Mukanda wa Mbadi wa Samuele 15:1-37
15 Gungima dia ndaga eji jiagasue, Abasaloma walondesele phusu-phusu, wazudile tubalu nu masuta 50 ha gukhala muzula phushi gutuama dienji.
2 Gimenegena giagasue, Abasaloma wakhalele muya mumagana gu khulo ya njila idi muya gu mufulo wa dimbo. Gula muthu waza nu mulonga hagula fumu awusophese, Abasaloma wakhalele gumutamega, wakhalele gumuhula egi: “Udi muenya mu dimbo ditshi?” Muthu muene wakhalele gumuwambela giphuta giakhalele muene gu Isalele.
3 Abasaloma wakhalele gumuwambela egi: “Tala, mulonga waye udi wabonga, uvi fumu gatombelego nga muthu mumoshi ha gutegelela mulonga waye.”
4 Gungima Abasaloma wakhalele muzuela egi: “Gula nga ame ngudi nzuji mu gifutshi gigi, nga muthu wagasue udi nu mulonga wakhalele naye guza gungumona hagula nguwusophese; ngakhalele naye nji gutshita yagasue hagula mulonga wenji usophesewe mu luholo luabonga.”
5 Gula muthu waza gudi Abasaloma ha gufugama gutuama dienji, Abasaloma wakhalele gumutunyisa. Gungima wakhalele gumuyamba, amuhanyi beze.
6 Wakhalele mutshita ngenyi gudi enya Isalele agasue akhalele muza gudi fumu ha gusophesa milonga yawo. Ngenyi Abasaloma wakhalele mukuata* mitshima ya enya Isalele.
7 Gungima dia ivo nguana,* Abasaloma wawambelele fumu egi: “Ngabuba, ngubembe nguye gu Hebrone ha gutaganesa ndaga ngalayele Yehowa.
8 Handaga tangua ngakhalele gu Geshule mu gifutshi gia Siliya, ngadilogele egi: ‘Gula Yehowa wangukuatesa ha guvutuga gu Yelusalema, mbanguhana Yehowa mulambu.’”*
9 Fumu wamuwambelele egi: “Nda mu guhuima.” Hene Abasaloma wayile gu Hebrone.
10 Hahetele Abasaloma gu Hebrone, watumine athu ha guwambela iphuta yagasue ya Isalele egi: “Gula muavua phungi mudila, mudi naye guzuela egi: ‘Abasaloma wabua fumu gu Hebrone!”
11 Watamegele mala a gu Yelusalema 200, wayile nawo; uvi mala ene akhalelego mujiya matangi akhalele nawo Abasaloma.
12 Tangua diakhalele muhana Abasaloma milambu, watumine muthu gu Gilo ha gutamega Ahitofele muenya gu Gilo. Ahitofele wakhalele muthu wakhalele muhana Davidi malongo. Athu ayile gu khanda ya Abasaloma ha guyila Davidi giphungi, akhalele gudivudisa.
13 Gungima muthu mumoshi wayile muwambela Davidi egi: “Enya Isalele adi muya gu khanda ya Abasaloma.”
14 Davidi wawambelele mbala imoshi enya mudimo enji agasue akhalele n’enji gu Yelusalema egi: “Zugenu tulenge, gula ndo Abasaloma uza gutushiya mukut’etu agasue. Tshitenu phushi, gula ndo lamba diza gutubuila. Abasaloma wajiya guza gutuluisa mu gisagumuisa, ashiyi athu mu dimbo nu phogo ya khusa!”
15 Enya mudimo enji amuwambelele egi: “Fumu, tudi mutshita ndaga yagasue watuwambela.”
16 Fumu wayile nu athu agasue a mu inzo yenji, uvi wabembele akaji’enji ako kumi ha gusala mutalela inzo yenji.*
17 Tangua azogele mu dimbo, fumu nu athu agasue akhalele muya nawo amaganele mu dimbo dia Bete-Melehaka.
18 Davidi watangele athu agasue akhalele nawo* ha gujiya gula mukut’awo agasue akhalele guene. Watangele nji enya Kerete agasue, nu enya Phelete agasue nu athu 600 anyi alanduile Itayi tangua diakatugile muene gu Gate.
19 Gungima fumu wahudile Itayi muenya gu Gate egi: “Mukunda natshi watshigina guza nu esue? Vutuga uye ukhale nu fumu muhe-muhe, handaga aye udi ngenji, wakatugile gale mu gifutshi gienu.
20 Wakatuga guza gualeha ndo. Ngajiyilego guguzula tuye nu guwungagana nu aye, handaga ame ngushigo mujiya fundo ngudi muya. Vutuga nu akuaku’aye, Yehowa agumonesele guzumba gua giamatshidia tangua diagasue!”
