Mukanda wa Mbadi wa Samuele 14:1-33
14 Yoabe mun’a Seluya wavuile egi fumu wakhalele gudisagesa mukunda nu mun’enji Abasaloma.
2 Watumine muthu gu Tekoa ha gutamega mukhetu mumoshi watema. Wamuwambelele egi: “Tshita gifua udi ha masaga, sudiga milele ya gafunda, udikungigo maji mu muila. Tshita gifua wana khala gale ha masaga masugu avula.
3 Nda gumbo dia fumu umuwambele ndaga nguguwambela.” Hene Yoabe wawambelele mukhetu muene ndaga jiakhalele naye muene guzuela.
4 Gungima mukhetu wa gu Tekoa wayile gumbo dia fumu, wafugamele gutuama dienji, washiwugile phala mu mavu. Wamuwambelele egi: “Fumu, ngukuatese!”
5 Fumu wamuhudile egi: “Mulonga utshi udi nawo?” Muene wamuwambelele egi: “Fumu, mulumi’ami wafuile gale, ngudi mukhetu wa gafunda.
6 Ngakhalele nu ana a mala mbadi. Uvi lusugu lumoshi, akhalele mulua mu mahia. Guakhalelego nu muthu wa guakhaphumuna, hene mumoshi wabetele muko, wamushiya.
7 Henyaha akuaku’ami agasue adi gungusagesa, adi gunguwambela egi: ‘Zola mona washiyile phangi’enji. Tudi naye gumushiya handaga washiyile phangi’enji. Ikhale muene mbawusalela ima ya sh’enji, tudi naye gumushiya!’ Gula ene amushiya, mbangushigo musala nga nu mona mumoshi, ngenyi jina dia mulumi’ami mbaditota, mbagashigo musala nga nu mujigulu ha mavu.”
8 Fumu wawambelele mukhetu muene egi: “Vutuga gumbo diaye. Ngumuza mutalela mulonga waye.”
9 Uvi mukhetu wa gu Tekoa wamuwambelele egi: “Fumu, gubola gua mun’ami gukhale ha muto wami nu enya fami ya tata, uvi aye nu ufumu waye mushigo nu gubola.”
10 Fumu wamuwambelele egi: “Gula muthu wagusagesa luko mukunda nu mulonga owu, iza n’enji gudi ame. Ngenyi mbagashigo gugusagesa luko.”
11 Uvi mukhetu muene wazuelele egi: “Fumu ngabuba, kombelela* Yehowa Nzambi waye hagula muthu udi mutshigina gushiya mun’ami mukunda nu gubola guatshitshile muene, gamukalagalago gubola nu gamushiyigo.” Fumu wamuwambelele egi: “Ngudi guguwambela giamatshidia mu jina dia Yehowa Nzambi wa monyo egi, gushigo nga nu muthu mbawutshita mun’aye gubola.”*
12 Mukhetu muene wamuwambelele egi: “Fumu ngabuba, ngudi mutshigina guguwambela ndaga iko.” Muene wamuvutuile egi: “Zuela!”
13 Mukhetu muene wamuhudile egi: “Mukunda natshi udi mutshigina gukalegela akombeledi a Nzambi gubola gua luholo elu? Mbimbi jiaye jidi gugufuisa milonga, handaga wakayele mun’aye, ushigo mutshigina egi avutuge.
14 Tudi mujiya muabonga egi mukut’etu agasue mbatufua. Tudi gifua meya abunduga, ajiyilego guzudiwa luko. Uvi Nzambi mbagashigo mushiya nga muthu, mbawukalagala yagasue hagula muthu walengele avutuge luko.
15 Ngaji muwambela fumu mulonga wami handaga athu anguhanyi woma. Ngazuedi egi: ‘Ngudi naye guwambela fumu ndaga eyi, matangua ako muene wajiya gutadila mulonga wami.
16 Fumu wajiya gungutegelela nu wajiya gunguhuluisa ha mago a muthu udi mukamba gutushiya ame nu mun’ami mumoshi wasalele hagula tuhetshigo khapho diatuhanele Nzambi.’
17 Ngazuedi luko egi: ‘Ndaga mbajinguwambela fumi’ami mbajinguhana guhuima,’ handaga fumi’ami udi gifua muanjelo wa Nzambi wa giamatshidia; wana jiya gukhaphumuna ndaga jiabonga nu jiabola. Yehowa Nzambi waye akhale nu aye.”
18 Fumu wawambelele mukhetu muene egi: “Ngabuba, ungusuegelago nga gima mu ndaga nguguhula.” Mukhetu muene wamuvutuile egi: “Fumu zuela, ngudi gugutegelela.”
