Mukanda wa Mbadi wa Samuele 19:1-43
-
Davidi udi nu gikenene giavula mukunda nu Abasaloma (1-4)
-
Yoabe wawamba Davidi (5-8a)
-
Davidi wavutuga gu Yelusalema (8b-15)
-
Shimeyi watoga pardo (16-23)
-
Mefiboshete wamonesa egi gatshitshilego gubola (24-30)
-
Davidi wahana Barzilayi lutumbu (31-40)
-
Enya Isalele ako adi mumana nu enya giphuta gia Yuda (41-43)
19 Gungima athu ayile muwambela Yoabe egi: “Fumu udi mudila, udi nu gikenene giavula* mukunda nu Abasaloma.”
2 Lusugu luene luabuile lusugu lua masaga mukunda nu masuta agasue ikhale abingile* ita; handaga avuile egi fumu udi mudila mun’enji.
3 Masuta avutugile mu dimbo tedie lusugu luene gifua athu ahuiwa musonyi handaga alengi gu ita.
4 Fumu waditshuigile mulele gu phala, walanduile gudila mu dijui diakola egi: “Mun’ami Abasaloma! Abasaloma mun’ami, mun’ami!”
5 Yoabe wanginyile mu inzo ya fumu, wamuwambelele egi: “Mangino masuta aye agasue aguhuluisa, ahuluisa an’aye a mala nu a akhetu nu akaji’aye nu akaji’aye a manda. Uvi aye wahana masuta ene musonyi.
6 Wana zumba mbalagaji jiaye; wana tshigina ndo athu ana guguzumba. Mangino wamonesa haphelo egi mafumu a masuta nu masuta aye ashigo nu ndando gu meso aye. Ngudi diago mujiya egi mangino nga Abasaloma gafuilego uvi mukut’etu agasue tuafua nga udi musuanguluga.
7 Henyaha zuga, nda uhane masuta aye gikhesa handaga ngudi guguwambela giamatshidia mu jina dia Yehowa egi gula wayilego, mu phipha ya mangino gushigo nga muthu mumoshi uza musala nu aye. Lamba didi, diza mukhala diakola gubalega malamba agasue wamonele gale sendese ulenge waye.”
8 Fumu wazugile, wayile mukhala ha mufulo wa dimbo. Awambelele masuta agasue egi: “Fumu udi wagukhala ha mufulo wa dimbo.” Masuta agasue ajile gutuama dienji.
Uvi masuta a Isalele alengele, muthu nu muthu wayile gumbo dienji.
9 Mu iphuta yagasue ya Isalele, athu akhalele mumana. Akhalele muzuela egi: “Fumu watuhuluishile ha mago a mbalagaji jietu, watuhuluishile nji ha mago a enya Filistiya. Uvi henyaha walenga gifutshi mukunda nu Abasaloma.
10 Abasaloma yago tuatombele ha gukhala fumu wetu, wafui gu ita. Henyaha itshi mudi munenga ha guvutula fumu Davidi?”
11 Fumu Davidi watumine athu ha guya muwambela nganga-nzambi Zadoke nu Abiatare egi: “Wambelenu akulu a gu Yuda egi: ‘Mudi mutshigina gukhala athu a suga ha guvutula fumu gu inzo yenji? Mbimbi jia enya Isalele agasue jiahetshi gale haha gudi fumu.
12 Enue mudi aphangi’ami, mudi mahatshi ami.* Mukunda natshi mudi mutshigina gukhala athu a suga ha guza muzula fumu ha gumuvutula?’
13 Mudi naye guwambela Amasa egi: ‘Aye udi mahatshi ami.* Nzambi anguhane ndola yakola gula ngagubuishilego fumu wa masuta ami ha fundo dia Yoabe.’”
14 Mbimbi jia Davidi jiakuatele mitshima ya enya Yuda agasue. Adivuile, atumine fumu mbimbi egi: “Aye nu enya mudimo aye agasue, vutugenu.”
15 Fumu wasendesele guvutuga, wayidile mu njila ya Yordane. Enya Yuda ajile gumutagana gu Gilegale, ayile gumutuala ha guzawuga muta wa Yordane.
16 Gungima Shimeyi mun’a Gela muenya Benjame wa mu dimbo dia Bahulime, wajile muphushi nu athu a gu Yuda ha gutagana fumu Davidi.
17 Shimeyi wajile nji nu athu 1 000 a mu giphuta gia Benjame. Ziba muenya mudimo wa mu inzo ya Saula nu an’enji 15 nu enya mudimo enji 20 abulumugile nji gu Yordane muphushi ha gutagana fumu.
18 Wazawugile* fundo meya ana khala ahihia ha gukuatesa enya fami ya fumu ha guzawuga; wakhalele nji hehi ha gutshita ndaga yagasue yajiya gusuanguluisa fumu. Uvi Shimeyi mun’a Gela wafugamele gutuama dia fumu hakhalele muene mutshigina guzawuga muta wa Yordane.
19 Wawambelele fumu egi: “Fumu, ungumonyigo gifua ngudi muthu wabola, utangizago ndaga jiabola ngagutshitshile mu lusugu wakhalele mukatuga gu Yelusalema. Ubambigo ndaga jiene mu mutshima,
20 handaga ame muenya mudimo waye ngudi mujiya muabonga egi ngatshitshile gubola. Hene mangino ngudi muthu wa thomo mukatshi dia fami yagasue ya Yozefe ha guza mutagana fumu.”
21 Mu tangua diene, Abishayi mun’a Seluya wazuelele egi: “Shimeyi udi naye gufua handaga watele mikumbu gudi muthu Yehowa watombele ha gukhala fumu.”
