Mukanda wa Mbadi wa Samuele 13:1-39
13 Abasaloma mun’a Davidi wakhalele nu phangi’enji wa mukhetu wabonga diago, jina dienji Tamare. Amenona, mun’a Davidi muko, wakhalele musuanguluga nu Tamare.*
2 Amenona wakhalele gudisagesa muavula, hene gakatele mukunda nu phangi’enji Tamare; Tamare wakhalele khenji gabungishilego muila nu yala, Amenona gakhalelego mumona luholo lua gumukalagala nga ndaga imoshi.
3 Wakhalele nu futa dienji mumoshi jina dienji Yonadaba mun’a Shimeya, phangi’a Davidi. Yonadaba wakhalele watema diago.
4 Hene wahudile Amenona egi: “Aye udi mun’a fumu, uvi mukunda natshi wana zuga nu gikenene gimenegena giagasue? Nguwambele ndaga idi gugusagesa!” Amenona wamuwambelele egi: “Ngudi muzumba Tamare, galenge ga phangi’ami Abasaloma.”
5 Yonadaba wamuwambelele egi: “Banda ha gitanda, tshita gifua muthu udi mukata. Gula sh’aye waza gugutala, muwambele egi: ‘Ngabuba, wambela phangi’ami Tamare aze anguhane ima ya gudia ana hana mukhashi.* Ngatshigina angulondele nayo haha ha meso ami, anguhane nayo hagula ngudie.”
6 Amenona wabandele ha gitanda, watshitshile gifua muthu udi mukata. Fumu Davidi wajile gumutala. Amenona wamuwambelele egi: “Ngabuba, wambela phangi’ami Tamare aze angulondele bagato mbadi,* anguhane nawo ngudie.”
7 Davidi watumine muthu ha guwambela Tamare egi: “Ngabuba, nda gumbo dia phangi’aye Amenona, umulondele ima ya gudia.”*
8 Gungima Tamare wayile gumbo dia phangi’enji Amenona. Amenona wakhalele wa gubanda. Tamare walondele pate, walondele bagato ha meso enji, waawetshiele.
9 Gungima Tamare wazudile bagato, wahanele Amenona ha gudia. Uvi Amenona watunyile, wazuelele egi: “Athu agasue azoge hanze!” Hene athu agasue azogele.
10 Gungima Amenona wawambelele Tamare egi: “Ngubatele ima ya gudia* gu sugu, unguhane nayo ngudie.” Tamare wazanguile bagato* alondele muene, waabatele phangi’enji Amenona gu sugu.
11 Tangua Tamare wamubatele ima ya gudia, Amenona wamukuatele, wazuelele egi: “Mun’etu, iza tubungise muila.”
12 Uvi muene wamuwambelele egi: “Ndo mun’etu! Unguvuishigo musonyi; handaga ndaga ya luholo elu yana kalegewago gu Isalele. Ukalagalago ndaga ya musonyi ya luholo elu.
13 Luholo lutshi athu mbaabuita mutshima gu ndaga eyi ya musonyi? Athu agasue a gu Isalele mbaagumona egi udi muthu wa gituhu. Ngabuba, gula wawambela fumu egi anguhane gudi aye, mbagashigo mutuna.”
14 Uvi Amenona watunyile gumutegelela. Wamukuatele gu ngolo, wabungishile n’enji muila, wamuhanele musonyi.
15 Gungima dia gubungisa n’enji muila, Amenona gakhalelego gumuzumba luko nga hazonda. Wasendesele gumuvila khabu jiavula gubalega guzumba gakhalele nago thomo mukunda nu muene. Wamuwambelele egi: “Zuga; zoga uye!”
16 Tamare wamuwambelele egi: “Ndo mun’etu. Gula wangukaya henyaha, iza mukhala ndaga yabola gubalega inyi wakatuga gungukalagala!” Uvi Amenona watunyile gumutegelela.
17 Amenona watamegele muenya mudimo wenji wa muvuala, wamuwambelele egi: “Zola mukhetu yowu haha, gungima kanga mufulo.”
18 (Tamare wakhalele nu lopho diabonga gu muila. Ana a akhetu a fumu anyi akhalele khenji abungishilego muila nu yala, akhalele musudiga milele ya luholo elu.) Hene muenya mudimo wamuzolele hanze, wakangele mufulo.
19 Tamare wadimbile fuphi mu muto, watawile lopho diabonga diasudigile muene; wahagele mago ha muto, wayile nu gudila mangololo.
20 Phangi’enji Abasaloma wamuhudile egi: “Phangi’aye Amenona wagukalegela ndaga eyi yabola? Mun’etu uwambelago nga muthu mumoshi ndaga yene. Amenona udi phangi’aye. Ubambigo ndaga eyi mu mutshima.” Gungima Tamare wayile mukhala gumbo dia phangi’enji Abasaloma; gakhalelego gudimona nu athu.