19 Fumu wamuhudile egi: “Yoabe wagutumi ha guza gunguwambela ndaga eji jiagasue?” Mukhetu muene wamuvutuile egi: “Fumu, ngudi guguwambela giamatshidia egi ndaga wazuela idi ngenyi.* Muenya mudimo waye Yoabe wangutumi ha guza guguwambela ndaga eji jiagasue.
20 Yoabe wakalagala ngenyi hagula utadile ndaga mu luholo luko. Uvi aye fumu wami wakhala nu ndunge gifua muanjelo wa Nzambi wa giamatshidia. Wana jiya ndaga jiagasue jiana kalegewa mu gifutshi.”
21 Gungima fumu wawambelele Yoabe egi: “Ndaga wazuela jidi jia giamatshidia. Ngudi mutshita gifua luholo wazuela. Nda ukambe Abasaloma, uze n’enji.”
22 Yoabe wafugamele, washiwuga phala mu mavu, washimanele fumu. Wamuwambelele egi: “Fumu, mangino ngajiya giwa egi wana gunguzumba, handaga watshita ndaga ngagutogi.”
23 Yoabe wazugile, wayile gu Geshule, wazudile Abasaloma, wajile n’enji gu Yelusalema.
24 Uvi fumu wazuelele egi: “Abasaloma udi naye guvutuga mu inzo yenji. Gajiyilego guza mumona phala yami.” Hene Abasaloma wavutugile gumbo dienji, gamonelego fumu.
25 Gu Isalele yagasue, guakhalelego nga nu yala wakhalele wabonga gifua Abasaloma. Athu akhalele nji gumushimana muavula. Sendese gu muto wenji uu nu goshi’a ikanzo yenji, gakhalelego nga nu ditona.
26 Abasaloma wakhalele mukoka sanga dienji givo giagasue handaga wakhalele nu sanga diavula. Hakhalele muene mukoka sanga dienji, diakhalele gunema bashekele* 200 ha gutadila shekele akhalele mukalegela gumbo dia fumu.*
27 Abasaloma wavualele ana a mala thathu nu mon’a mukhetu mumoshi. Wamuhanele jina egi Tamare. Mon’a mukhetu muene wakhalele wabonga diago.
28 Abasaloma watshitshile gu Yelusalema ivo mbadi, uvi gamonelego phala ya fumu.
29 Lusugu lumoshi, Abasaloma watamegele Yoabe gumbo dienji hagula wajiya guya mububila fumu ha gumuvuila khenda, uvi Yoabe watunyile. Abasaloma watumine luko mbimbi mbala ya mbadi, uvi Yoabe watunyile guza.
30 Gu gisugishilo Abasaloma wawambelele enya mudimo enji egi: “Yoabe udi nu dihia dia orje hehi nu dihia diami. Ndenu mudimbe tshuya.” Enya mudimo a Abasaloma ayile, ambile dihia diene tshuya.
31 Gungima Yoabe wayile gumbo dia Abasaloma, wamuhudile egi: “Mukunda natshi enya mudimo aye ambi dihia diami tshuya?”
32 Abasaloma wamuvutuile egi: “Tala! Ngatumi athu ha gugutamega handaga ngatshigina egi uye gumbo dia fumu, umuhule egi: ‘Mukunda natshi wangukatula gu Geshule? Wakhadi naye gungubemba guene. Ngumutshigina gumona fumu. Gula fumu wamona egi ngudi nu gubola, angushiye.’”
33 Yoabe wayile gumbo dia fumu, wamuwambelele ndaga jiazuelele Abasaloma. Gungima fumu watamegele Abasaloma. Abasaloma wayile gumbo dia fumu, wafugamele, washiwugile phala mu mavu gutuama dia fumu. Fumu wamuhanele beze.
Mbimbi goshi'a diyiji
^ Mu Hebelu: “tangigiza.”
^ Mu Hebelu: “gushigo nga nu sanga dimoshi dia mun’aye mbadibua mu mavu.”
^ Nga “gushigo nu muthu wajiya guya gu koko dia madia nga dia mahidi mu ndaga wazuela.”
^ Shekele imoshi yakhalele nu bakilo hehi nu 2,3. Tala App. B14.
^ Mu Hebelu: “ha gutadila seso dia fumu.” Yajiya gukala egi shekele eyi yakhalele shekele akhalele mukalegela gumbo dia fumu. Yakhalele yagudisha nu bashekele ako.
