Mukanda wa Mbadi wa Samuele 12:1-31
12 Yehowa watumine Natana gudi Davidi. Hanginyile muene gumbo dia Davidi, wamuwambelele egi: “Guakhalele nu mala mbadi mu dimbo dimoshi. Muko wakhalele muenya umonyi, uvi muko wakhalele phutu.
2 Muenya umonyi wakhalele nu imeme yavula nu ngombe jiavula.
3 Uvi yala munu wakhalele phutu, gakhalelego nga nu gima. Wakhalele phamba nu gamutumba ga gimeme gamukaji gasumbile muene. Wakhalele gugabamba muabonga; ga gimeme gene gakhalele mukula monzo ya yala muene nu an’enji. Wakhalele gugadisa ndambo ya ima inyi akhalele naye, gakhalele munua meya mu kawu, gakhalele nji mubanda ha mago enji. Gakhalele diago gifua mun’enji wa mukhetu.
4 Lusugu lumoshi, ngenji yayile mutala yala wakhalele nu umonyi. Yala muene wamulondele ima ya gudia. Uvi ha fundo dia guzula gimeme gienji nga ngombe yenji, wazanguile ga gimeme ga yala wakhalele phutu watelegela ngenji yenji.”
5 Havuile Davidi ndaga yene, wavuidile yala muene khabu jiakola, wawambelele Natana egi: “Ngudi guguwambela giamatshidia mu jina dia Yehowa Nzambi wa monyo egi, yala muene udi naye gushiyiwa!
6 Handaga wakalagala ndaga ya khuta. Udi naye nji gumufuta imeme iko nguana ha fundo dia ga gimeme genji.”
7 Gungima Natana wawambelele Davidi egi: “Yala muene udi aye! Yehowa Nzambi wa Isalele udi muzuela egi: ‘Ame ngagutombele ha gubua fumu wa enya Isalele, ame nji ngaguhuluishile ha mago a Saula.
8 Ngaguhanele ima yagasue ya fumi’aye Saula nu akaji’enji. Ngagubuishile fumu wa Isalele nu Yuda. Gula wamonele egi ima eyi yakhalele yazonda, ngakhalele naye guguhana ima iko yavula.
9 Mukunda natshi watumagelego mbimbi ya Yehowa? Mukunda natshi wakalagala ndaga yabola gu meso enji? Washiya Uriya muenya Hete! Watshita yagasue hagula ashiyiwe gudi enya Amona, gungima wazula mukaji’enji hagula abue mukaji’aye.
10 Sendese mangino, athu avula a mu fami yaye mbaafua gufua gumoshi guabola,* handaga wangusegulula, wazudi mukaji’a Uriya muenya Hete hagula abue mukaji’aye.’
11 Yehowa udi muzuela luko egi: ‘Mbangugumonesa lamba mu njila ya enya fami yaye. Mbanguzangula akaji’aye ha meso aye, mbanguahana gudi yala muko.* Muene mbawubungisa nawo muila ha meso a athu agasue.*
12 Aye wakalagala ndaga mu gisuegi, uvi ame mbangujikalagala haphelo ha meso a enya Isalele agasue.’”*
13 Davidi wawambelele Natana egi: “Ngakalegela Yehowa gubola.” Natana wamuvutudile egi: “Yehowa wagutotesela gubola guaye. Ushigo mufua.
14 Uvi luholo wanemeselego Yehowa nga hazonda, mona akatuga guguvualela mbawufua.”
15 Natana wavutugile gumbo dienji.
Gungima Yehowa watshitshile egi mona munu Davidi avualele nu mukaji’a Uriya akate misongo.
16 Davidi wabubidile Nzambi wa giamatshidia ha guhuluisa mun’enji. Gakhalelego mudia nga gima, wakhalele mubanda mu mavu phipha jiagasue.
17 Manene a monzo yenji* ayile gumumona. Amububidile ha guzuga mu mavu, uvi muene watunyile. Gatshiginyilego nji gudia nawo.
18 Mu lusugu lua sambadi, mona muene wafuile. Enya mudimo a Davidi akhalele muvua woma ha gumuwambela egi mun’enji wafui. Akhalele muzuela egi: “Tangua diakhadi mun’enji nu monyo, tuatele n’enji maga uvi watunyile gututegelela. Henyaha gula tuamuwambela egi mun’enji wafui, wajiya gukalagala ndaga yabola.”
