Mukanda wa Mbadi wa Samuele 2:1-32
2 Gungima Davidi wahudile Yehowa egi: “Nguya mukhala mu dimbo dimoshi mukatshi dia membo a mu mavu a Yuda ba?” Yehowa wamuvutuile egi: “Ayi, nda.” Davidi wamuhudile luko egi: “Nguya mu dimbo ditshi?” Muene wamuvutudile egi: “Gu Hebrone.”
2 Davidi wayile gu Hebrone nu akaji’enji mbadi, Ahinoama wa gu Yizelele nu Abigayile, munu wakhalele thomo mukaji’a Nabale muenya gu Karmele.
3 Davidi wayile nji nu masuta enji agasue; muthu wagasue wayile nu enya fami yenji. Ayile mukhala mu membo adi hehi nu Hebrone.
4 Gungima mala a gu Yuda ajile gu Hebrone, ambile Davidi maji ha gubua fumu wa giphuta giawo.
Amuwambelele egi: “Masuta a gu Yabeshe ya gu Gileade, ene afundjile Saula.”
5 Davidi watumile athu ha guya muwambela enya gu Yabeshe ya gu Gileade egi: “Yehowa amishimbige handaga muamonesa guzumba guavula gudi fumi’enu Saula luholo muamufundjile.
6 Yehowa alandule gumimonesela guzumba gua giamatshidia tangua diagasue. Ame nji mbangumimonesela gisemo mukunda nu ndaga muakalagala.
7 Henyaha khalenu nu ngolo, mulebigo muila. Fumi’enu Saula wafui, uvi enya Yuda angumbi maji ha gubua fumu wa giphuta giawo.”
8 Uvi Abnere mun’a Nere, fumi’a masuta a Saula, wazudile Ishiboshete mun’a Saula, wazawugile n’enji muta,* wayile n’enji gu Mahanayime.
9 Wamubuishile fumu wa enya Gileade, nu wa enya Ashure, nu wa enya Yizelele, nu wa enya Efrayime, nu wa enya giphuta gia Benjame, nu wa enya Isalele agasue.
10 Ishiboshete mun’a Saula wakhalele nu ivo 40 habuile muene fumu gu Isalele, wahinyine ivo mbadi. Uvi enya giphuta gia Yuda akhalele gu khanda ya Davidi.
11 Davidi wakhalele fumu wa enya giphuta gia Yuda gu Hebrone ivo sambadi nu mbeji samano.
12 Gungima Abnere mun’a Nere nu masuta a Ishiboshete mun’a Saula, akatugile gu Mahanayime, ayile gu Gibeona.
13 Yoabe mun’a Seluya nu masuta a Davidi ayile nu guwenda. Ataganele nu masuta a Ishiboshete gu gijiba gia meya gia gu Gibeona; akhalele wawa sambua didi dia gijiba, ako sambua dinyi.
14 Gungima, Abnere wawambelele Yoabe egi: “Tutume mavuala a mala alue gutuama dietu.” Yoabe wamuvutuile egi: “Gima ndo, alue.”
15 Mavuala ene ajile, a atangele: Mu giphuta gia Benjame gu khanda ya Ishiboshete mun’a Saula, akhalele masuta 12; gu khanda ya Davidi akhalele nji masuta 12.
16 Suta nu suta diakuatele suta n’a muko gu muto, wamutuile phogo ya khusa mu mbebe. Mukut’awo agasue afuile. Gishina giene fundo diene dia gu Gibeona diana tamegewa egi Helekate-Hasulima.*
17 Ita yakolele lusugu luene. Gungima masuta a Davidi abingile Abnere nu masuta a gu Isalele.
18 Ana a Seluya thathu a mala akhalele hene: Yoabe, Abishayi nu Asaele. Asaele wakhalele nu phushi jiavula, wakhalele nu misende yaleluga gifua gaseshi mu temu.
19 Asaele wakhalele mulandula Abnere phushi. Gayilego nga gu koko dia madia nga gu koko dia mahidi.
20 Tangua Abnere wabalumugile gungima, wamuhudile egi: “Asaele, yonu aye ba?” Muene wamuvutuile egi: “Ayi ame.”
21 Abnere wamuwambelele egi: “Bemba gungulandula. Nda gu koko dia madia nga dia mahidi, kuata suta diagasue watshigina, uzangule ima yagasue idi nayo muene.” Uvi Asaele watunyile, wayile nu gumulandula.
22 Abnere wawambelele luko Asaele egi: “Bemba gungulandula! Gula ngagushiya, luholo lutshi mbangutala luko phala ya phangi’aye Yoabe?”
23 Uvi Asaele watunyile. Hene Abnere wamutuile sungu-sungu ya mulumbu mu vumo. Mulumbu wene wamukubuile vumo, wazogele gu kunda; Asaele wabuile hashi, wafuile. Muthu wagasue wakhalele muheta fundo diakhalele kimbi gienji, wakhalele mumagana.
24 Yoabe nu Abishayi alanduile guhata Abnere. Hashiwugile tangua, ahetele gu gamulundu ga Ama gadi ha sambua dia Giya, mu njila ya mavu a luselenga a Gibeona.
25 Masuta a enya Benjame adibungishile fundo dimoshi gungima dia Abnere, abuile thundu imoshi. Amaganele holu dia gamulundu gamoshi ngenyi.
26 Abnere watamegele Yoabe, wamuhudile egi: “Uu nu tangua ditshi mbawulandula guluisa athu nu phogo ya khusa? Ushigo mujiya egi ndaga eyi mbayibata malamba avula? Itshi udi munenga ha guwambela athu aye ha gubemba gulandula aphangi’awo?”
27 Yoabe wamuvutudile egi: “Ngudi guguwambela giamatshidia mu jina dia Nzambi wa giamatshidia udi nu monyo egi, nga wazuelelego ndaga eyi nga masuta ami mbaashigo mubemba gulandula aphangi’awo uu nu mu gimenegena.”
28 Gungima Yoabe washigile phungi, masuta enji abembele gulandula masuta a enya Isalele. Ita yahuile.
29 Abnere nu masuta enji ayile nu guwenda phipha inyi yagasue. Abalegele gu Araba, azawugile muta wa Yordane. Akandugile bengi* dinyi diagasue, gungima ahetele gu Mahanayime.
30 Tangua Yoabe wabembele gulandula Abnere, wabungishile masuta agasue fundo dimoshi. Uvi, Asaele nu masuta ako a Davidi 19 akhalele ndo guene.
31 Masuta a Davidi abingile masuta a enya Benjame nu masuta a Abnere. Ashiyile masuta awo 360.
32 Azudile kimbi gia Asaele, amufundjile mu malumba a sh’enji adi gu Beteleheme. Gungima Yoabe nu masuta enji awendele phipha-phipha, ahetele gu Hebrone mu gimenegena giagasue.
Mbimbi goshi'a diyiji
^ Yakotelesa egi: Muta wa Yordane.
^ Yakotelesa egi: “dihia dia phogo jia khusa.”
^ Nga ndo, yajiya gukhala egi: “Bitolona.”
