Mukanda wa Mbadi wa Samuele 21:1-22
21 Hakhalele Davidi fumu, nzala yanginyile mu gifutshi, yatshitshile ivo thathu. Davidi wahudile Yehowa, Yehowa wamuwambelele egi: “Saula nu enya fami yenji atshitshile gubola, handaga ashiyile enya Gibeona.”
2 Fumu watamegele enya Gibeona ha guta nawo maga. (Enya Gibeona akhalelego enya Isalele, uvi akhalele enya Amole anyi asalele nu monyo. Enya Isalele adilogele egi mbaashigo guashiya, uvi Saula watshiginyile guashiya mukut’awo agasue handaga wakhalele nu nzala yakola ya gukuatesa enya Isalele nu enya Yuda.)
3 Davidi wahudile enya Gibeona egi: “Itshi ngajiya gutshita mukunda nu enue? Luholo lutshi ngajiya gukatula gubola amikalegele hagula mukombelele Yehowa akuatese athu enji?”
4 Enya Gibeona amuvutuile egi: “Tushigo mutoga utadi wa siliva nga wolo mukunda nu gubola Saula nu fami yenji atukalegele; tushigo nji mushiya nga muthu mumoshi gu Isalele.” Davidi waawambelele egi: “Ndaga yagasue muanguwambela, mbangudi guyitshita.”
5 Ene awambelele fumu egi: “Muthu munu watshiginyile gutumanesela nu watshiginyile egi nga muthu mumoshi mukatshi dietu gasadigo nu monyo mu mafundo agasue a gu Isalele,
6 tuhane an’enji sambadi. Mbatuzenzelesa imbi yawo* gutuama dia Yehowa gu Gibea, dimbo dia Saula munu Yehowa watombele.” Fumu waawambelele egi: “Ngudi gumihana nawo.”
7 Uvi fumu wavuile khenda mukunda nu Mefiboshete mujigulu wa Saula, mun’a Yonatana; handaga Davidi nu Yonatana mun’a Saula akotele gikotelo gutuama dia Yehowa.
8 Fumu wazudile Alemoni nu Mefiboshete ana mbadi a Rispa mun’a Aya anyi avualele muene nu Saula, nu ana thano a Mikale* mun’a Saula anyi avualele muene nu Adriyele mun’a Barzilayi muenya gu Mehola.
9 Gungima Davidi waahanele gudi enya Gibeona. Enya Gibeona azenzelesele imbi yawo gu mulundu gutuama dia Yehowa. Mukut’awo agasue sambadi afuile hamoshi. A ashiyile mu lusugu lua thomo lua gukatula mbuto, mu gisendeselo gia sungi ya gukatula mbuto jia orje.
10 Gungima Rispa mun’a Aya wazudile sagi ya ngombo, wayihagele holu dia seso sendese gu gisendeselo gia sungi ya gukatula mbuto uu nu tangua mvula yajile munogela imbi yene. Mu muanya wakhalele mukaya tunjila hagula tubuilago imbi yene, mu phipha wakhalele mukaya shitu jia mu foto jiakhalele musuena hehi.
11 Awambelele Davidi ndaga jiakhalele mutshita Rispa mun’a Aya mukaji’a Saula muko.
12 Davidi wayile gudi mafumu* a gu Yabeshe ya gu Gileade ha guzula ifuwa ya Saula nu ya mun’enji Yonatana. Tangua enya Filistiya ashiyile Saula gu Gileboa, azenzelesele kimbi gienji nu gia mun’enji Yonatana ha fundo dia athu avula dia gu Bete-Shana. Uvi mafumu a gu Yabeshe ya gu Gileade ayile mukuya imbi yene.
13 Davidi wazudile ifuwa ya Saula nu ya Yonatana, wazudile nji ifuwa ya athu ashiyiwe.
14 Gungima afundjile ifuwa ya Saula nu ya mun’enji Yonatana mu malumba a Kishi sh’a Saula mu mavu a enya Benjame gu Zela. Hatshitshile ene ndaga jiagasue jiaawambelele fumu, Nzambi wavuile isambu yatshitshile ene mukunda nu gifutshi.
15 Ita yazogele luko mukatshi dia enya Filistiya nu enya Isalele. Davidi nu masuta enji ayile mulua nu enya Filistiya, uvi Davidi wahuidile.
16 Mujigulu wa Refayime mumoshi jina dienji Yishibi-Benoba wakhalele mutshigina gushiya Davidi. Wakhalele nu mulumbu wa kuivre wakhalele gunema bashekele 300.* Wakhalele nji nu phogo ya khusa ihe-ihe.
17 Abishayi mun’a Seluya wayile mbala imoshi ha gumukuatesa. Wabetele muenya Filistiya muene, wamushiyile. Mu tangua diene, masuta a Davidi amuwambelele* egi: “Mbawushigo luko muya nu esue gu ita! Ushigo naye gujima muenda wa Isalele!”
18 Gungima, ita yazogele luko nu enya Filistiya gu Goba. Mu tangua diene, Sibekayi muenya gu Husha washiyile Safe mujigulu wa Refayime.
19 Ita yazogele luko nu enya Filistiya gu Goba, Elehanana mun’a Yayile-Olegime muenya gu Beteleheme washiyile Goliyate muenya gu Gate. Goliyate muene wakhalele nu mulumbu wakoma gifua mutshi ana haga wanda ha gutunga milele.
20 Ita yazogele nji gu Gate. Guakhalele nu yala mumoshi guene wakhalele diago waleha; wakhalele nu mino 6 gu koko nu koko. Kulu nu kulu diakhalele nji nu mino 6. Mino yenji ya gu mago nu gu malu yakhalele 24. Muene nji wakhalele mujigulu wa Refayime.
21 Walanduile gukambela enya Isalele nguma. Hene Yonatana mun’a Shimeyi phangi’a Davidi wamushiyile.
22 Athu awa nguana akhalele ajigulu a Refayime gu Gate. Davidi nu masuta enji a ashiyile mukut’awo agasue.
Mbimbi goshi'a diyiji
^ Mu Hebelu: “Mbatuazenzelesa, mago nu malu agubogola.”
^ Nga ndo yajiya gukhala egi: “Merabe.”
^ Nga ndo yajiya gukhala egi: “afumi’a mavu.”
^ Ha mutango wa bakilo 3,42. Tala App. B14.
^ Mu Hebelu: “ adilogele.”
