula nji iminogelago luko,Mahia enu azodigo mbuto jiajiya guhanewa milambu gudi Nzambi,Handaga tshibu jia athu a ngolo jiabolesewa,Tshibu ya Saula mbayishigo mukungiwa luko maji.
22 Uta wa manana wa Yonatana wakhalelego mulenga gutuama dia mahatshi a athu a gufua,Wakhalelego nji mulenga gutuama dia maji a athu a ngolo,Phogo ya khusa ya Saula yakhalele mubinga tangua diagasue.
23 Tangua Saula nu Yonatana akhalele nu monyo, athu akhalele guazumba,*Uu nu gufua guawo, a akhaphumuine ndo.
Ene akhalele nu phushi gubalega njila jia khuyi,Akhalele nu ngolo gubalega shitu jia khoshi.
24 Enue ana a akhetu a gu Isalele dilenu Saula,Muene wakhalele gumisudigisa muabonga nu milele yabenga,Muene wakhalele musembega milele yenu nu tuzeya tua wolo.
25 Enya ngolo abuile, ene ashiyiwe gu ita!
Yonatana wabandele wa gufua gu milundu!
26 Ngudi nu gikenene giavula mukunda nu aye Yonatana mun’etu;Ngakhalele guguzumba muavula.
Guzumba guaye guakhalele guabonga gubalega guzumba gua akhetu.*
27 Enya ngolo abuile!
Iluilo ya ita yabolesewe!”
Mbimbi goshi'a diyiji
^ Nga “mubinga.”
^ Nga “phogo ya ita.”
^ Nga “akhalele musuanguluga nawo.”
^ Nga “Ufuta waye gudi ame wakhalele wabonga sha gubalega guzumba gua akhetu.”