22 Uvi Davidi wazuelele egi: “Enue ana a Seluya, ndaga eyi ishigo gumitadila. Mukunda natshi mudi mutshigina gutshita ndaga ngushigo mutshigina? Mangino muthu gajiyilego gushiyiwa gu Isalele. Ame ngushigo mujiya egi mangino ngabua luko fumu wa Isalele?”
23 Gungima fumu walayele Shimeyi egi: “Ushigo mufua.”
24 Mefiboshete mujigulu’a Saula wajile nji mutagana fumu. Gazuilego meya gu malu, gabungilego wevu wenji, gawevelego nji milele yenji sendese lusugu fumu akatugile uu nu hajile muvutuga muene mu guhuima.
25 Hajile Mefiboshete* gu Yelusalema ha gutagana fumu, fumu wamuhudile egi: “Mefiboshete, mukunda natshi wasalele nu gungulandula ndo?”
26 Muene wamuvutuile egi: “Fumu, muenya mudimo wami wanguhuigi. Ame ngudi malu a gufua, hene ngamuwambela egi: ‘ Ngulondele phunda, ngugine holu, nguye nu fumu.’
27 Uvi muene waji gungumbila mambo gudi aye. Fumu, aye udi gifua muanjelo wa Nzambi wa giamatshidia. Tshita ndaga yagasue idi gugubongela.
28 Fumu, wakhalele naye gushiya athu agasue a mu fami ya tata, uvi wanguhagele mukatshi dia enya mudimo aye akhalele mudia gu mesa aye. Ngajiyilego luko gugutoga nga gima giko.”
29 Uvi fumu wamuwambelele egi: “Wazuedi gale muavula, hena tedie. Ngazudi desizio egi udi naye gukhapha mahia nu Ziba.”
30 Uvi Mefiboshete wawambelele fumu egi: “Azule genji mahia ene agasue. Ngudi nu gusuanguluga handaga fumu wavutuga gumbo dienji mu guhuima.”
31 Barzilayi muenya gu Gileade wakatugile gu dimbo dia Logelima ha guza mutuala fumu uu nu gu muta wa Yordane.
32 Barzilayi wakhalele muthu wagukola, wakhalele nu ivo 80, wakhalele nji muenya umonyi. Hakhalele Davidi gu Mahanayime, Barzilayi wamukuatesele nu ima ya gudia.
33 Fumu wawambelele Barzilayi egi: “Tuzawuge nu aye, mbawukhala mudia gu mesa ami gu Yelusalema.”
34 Uvi Barzilayi wawambelele fumu egi: “Gualeha ndo ngumufua gami. Itshi nguyila nu fumu gu Yelusalema?
35 Mangino ngudi nu ivo 80. Ngajiya diago gukhaphumuna luko gudisha gudi mukatshi dia ndaga jiabonga nu jiabola ba? Ame muenya mudimo waye ngajiya diago guvua luko gufula gua ima ngudi mudia nga inyi ngudi munua? Ngajiya gutegelela luko majui a mala nu a akhetu adi muyimba? Fumu, ngushigo mutshigina gukhala ginemo mukunda nu aye.
36 Idi lutumbu mukunda nu ame luholo ngaza gugutuala gu Yordane. Ngushigo mutshigina egi fumu angufute nga gima gimoshi.
37 Fumu ngabuba, ngubembe nguvutuge. Ngudi mutshigina egi mbangufuile gumbo dietu hehi nu malumba a tata nu mama. Uvi muenya mudimo waye Kimehame muene yowu, muzule muzawuge n’enji. Wajiya gumukalegela ndaga yagasue udi mutshigina.”
38 Fumu wazuelele egi: “Ngudi muzawuga nu Kimehame. Mbangumukalegela ndaga yagasue yangubongela. Ndaga yagasue wangutoga, mbangudi gugutshitshila nayo.”
39 Athu agasue asendesele guzawuga muta wa Yordane. Hakhalele fumu mutshigina guzawuga, wahanele Barzilayi beze, watogele Nzambi ha gumukuatesa. Barzilayi wavutugile gumbo dienji.
40 Tangua fumu wazawugile ha guya gu Gilegale, Kimehame wazawugile n’enji. Athu agasue a gu Yuda nu ndambo ya athu a gu Isalele atualele fumu ha guzawuga.
41 Gungima enya Isalele ako ajile muwambela fumu egi: “Mukunda natshi aphangi’etu a gu Yuda akuyi fumi’etu azawuga n’enji muta wa Yordane nu enya fami yenji nu athu enji agasue?”
42 Enya Yuda agasue avutuile mala a Isalele egi: “Handaga fumu udi mukuaku’etu. Mukunda natshi mudi muvua khabu? Fumu gatuhanelego nga gima gimoshi gia gudia, gatuhanelego nji nga kado gamoshi.”
43 Uvi mala a gu Isalele awambelele mala a gu Yuda egi: “Esue tudi nu iphuta kumi. Esue tudi naye gutshita ngenyi mukunda nu Davidi gubalega enue. Mukunda natshi muatusegulula? Esue tuakhadi naye gukhala athu a thomo ha guvutula fumu.” Uvi mbimbi jiazuelele enya Yuda jiakhalele jiabonga gubalega jia mala a gu Isalele.
Mbimbi goshi'a diyiji
^ Mu Hebelu: “wahaga masaga.” Tala Ukoteleshi wa Mbimbi (Masaga).
^ Nga “ahuluishiwe.”
^ Mu Hebelu: “mudi ifuwa yami nu misunyi yami.”
^ Mu Hebelu: “udi ifuwa yami nu misunyi yami.”
^ Nga ndo yajiya gukhala egi: “ azawugile.”
^ Nga ndo yajiya gukhala egi: “ hakatugile muene.”