21 Tangua fumu Davidi wavuile ndaga jiakalegewe, wavuile khabu jiakola. Uvi gakhalelego mutshigina guhana mun’enji Amenona gikenene handaga wakhalele gumuzumba. Amenona wakhalele mun’enji wa somi.
22 Abasaloma gawambelelego Amenona nga ndaga imoshi, ikhale yabonga nga yabola; handaga wamubambele umbalagaji mu mutshima luholo ahanele phangi’enji Tamare musonyi.
23 Ivo mbadi gungima, tangua enya mudimo a Abasaloma akhalele mukoka imeme yenji uvuji gu Bale-Hasole hehi nu Efrayime, Abasaloma watamegele ana a mala agasue a fumu ha guza gu wano.
24 Hene wanginyile gumbo dia fumu, wamuwambelele egi: “Fumu, ngudi mukokesa imeme yami uvuji. Ngabuba, gula watshigina, aye nu enya mudimo aye muajiya guza nji.”
25 Uvi fumu wawambelele Abasaloma egi: “Ndo mun’ami. Gula mukut’etu agasue tuaya, mbayikhala ginemo gudi aye.” Abasaloma wamububidile muavula, Davidi watunyile; uvi wamuhanele phemba.
26 Abasaloma wamuwambelele egi: “Gula aye ushigo muya, ngabuba, nguhane phangi’ami Amenona tuye n’enji.” Uvi fumu wamuhudile egi: “Mukunda natshi udi mutshigina guya n’enji?”
27 Abasaloma wamububidile muavula. Hene fumu watumine Amenona nu an’enji agasue a mala ha guya n’enji.
28 Gungima Abasaloma wawambelele enya mudimo enji egi: “Khalenu mutala muabonga. Gula Amenona wanua matombe, wasendesa gusuanguluga, nguza gumiwambela egi: ‘Mushiyenu!’ Mudi naye diago gumushiya. Muvuigo woma, ame ngudi gumituma! Khalenu nu gikhesa.”
29 Enya mudimo a Abasaloma ashiyile Amenona gifua luholo luaawambelele fumi’awo. Gungima ana a mala ako agasue a fumu azugile, muthu nu muthu wanginyile ha phunda yenji, alengele.
30 Hakhalele ene mu njila, muthu mumoshi wayile muwambela Davidi egi: “Abasaloma washiya an’aye agasue a mala. Gushigo nga mumoshi wasadi nu monyo.”
31 Davidi wazugile, watawile milele yenji, wabandele mu mavu. Enya mudimo enji agasue amaganele hehi n’enji, akhalele nu milele yagutawuga.
32 Uvi Yonadaba mun’a Shimeya, phangi’a Davidi wamuwambelele egi: “Fumu, an’aye agasue ashiyiwego, phamba Amenona wafui. Abasaloma wawambela athu ha gumushiya. Wazudile desizio dia gumushiya sendese lusugu Amenona wahanele phangi’enji Tamare musonyi.
33 Fumu, uvigo* ndaga aguwambela egi an’aye agasue afui. Phamba Amenona hakhenji wafui.”
34 Mu tangua diene, Abasaloma walengele. Gungima mutaledi mumoshi wa dimbo wamonele athu avula muza mu njila ya gu khanda ya mulundu.
35 Hene Yonadaba wawambelele fumu egi: “Fumu tala! Ngaguwambela giamatshidia. An’aye avutuga.”
36 Hamanesele muene guzuela, ana a fumu anginyile nu gudila mangololo; fumu nu enya mudimo enji agasue asendesele nji gudila mangololo.
37 Uvi Abasaloma walengele, wayile gu Geshule gumbo dia fumu Talemayi mun’a Amihuda. Davidi wadidile mun’enji Amenona masugu avula.
38 Abasaloma walengele, wayile gu Geshule; wakhalele guene ivo thathu.
39 Gu gisugishilo, fumu Davidi wavuile uhote wa gumona mun’enji Abasaloma, handaga gakhalelego luko nu gikenene giavula mukunda nu gufua gua mun’enji.
Mbimbi goshi'a diyiji
^ Nga “wakhalele gumuzumba muavula.”
^ Nga “dipha dia guwalagana.”
^ Mu Hebelu: “gato mbadi jialondewe gifua mutshima.”
^ Nga “dipha dia guwalagana.”
^ Nga “dipha dia guwalagana.”
^ Mu Hebelu: “gato mbadi jialondewe gifua mutshima.”
^ Mu Hebelu: “uhagigo mutshima gu.”
