Mukanda wa Mbadi wa Samuele 18:1-33
18 Gungima, fumu Davidi watangele masuta akhalele n’enji. Wahagele ako mafumu a masuta 1 000, ako mafumu a masuta 100.
2 Davidi wakhaphumuine masuta enji mu mahunji thathu. Wahanele Yoabe hunji dimoshi ha gutuameza, diko wadihanele Abishayi phangi’a Yoabe mun’a Seluya; uvi diko wadihanele Itayi muenya Gate. Gungima Davidi wawambelele masuta egi: “Ame nji mbanguya n’enu gu ita.”
3 Uvi ene amuvutuile egi: “Uyigo nu esue, handaga gula tualenga nga ndo ako mukatshi dietu afua, mbalagaji jiaye jishigo mumona* egi idi mulonga. Aye udi nu ndando yavula gubalega masuta 10 000 mukatshi dietu. Hene idi ndaga yabonga egi aye usale mu dimbo, ukhale gututumina ima tudi nayo funu.”
4 Fumu waawambelele egi: “Ngudi mutshita ndaga yagasue yabonga gumeso enu.” Gungima, wamaganele hehi nu mufulo wa dimbo. Masuta agasue azogele, ako mu thundu ya 100, ako mu thundu ya 1 000, ayile.
5 Fumu wawambelele Yoabe nu Abishayi nu Itayi egi: “Mutshitshigo Abasaloma gubola handaga udi mun’ami.” Masuta agasue avuile ndaga fumu wawambelele mafumu a masuta mukunda nu Abasaloma.
6 Masuta ayile mu temu ha guluisa enya Isalele. Aluile ita yene mu gishitu gia Efrayime.
7 Masuta a Davidi abingile masuta a Isalele, athu avula afuile. Mu lusugu luene ashiyile athu 20 000.
8 Ita yamuanganele gu khanda inyi yagasue. Mu lusugu luene, athu afuile mu gishitu akhalele avula gubalega anyi ashiyiwe gu phogo ya khusa.
9 Gungima Abasaloma wataganele nu masuta a Davidi. Wakhalele holu dia gabalu, walengele. Gabalu gabalegele gosh’a thango jia mutshi wakoma, sanga dia Abasaloma diajinginyine mu thango jiene. Gabalu gabalegele, uvi muene wasalele muzenzelela gosa.*
10 Muthu mumoshi wamumonele, wayile muwambela Yoabe egi: “Tala! Ngamona Abasaloma muzenzelela gu mutshi umoshi wakoma!”
11 Yoabe wavutuile muthu muene egi: “Gula wamumonyi, mukunda natshi wamushiyilego mbala imoshi, umubembi gabui mu mavu? Ngakhadi naye guguhana makuta a utadi wa siliva kumi nu mukaba.”
12 Uvi muthu muene wawambelele Yoabe egi: “Ngatshima anguhana makuta a utadi wa siliva 1 000, ngajiyilego gushiya mun’a fumu; handaga tuavuile tangua fumu wakhalele guguwambela aye nu Abishayi nu Itayi egi: ‘Bambenu mun’ami Abasaloma muabonga. Nga muthu mumoshi gamutshitshigo gubola.’
13 Gula nga ngatumagelego mukhuala wa fumu, ngashiya Abasaloma, fumu wakhadi naye guyijiya. Aye wakhalelego naye gungubamba.”
14 Yoabe wamuwambelele egi: “Ngudi mulaba gubalegesa tangua nu aye!” Wazudile mifula* thathu, wayile naye, wayituile Abasaloma ha mutshima, hakhalele muene nu monyo muzenzelela gu mutshi wakoma.
15 Athu kumi akhalele mubatela Yoabe iluilo, ajile, awasele Abasaloma uu nu hafuile muene.
16 Yoabe washigile phungi* hagula masuta abembe gulandula masuta a Isalele, avutuge.
17 Azudile kimbi gia Abasaloma, agibishidile mu wina diakoma mu gishitu, alumbigile maseso akoma holu. Masuta agasue a Isalele alengele, avutugile gu jinzo jiawo.
18 Hakhalele Abasaloma nu monyo, walondele kunji dimoshi mu Baba dia Fumu mukunda nu lutumbu luenji. Wazuelele egi: “Ngushigo nu ana a mala, jina diami diajiya gutota.” Wahanele kunji diene jina dienji. Kunji diene diana tamegewa uu nu mangino egi Monima wa Abasaloma.
