Mukanda wa Mbadi wa Samuele 11:1-27
11 Gu gisendeselo gia givo* tangua mafumu anaya mulua ita, Davidi watumile Yoabe nu enya mudimo enji nu masuta agasue a Isalele ha guya mushiya enya Amona. Ayile, ajietele dimbo dia Raba, uvi Davidi wasalele gu Yelusalema.
2 Lusugu lumoshi mu ngueze, Davidi wazugile ha gitanda gienji, wayile nu guwenda holu dia inzo yenji.* Hakhalele muene holu dia inzo, wamonele mukhetu mumoshi muzua meya. Mukhetu muene wakhalele wabonga diago.
3 Davidi watumine muthu ha guya muhula gula mukhetu muene udi nanyi. Muthu muene wajile gumuwambela egi: “Mukhetu muene jina dienji Batesheba mun’a Eliyama, mukaji’a Uriya muenya Hete.”
4 Gungima Davidi watumine athu ha guya gumuzula. Batesheba wanginyile mu inzo ya Davidi, Davidi wabungishile n’enji muila. (Ndaga yene yakalegewe tangua Batesheba wakhalele gudiphelegetesa.*) Gungima wavutugile gumbo dienji.
5 Batesheba wamitshile vumo. Gungima watumile mbimbi gudi Davidi egi: “Ngudi gu vumo.”
6 Hene Davidi watumine mbimbi gudi Yoabe egi: “Ngutumine Uriya muenya Hete.” Yoabe watumile Uriya gudi Davidi.
7 Tangua Uriya wajile, Davidi wamuhudile gula Yoabe udi gikuatshi, gula masuta adi muabonga; wamuhudile nji gula ita idi mubalega gikuatshi.
8 Gungima Davidi wawambelele Uriya egi: “Nda gumbo diaye uhuluguge.”* Tangua Uriya wakatugile gu inzo ya fumu, fumu wamutumidile kado.*
9 Uvi Uriya wabandele ha mufulo wa inzo ya fumu nu enya mudimo agasue a fumu. Gayile ndo gumbo dienji.
10 Awambelele Davidi egi: “Uriya gayilego gumbo dienji.” Hene Davidi wahudile Uriya egi: “Wakatuga mu njila yaleha, mukunda natshi wayilego gumbo diaye?”
11 Uriya wawambelele Davidi egi: “Mushete wa gikotelo nu enya Isalele nu enya Yuda adi mu jinzo jia tenta, fumi’ami Yoabe nu masuta enji adi mu phundo mu temu. Ame ngudi naye guvutuga gumbo diami, ngudie, ngunue, ngubande nu mukaji’ami ba? Ngudi guguwambela giamatshidia egi ngajiyilego gutshita ngenyi!”
12 Davidi wawambelele Uriya egi: “Khala luko haha mangino, mbawuya hamene.” Uriya wakhalele gu Yelusalema lusugu luene nu lusugu lualanduile.
13 Davidi watamegele Uriya gumbo dienji, adile, anuile, gungima wamuhanele matombe, amukuatele. Uvi mu ngueze, Uriya wayile mubanda ha gitanda gienji nu enya mudimo a fumi’enji. Gavutugilego gumbo dienji.
14 Mu gimenegena, Davidi wasonegele Yoabe mukanda, wawutumile nu Uriya.
15 Mu mukanda wene, Davidi wasonegele egi: “Haga Uriya gutuama, fundo ita idi yakola. Enue vutugenu gungima, hagula ashiyiwe.”
16 Yoabe watalele muabonga dimbo, wakhalele mujiya fundo masuta awo a ngolo akhalele. Hene, wahagele Uriya ha fundo diene.
17 Tangua masuta a mu dimbo diene azogele ha guluisa Yoabe, masuta ako a Davidi afuile. Uriya muenya Hete wakhalele nji mukatshi dia masuta afuile.
18 Yoabe watumine muthu gudi Davidi ha gumutela mene jia ndaga jiagasue jiabalegele gu ita.
19 Wawambelele muthu muene egi: “Gula wamanesela gutela fumu mene jiatadila ita,
20 fumu wajiya guvua khabu. Wajiya nji guguwambela egi: “Mukunda natshi muayi hehi nu dimbo ha gulua? Muakhalelego mujiya egi athu adi holu dia gibayi ajiya gumisonona mifula?
21 Nanyi washiyile Abimeleke mun’a Yerubesheta? Ishigo mukhetu wa gu Tebese munu wakhalele holu dia gibayi wamusonuene seso, wamushiya? Mukunda natshi muayi hehi nu gibayi?” Aye mbawuzuela egi: “Muenya mudimo waye Uriya muenya Hete wafui nji.”
22 Muthu muene wayile muwambela Davidi ndaga jiagasue jiamuwambelele Yoabe ha guzuela.
23 Wawambelele Davidi egi: “Athu awo atubalegela ngolo, aji gutuluisa mu temu; uvi tuaavutula uu nu ha mufulo wa dimbo.
24 Gungima athu ana sonona mifula atusonona mifula holu dia gibayi. Fumu, masuta aye ako afui, muenya mudimo waye Uriya muenya Hete wafui nji.”
25 Davidi wawambelele muthu muene egi: “Nda uwambele Yoabe egi: ‘Udisagesago mukunda nu ndaga yene, handaga phogo ya khusa yajiya gushiya muthu wagasue. Kolesa ita hagula mubuise dimbo diene.’ Aye nji hana Yoabe gikhesa.”
26 Tangua mukaji’a Uriya wavuile egi Uriya wafua, wahagele masaga mukunda nu mulumi’enji.
27 Hahuile masaga, Davidi watumine mbala imoshi athu ha gumuzula ha guza n’enji gumbo dienji; wabuile mukaji’enji. Gungima wavualele mona wa yala. Uvi ndaga yakalegele Davidi yakhalele diago yabola gu meso a* Yehowa.
Mbimbi goshi'a diyiji
^ Yakotelesa egi: “gungima dia sungi ya guhuma.” Yakhalele mu mbeji ya mars nga ya avril. Tala App. B15.
^ Nga “inzo ya fumu.”
^ Yajiya gukhala egi wakhalele gudiphelegetesa gungima dia guzoga mahatshi.
^ Mu Hebelu: “uweve malu.”
^ Nga “kado ga fumu.” Yakotelesa egi kado muthu wakhalele muhana ngenji wenji wa ginemua.
^ Nga “yasuanguluishilego.”