21 Uvi Itayi wamuvutuile egi: “Fumu, ngudi guguwambela giamatshidia mu jina dia Yehowa Nzambi wa monyo nu mu jina diaye egi, mbangugulandula fundo diagasue mbawuya; ikhale gu gufua nga gu monyo!”
22 Gungima Davidi wawambelele Itayi egi: “Muabonga. Balega tuye.” Itayi muenya gu Gate wazawugile baba nu athu enji agasue nu fami jiawo.
23 Tangua athu a Davidi akhalele muzawuga Baba dia Kidelona ha guya mu njila ya gu khanda ya mavu a luselenga, athu akhalele gu Yelusalema nu anyi akhalele hehi akhalele mudila mangololo. Uvi fumu Davidi wamaganele hehi nu Baba dia Kidelona.
24 Zadoke nji wakhalele hene nu enya Levi agasue akhalele mubata mushete wa gikotelo wa Nzambi wa giamatshidia. Atuluile mushete wa Nzambi wa giamatshidia. Tangua athu a Davidi amanesele guzawuga Baba dia Kidelona, Abiatare wahetele.
25 Uvi fumu wawambelele Zadoke egi: “Zula Mushete wa Nzambi wa giamatshidia vutuga nawo mu dimbo. Gula Yehowa watshigina, mbawunguvutula mu dimbo nu mbawunguhana luko luendu lua gumona mushete wene nu fundo wana khala.
26 Uvi gula muene wanguwambela egi: ‘Ngushigo gugutshigina luko,’ ngenyi mbawungutshita yagasue idi yabonga gu meso enji.”
27 Fumu wawambelele luko nganga-nzambi Zadoke egi: “Aye wana diangela gumona ndaga mbajibua. Aye nu Abiatare vutugenu mu dimbo mu guhuima. Zangula mun’aye Ahimase nu Yonatana mun’a Abiatare, ndenu nawo.
28 Uvi ame ngudi guminengena hehi nu Muta wa Yordane* uu nu tangua mbanguheta mene jiakatuga gudi enue.”
29 Zadoke nu Abiatare azanguile Mushete wa Nzambi wa giamatshidia, avutugile gu Yelusalema, akhalele guene.
30 Hakhalele Davidi mukanduga mulundu wa mitshi ya Olive, wakhalele muya nu gudila. Waditshuigile mulele gu muto, wakhalele nji muwenda malu a gituhu. Athu agasue akhalele gumulandula, aditshuigile nji milele gu mito, akhalele muya nu gudila.
31 Mu tangua dimoshi ngenyi, awambelele Davidi egi: “Ahitofele udi nji mukatshi dia athu adi muya giphungi nu Abasaloma.” Havuile Davidi ngenyi, wazuelele egi: “Yehowa ngabuba, tshita egi longo* dia Ahitofele dimonewe gifua longo dia muthu waheya!”
32 Tangua diahetele Davidi holu dia mulundu, fundo athu akhalele nu khadilo dia gufugama gutuama dia Nzambi, Hushayi muenya gu Aleka wakhalele gumunengena guene. Wakhalele nu milele ya gutawuga nu fuphi mu muto.
33 Davidi wamuwambelele egi: “Gula waya nu ame, mbawushigo gungukuatesa mu ndaga jiavula.
34 Uvi gula wavutuga mu dimbo, mbawungukuatesa muavula. Wambela Abasaloma egi: ‘Fumu, ngudi muenya mudimo waye. Ngakhalele thomo muenya mudimo wa sh’aye, uvi henyaha ngatshigina gubua muenya mudimo waye.’ Ngenyi mbawutshita egi longo dia Ahitofele ditunyiwe.
35 Nganga-nzambi Zadoke nu Abiatare mbaakhala nu aye gu Yelusalema. Udi naye guawambela ndaga jiagasue mbawuvua gumbo dia fumu.
36 Mbawumona nji an’awo mbadi a mala Ahimase mun’a Zadoke nu Yonatana mun’a Abiatare. Wajiya guatuma ha guza gunguwambela ndaga jiagasue mbawuvua.”
37 Hushayi futa* dia Davidi wanginyile mu dimbo, mu tangua diene Abasaloma nji wakhalele mungina mu Yelusalema.
Mbimbi goshi'a diyiji
^ Mu Hebelu: “mukuya.”
^ Nga ndo yajiya gukhala egi: “ivo 40.” Idi naye gukhala egi ivo yene 40 yasendesele tangua diambiwe Davidi maji ha gubua fumu gifua luholo 1 Sam. 13:16 idi guyimonesa.
^ Nga “mbangukombelela.”
^ Nga “inzo ya fumu.”
^ Nga “akhalele muzawuga n’enji hamoshi.”
^ Yakotelesa egi: “fundo athu akhalele muzawuga Muta wa Yordane ha malu.”
^ Nga “lubelo.”
^ Nga “muthu ana shila mutshima.”