19 Ahimase mun’a Zadoke wazuelele egi: “Ngabuba, ngubembe nguye ngutele fumu lumene; handaga Yehowa wamukalegela ndaga jiabonga luholo luamuhuluisa muene ha mago a mbalagaji jienji.”
20 Uvi Yoabe wamuwambelele egi: “Mangino ishigo aye uya muta lumene. Mbawuya muta lumene lusugu luko; uvi mangino ndo handaga mun’a fumu wafui.”
21 Gungima Yoabe wawambelele muenya Kushi mumoshi egi: “Aye nda uwambele fumu ndaga wamonyi.” Muenya Kushi muene washiwugile gutuama dia Yoabe, wayile muphushi.
22 Ahimase mun’a Zadoke wawambelele luko Yoabe egi: “Nga ndaga itshi yabua, ibue. Ngabuba, ngubembe ngulandule muenya Kushi. Uvi Yoabe wamuvutudile egi: “Mun’ami itshi uyila luko guene? Itshi iko yasadi uya muzuela?”
23 Ahimase wazuelele luko egi: “Nga ndaga itshi yabua, ibue. Ngabuba, ngubembe nguye.” Yoabe wamuwambelele egi: “Nda.” Ahimase wazudile phushi mu njila ya baba dia Yordane,* wabalegele muenya Kushi mu njila.
24 Davidi wakhalele hashi hakatshi dia mufulo wa hanze nu wa mukatshi wa dimbo. Mutaledi wakandugile holu dia yangi dia mufulo wa dimbo wakhalele wa gukuatagana nu gibayi. Watalele, wamonele muthu mumoshi muza hakhenji muphushi.
25 Mutaledi muene watamegele fumu, wamuwambelele. Fumu wazuelele egi: “Gula muthu muene udi hakhenji, udi nu ndaga ya gutuwambela.” Hasuenele muthu muene hehi,
26 mutaledi wamonele muthu muko muza phushi. Watamegele muthu wakhalele mubamba mufulo, wamuwambelele egi: “Tala! Muthu muko yowu muza phushi hakhenji!” Fumu wazuelele egi: “Muene nji udi nu ndaga ya gutuwambela.”
27 Mutaledi wazuelele egi: “Muthu wa thomo ngudi mumona muza phushi udi gifua Ahimase mun’a Zadoke.” Fumu wazuelele egi: “Ahimase udi muthu wabonga, udi muza nu mene jiabonga.”
28 Hahetele Ahimase, watamegele fumu, wazuelele egi: “Ndaga jiagasue jidi muyila muabonga!” Wafugamele gutuama dia fumu, washiwugile phala mu mavu. Wazuelele egi: “Fumu, Yehowa Nzambi waye atumbuishiwe, handaga wagukuatesa ha gubinga mbalagaji jiaye!”
29 Uvi fumu wamuhudile egi: “Mun’ami Abasaloma yowu muabonga ba?” Ahimase wazuelele egi: “Fumu, tangua Yoabe wangutumi nu muenya mudimo waye muko, ngavui matululu avula. Uvi ngushigo mujiya gula yakhadi itshi.”
30 Fumu wamuwambelele egi: “Nda umagane hanyi.” Ahimase wayile, mumagana hene.
31 Gungima muenya Kushi wahetele, wawambelele fumu egi: “Fumu, ngudi nu ndaga ya guguwambela: Mangino Yehowa wagutshitshila ndaga jiabonga, waguhuluisa ha mago a athu agasue ana gugulumbugila.”
32 Uvi fumu wahudile muenya Kushi egi: “Mun’ami Abasaloma yowu muabonga ba?” Muenya Kushi wamuvutuile egi: “Fumu, mbalagaji jiaye jiagasue nu athu agasue ana gugulumbugila ha gugutshita gubola, abue gifua muvuala yowu wa yala!”
33 Ndaga yene yasagesele fumu. Wakandugile gu sugu ya gosa yakhalele gos’a mufulo wa dimbo, wasendesele gudila. Wakhalele muya nu guzuela egi: “Mun’ami Abasaloma, mun’ami, mun’ami Abasaloma! Nga ngafui ha fundo diaye, Abasaloma mun’ami, mun’ami!”
Mbimbi goshi'a diyiji
^ Mu Hebelu: “mbaashigo muhaga mutshima.”
^ Mu Hebelu: “hakatshi dia dilu nu mavu.”
^ Nga ndo yajiya gukhala egi: “mulumbu.” Mu Hebelu: “mihango.”
^ Nga “lumbinga.’
^ Yakotelesa egi: Khanda yagasue yakhalele mu baba dia Yordane uu nu gu dimbo dia Soale.
