Mukanda wa Mbadi wa Samuele 17:1-29
17 Ahitofele wawambelele Abasaloma egi: “Nguhane njila nguzule masuta 12 000, ngulandule Davidi mu phipha ya mangino.
2 Mbangumuzogela mu gisagumuisa tangua mbadikhala muene waguhuila, gashigo nu ngolo;* mbangubuisa athu enji tunga-tunga. Masuta enji agasue mbaalenga, mbangushiya phamba fumu Davidi.
3 Gungima mbanguvutula athu agasue gudi aye. Gula muthu udi mukamba wafua, athu enji agasue mbaavutuga gudi aye. Ngenyi athu agasue mbaakhala mu guhuima.”
4 Abasaloma nu akulu agasue a gu Isalele asuangulugile nu matangi a Ahitofele.
5 Uvi Abasaloma wazuelele egi: “Tutamegenu nji Hushayi muenya gu Aleka, hagula tuvue nji matangi enji.”
6 Hene Hushayi wayile gudi Abasaloma. Abasaloma wamuwambelele egi: “Tala matangi atuhanyi Ahitofele. Wamona gikuatshi? Tualandula ba? Gula ndo, tuhane matangi aye.”
7 Hushayi wawambelele Abasaloma egi: “Matangi ahana Ahitofele mu mbala eyi adi abola!”
8 Hushayi wazuelele luko egi: “Udi mujiya muabonga egi sh’aye nu masuta enji adi enya ngolo. Adi nu khabu jiakola gifua urse yatotesa an’enji mu temu. Ujimbilago nji egi sh’aye udi suta diakola, mbagashigo mubanda fundo dimoshi nu athu enji.
9 Mu tangua edi, udi wa gudisuega mu wina wa seso* nga ha fundo diko. Gula muene wasendesa thomo gumiluisa, athu mbaavua ndaga yene mbazuela egi: ‘Davidi wabinga athu a Abasaloma!’
10 Nga muene muthu udi nu ngolo gifua khoshi,* mbawuvua woma, muila mbawumuleba nji; handaga enya Isalele agasue adi mujiya egi sh’aye udi suta dia ngolo, athu agasue adi n’enji, adi nji enya ngolo.
11 Matangi ami adi egi: Bungisa enya Isalele agasue sendese gu Dane uu nu gu Belesheba; akhale avula gifua gishegele mu khulo ya kianga. Aye hakhaye waatuameze gu ita.
12 Mbatuya nu gumukamba fundo diagasue didi muene. Mbatumuluisa nu masuta avula gifua luholo mame ana bua mu mavu. Mbatumushiya nu masuta enji agasue, gushigo nga mumoshi mukatshi diawo mbawusala nu monyo.
13 Gula Davidi waya gudisuega mu dimbo dimoshi ngenyi, mbatushiya dimbo diene. Enya Isalele agasue mbaaza nu shinga, mbatunana ibayi ya dimbo uu nu mu baba. Gushigo nga nu seso dimoshi mbadisala.”
14 Abasaloma nu enya Isalele agasue akhalele n’enji azuelele egi: “Matangi a Hushayi muenya gu Aleka adi abonga gubalega matangi a Ahitofele!” Matangi a Ahitofele akhalele abonga, uvi Yehowa watshitshile egi athu atune gualandula; handaga Yehowa wakhalele mutshigina gubatela Abasaloma malamba.
15 Gungima Hushayi wawambelele nganga-nzambi Zadoke nu Abiatare ndaga Ahitofele wawambelele Abasaloma nu akulu a gu Isalele. Waawambelele nji matangi ahanele muene gudi Abasaloma.
16 Gungima waawambelele egi: “Henyaha tumenu athu ha gutemesa Davidi egi: ‘Mu ngueze ya mangino, ukhadigo mu mavu a luselenga hehi nu Muta wa Yordane.* Zawuga muphushi uye ha sambua, gula ndo aye nu athu aye mbamushiyiwa.’”
17 Yonatana nu Ahimase akhalele gu Ene-Logela; anginyilego mu dimbo hagula athu a amonyigo. Hene muenya mudimo mumoshi wa mukhetu wayile guawambela ndaga jiazuelele Hushayi hagula aye ajiwambele fumu Davidi.
18 Uvi muvuala mumoshi wa yala waamonele, wayile muwambela Abasaloma. Hene Yonatana nu Ahimase alengele, ayile gu Bahulime gumbo dia yala mumoshi. Yala muene wakhalele nu wina mu luphango luenji, adisuegele muene.
19 Mukaji’a yala muene wazudile mulele, watshuigile wina wene, gungima wambile mbuto jia gutua holu. Gushigo nga nu muthu wajiyile egi akhalele muene.
20 Tangua enya mudimo a Abasaloma ahetele, ahudile mukhetu muene egi: “Ahimase nu Yonatana adi gui?” Mukhetu muene waavutuile egi: “Abalega haha, ayi mu njila idi muya gu muta.” Enya mudimo a Abasaloma a akambele uvi a amonelego, gungima avutugile gu Yelusalema.
21 Tangua enya mudimo a Abasaloma avutugile, Yonatana nu Ahimase azogele mu wina, ayile mutemesa fumu Davidi. Amuwambelele egi: “Zuga mupushi, zawuga uye ha sambua dia muta, handaga Ahitofele waguyila gale giphungi ha guguluisa.”
22 Davidi nu athu agasue ayile mbala imoshi, azawugile Muta wa Yordane. Hatshiele guma, mukut’awo agasue akhalele azawuga gale.
23 Hamonele Ahitofele egi atunyi matangi enji, wanginyine ha phunda, wavutugile gumbo dienji. Walondele ndaga nu enya fami yenji, gungima wadijitshigile, wafua.* Amufundjile mu malumba a akhakh’enji.
24 Mu tangua diene, Davidi wahetele gu Mahanayime; uvi Abasaloma nu masuta enji agasue a gu Isalele azawugile Muta wa Yordane.
25 Abasaloma watombele Amasa ha gukhala fumu wa masuta ha fundo dia Yoabe. Amasa wakhalele mun’a Abigayile avualele nu Itela, yala mumoshi wa gu Isalele. Abigayile wakhalele mun’a Nahasha, wakhalele nji phangi’a Seluya, gin’a Yoabe.
26 Abasaloma nu masuta a gu Isalele ahagele phundo yawo mu mavu a Gileade.
27 Hahetele Davidi gu Mahanayime, Shobi mun’a Nahasha wa gu Raba dimbo dia enya Amona nu Makile mun’a Amiele wa gu Lo-Debale nu Barzilayi muenya gu Gileade ya gu Logelima ajile gumutagana.
28 A abatele itanda nu malonga nu mabungu a wuma nu ble nu orje nu phupha nu mbuto jia gukalanga nu makunde nu mbuto jia gimigina,
29 nu wigi nu manteka nu imeme nu fromaje.* Ayihanele yagasue gudi Davidi nu athu enji hagula adie; handaga azuelele egi: “Athu wawa adi naye gukhala a guhuila. Adi nzala, adi nji nu luhungu* mu mavu a luselenga.”
Mbimbi goshi'a diyiji
^ Nga “mago agasue mbadi aguleba.”
^ Nga “mu bengi.”
^ Mu Hebelu: “udi nu mutshima gifua wa khoshi.”
^ Yakotelesa egi: “fundo athu akhalele muzawuga muta wa Yordane ha malu.”
^ Nga “wadishiyile gu luwanda.”
^ Mu Hebelu: “miliki ya ngombe.”
^ Nga “phuila.”