19 Tangua Davidi wamonele enya mudimo enji gudifetesa, wakotelesele egi mun’enji wafui. Hene, wahudile enya mudimo enji egi: “Mona wafua?” Ene amuvutuile egi: “Ayi, wafui gale.”
20 Hene, Davidi wazugile, wazuile meya, wadikungile maji, wasombegesele nji milele yenji. Gungima wayile monzo ya Yehowa ha gukombelela. Havutugile muene gumbo dienji,* watogele ima ya gudia. Amuhuile, wadile.
21 Enya mudimo enji amuwambelele egi: “Tushigo mukotelesa ndaga udi mutshita! Tangua diakhadi mona nu monyo, wakhadi mudila tangua diagasue, watunyi nji gudia; uvi hafua mona, wazuga wasendesa gudia.”
22 Muene waavutuile egi: “Hakhadi mona nu monyo, ngakhadi mudila tangua diagasue nu ngatunyi nji gudia handaga ngakhadi mutangiza egi: ‘Yehowa wajiya gunguvuila khenda, nu wajiya gukuatesa mun’ami hagula gafuigo.’
23 Henyaha wafui gale, mukunda natshi ngudi naye gutuna gudia? Ngudi nu ngolo jia gumufuzumuna ba? Ame mbanguya gudi muene, uvi muene mbagashigo muvutuga gudi ame.”
24 Gungima Davidi wahanele mukaji’enji Batesheba gikhesa. Wayile gumbo dienji, wabungishile n’enji muila. Gungima Batesheba wavualele mona wa yala, amuhanele jina egi Salomo.* Yehowa wakhalele muzumba Salomo.
25 Hene watumine profete Natana ha gumuhana jina egi Yedidia,* handaga Yehowa wakhalele gumuzumba.
26 Yoabe walanduile guluisa dimbo dia ufumu dia enya Amona diana tamegewa egi Raba. Gungima waditambuile.
27 Yoabe watumine Davidi mbimbi egi: “Ngaluisa dimbo dia Raba, ngatambula nji ito ya mita ya dimbo diene.*
28 Henyaha bungisa masuta anyi asadi, iza ubandemene dimbo ha guditambula. Gula ndo ame mbanguditambula, ngenyi lutumbu luagasue mbaluza gudi ame.”*
29 Hene Davidi wabungishile masuta agasue, wayile muluisa dimbo dia Raba, waditambuile.
30 Gungima Davidi wazudile gifulu gia ufumu giakhalele gu muto wa Malekame.* Gifulu giene giakhalele nu gunema gua talanta imoshi* ya wolo, giakhalele nji giagusembega nu maseso ako a ndando. Agihagele gu muto wa Davidi, watambudile nu ima iko yavula ya mu dimbo diene.
31 Davidi wakuatele nji athu a mu dimbo diene, waahanele mudimo wa gusonga maseso, nu ha gukalagala mudimo nu iphangu nu ikadigilo ya utadi ya guviga muabonga nu mudimo wagukalagala babrike. Watshitshile ngenyi gudi athu a mu membo agasue a enya Amona. Gungima muene nu masuta enji agasue avutugile gu Yelusalema.
Mbimbi goshi'a diyiji
^ Mu Hebelu: “phogo ya khusa mbayishigo mukatuga monzo yaye.”
^ Nga “phangi’aye.”
^ Mu Hebelu: “ha meso a muanya owu.”
^ Mu Hebelu: “gutuama dia muanya.”
^ Nga “inzo ya fumu.”
^ Nga “gu inzo ya fumu.”
^ Jina diene diakatuga mu mbimbi ya Hebelu, yakotelesa egi “Guhuima.”
^ Yakotelesa egi: “Yah wana gumuzumba.”
^ Mu Hebelu: “dimbo dia meya.”
^ Mu Hebelu: “dimbo diene mbaditamegewa mu jina diami.”
^ Malekame wakhalele nzambi wa gisongo wa enya Amona.
^ Talanta imoshi yakhalele nu bakilo 34,2. Tala App. B14.
