Mukanda wa Mbadi wa Samuele 20:1-26
20 Guakhalele nu muthu mumoshi wakhalele muzola nguma, jina dienji Sheba mun’a Bikri, muenya giphuta gia Benjame. Washigile phungi, wazuelele egi: “Tushigo nu khapho nu Davidi, mbatushigo nji musalela ima ya mun’a Yese. Oo Isalele, muthu nu muthu avutuge gudi nzambi* jienji!”
2 Mala agasue a gu Isalele abembele gulandula Davidi, asendesele gulandula Sheba mun’a Bikri. Uvi mala a gu Yuda asalele nu fumi’awo, ayile gumutuala sendese gu Yordane uu nu gu Yelusalema.
3 Tangua Davidi wavutugile gumbo dienji gu Yelusalema, wazanguile akaji’enji ako kumi anyi asalele mutalela inzo,* waahagele mu inzo imoshi; wahagela athu ha guatalela. Wakhalele guahana ima ya gudia uvi gabungishilego luko nawo muila. Akhalele hakhawo mu inzo yene uu nu gu gufua guawo. Akhalele gifua akhetu a gafunda ikhale mulumi’awo wakhalele nu monyo.
4 Gungima fumu wawambelele Amasa egi: “Ngaguhua masugu thathu ha gutamega mala a gu Yuda ha guza haha gudi ame. Aye nji udi naye gukhala hene.”
5 Amasa wayile mutamega mala a gu Yuda, uvi walalegele, gajilego mu tangua dia muhagewe.
6 Hene Davidi wawambelele Abishayi egi: “Sheba mun’a Bikri wajiya gutukalagala ndaga yabola gubalega inyi yatukalegele Abasaloma. Zula masuta ami, mulandulenu. Gula ndo wajiya gudisuega mu membo adi nu ibayi yakola nu wajiya gulenga ha mago etu.”
7 Gungima athu a Yoabe nu enya Kerete nu enya Phelete nu masuta agasue a ngolo, akatugile gu Yelusalema, ayile n’enji ha gulandula Sheba mun’a Bikri.
8 Tangua ahetele hehi nu seso diakoma dia gu Gibeona, Amasa wajile guatagana. Yoabe wakhalele wasudiga gale milele yenji ya ita, phogo yenji ya khusa yakhalele mu gindalo ha kete. Hasuenele muene hehi nu Amasa, phogo yenji ya khusa yabuile.
9 Yoabe wahudile Amasa egi: “Mun’etu udi muabonga?” Gungima wamukuatele gu wevu nu koko dienji dia madia gifua muthu udi mutshigina gumuhana beze.
10 Amasa gadisageselego mukunda nu phogo ya khusa yakhalele gu koko dia Yoabe. Yoabe wamutuile nayo mu vumo, mala enji azogele abuile mu mavu. Yoabe gakhalelego nu funu ya gutua Amasa phogo ya khusa mbala ya mbadi handaga wafuile mbala imoshi. Gungima Yoabe nu phangi’enji Abishayi alanduile Sheba mun’a Bikri.
11 Suta mumoshi wa Yoabe wa muvuala wamagenele hehi nu kimbi gia Amasa, wakhalele muzuela egi: “Athu agasue adi gu khanda ya Yoabe nu athu a Davidi alandule Yoabe!”
12 Mu tangua diene Amasa wakhalele wa gubanda holu dia mahatshi enji mukatshi dia njila. Muvuala muene wamonele egi athu agasue akhalele mubalega, akhalele mumagana ha fundo diene. Hene wakatuile Amasa mu njila, wamumba mu dihia; gungima wamutshuigile mulele.
13 Tangua diakatudile muene Amasa mu njila, athu agasue alanduile Yoabe, ayile muhata Sheba mun’a Bikri.
14 Sheba wabalegele mu iphuta yagasue ya Isalele uu nu gu dimbo dia Abele-Bete-Maka. Enya fami ya Bikri adibungishile, amulanduile.
15 Yoabe nu athu enji ajile mubandemena dimbo dia Abele-Bete-Maka ha gukuata Sheba. Dimbo diene diakhalele diagujietesa nu mavu alondewe gifua ga mulundu mu khulo ya gibayi. Hene Yoabe nu athu enji alondele misonga ya mavu hagula yaakuatese ha guheta gu gibayi gia dimbo diene. Athu agasue akhalele nu Yoabe asendesele gubula gibayi hagula agibuise.
16 Mukhetu mumoshi watema wazuelele mu dijui diakola mu dimbo egi: “Mala, tegelelenu! Tegelelenu! Ngabuba, wambelenu Yoabe aze, ngudi nu gima gia gumuwambela.”
17 Yoabe wayile hehi nu mukhetu muene. Mukhetu muene wamuhudile egi: “Aye Yoabe?” Muene wamuvutuile egi: “Ayi, ame.” Mukhetu muene wazuelele egi: “Fumu, tegelela mbimbi ngudi mutshigina guzuela.” Yoabe wamuvutuile egi: “Zuela.”
18 Mukhetu muene wazuelele luko egi: “Mu tangua dikulu akhalele muzuela egi: ‘Gula athu adi mutshigina gulonda mulonga, atoge malongo mu dimbo dia Abele hagula mulonga wawo uhue.’
19 Ngudi mumoneshi wa athu adi agujinginyina nu ana kamba guhuima gu Isalele. Aye udi mukamba gushiya dimbo didi gifua mama gu Isalele. Mukunda natshi udi mutshigina gutotesa khapho diatuhanele Yehowa?”
20 Yoabe wamuvutuile egi: “Ngushigo nu matangi a gushiya dimbo edi nga guditotesa.
21 Ishigo ngenyi nga hazonda. Uvi tuaji mukamba muthu mumoshi jina dienji Sheba mun’a Bikri, wana khala gu khanda ya milundu ya Efrayime. Walumbugila fumu Davidi; gula muatuhana n’enji, tudi muya getu.” Mukhetu muene wawambelele Yoabe egi: “Magana! Tudi gumisonuela muto wenji holu dia gibayi!”
22 Mukhetu muene wayile mbala imoshi muwambela athu agasue a mu dimbo nu gutema guagasue; abatuile muto wa Sheba mun’a Bikri, awusonuele gudi Yoabe. Yoabe washigile phungi, masuta enji akatugile mu dimbo diene; muthu nu muthu wavutugile gu inzo yenji. Yoabe wavutugile gu Yelusalema gumbo dia fumu.
23 Mu tangua diene, Yoabe wakhalele fumu wa masuta agasue gu Isalele; Benaya mun’a Yoyada wakhalele fumu wa enya Kerete nu enya Phelete.
24 Adolama wakhalele fumu wa athu akhalele mutumiwa ha gutshita midimo gu ngolo. Yosafata mun’a Ahiluda muene wakhalele musonega milonga.
25 Sheva wakhalele sekretere. Zadoke nu Abiatare akhalele nganga-nzambi.
26 Ira mujigulu wa Yayile wabuile nji mutuameji wakoma gu mudimo* wa Davidi.
Mbimbi goshi'a diyiji
^ Nga ndo yajiya gukhala egi: “mu tenta.”
^ Nga “inzo ya fumu.”
^ Mu Hebelu: “wabuile nganga-nzambi.”
