Mukanda wa Mbadi wa Samuele 22:1-51
22 Tangua Yehowa wahuluishile Davidi ha mago a mbalagaji jienji jiagasue nu ha mago a Saula, Davidi wayimbidile Yehowa lungimbo.
2 Wazuelele egi:
“Yehowa udi seso diami, fundo diami dia gudisuegela; muene wana gunguhuluisa.
3 Nzambi wami udi seso diami, udi fundo ngana gudibamba,Tshibu yami, udi lumbinga* luami luana huluisa;* udi fundo diami diabonga dia gudisuega,Muene udi fundo diami dia gulengela, muhuluishi wami; aye wana gunguhuluisa mu ndaga jiagasue jia khuta.
4 Ngudi mutoga ukuateshi gudi Yehowa, muene udi watagana ha gutumbuishiwa,Muene mbawunguhuluisa gudi mbalagaji jiami.
5 Matshipha-tshipha a gufua angujietele;Athu agituhu adi gifua muta udi mufuafuela anguhanele woma.
6 Shinga jia malumba* jiangujietele;Gufua guangutele muheto gutuama diami.
7 Tangua ngakhalele mu lamba, ngatogele ukuateshi gudi Yehowa,Ngalanduile gutoga ukuateshi gudi Nzambi wami.
Muene wavuile dijui diami gu tempelo yenji,Tangua ngadidile ha gukamba ukuateshi, wavuile.*
8 Mavu asendesele gudikuma, adigitshile khanda nu khanda;Fondasio jia mu dilu jiadigitshile,Jiadinyigishile khanda nu khanda handaga muene wavuile khabu.
9 Mishi yazogele mu mazulu enji,Tshuya tuabala tuazogele mu kano dienji;Makala a tshuya azogele gudi muene.
10 Tangua diabulumugile muene, wafuguile dilu,Phipha yakola yakhalele goshi’a ikanzo yenji.
11 Wanginyile holu dia sheribe, wakhalele muza nu guzuga.
Amumonele holu dia mahambu a muanjelo.*
12 Waditshuigile phipha gifua tentaNu meya abuita nu matuta abuita.
13 Makala a tshuya akhalele muzoga mu kiajiji giakhalele gutuama dienji.
14 Yehowa wabalele gifua muandu wa mvula mu dilu;Dijui dia Muthu wa Gudinyinyiga diavuiwe.
15 Wasonuene mifula yenji, mbalagaji jiamuanganele;Guhenya gua mvula guaabuishile tunga-tunga.
16 Gishegele gia goshi’a kianga giamonegele;Ba fondasio a mavu azogele haphelo tangua Yehowa wabalele,Nu tangua diafujile muene muhehe mu mazulu enji.
17 Wasunuine koko dienji mu dilu, wangukuatele;Wanguzolele mu jinga dia meya.
18 Wanguhuluishile ha mago a mbalagaji mumoshi wa ngolo,Nu ha mago a mbalagaji jiami jinyi jiakhalele nu ngolo jiavula gungubalega.
19 Anguluishile tangua ngakhalele mu lamba,Uvi Yehowa wangukuatesele.
20 Wangutualele ha fundo dia ubambi;Wanguhuluishile handaga wakhalele gunguzumba.
21 Yehowa wanguhana lufuto mukunda nu ndaga jiabonga ngakalegele;Wanguhana lufuto handaga mago ami akalegelego ndaga yabola.*
22 Handaga ngalanduile muabonga njila jia Yehowa;Ngatunyilego Nzambi wami nga hazonda.
23 Ngana tumagela mikhuala yenji;Mbangushigo mubemba mikhuala yene nga hazonda.
24 Mbangukhadigo nu ditona gutuama dienji;Mbangutshita yagasue ha gutuna gutshita gubola.
25 Yehowa anguhane lufuto mukunda nu ndaga jiabonga ngakalegele,Anguhane lufuto handaga ngushigo nu gubola gutuama dienji.
26 Wana khala ya gujinginyina gudi muthu udi ya gujinginyina gudi aye;Wana kalagala ndaga jiabonga gudi muthu wabonga.
27 Aye wana khala waphelegeta gudi muthu waphelegeta,Uvi wana monesa gutema gudi muthu wabola.
28 Handaga aye wana huluisa athu ana gudibulumuisa,Uvi wana suanguluga ndo nu enya lulendo nu wana guabulumuisa.
29 Oo Yehowa, udi muenda wami;Yehowa wana hana kiajiji mu phipha yami.
30 Mu ukuateshi waye, ngajiya guluisa thundu jia nzangi;Mu ngolo jia Nzambi, ngajiya gukanduga gibayi.
31 Njila ya Nzambi wa giamatshidia idi yatagana;Mbimbi ya Yehowa idi yaphelegeta.
Muene udi tshibu mukunda nu athu agasue ana gulengela gudi muene.
32 Handaga gula Yehowa ndo, Nzambi muko nanyi?
Nanyi muko udi seso gifua Nzambi wetu?
33 Nzambi wa giamatshidia udi gibayi giami giakola,Muene mbawulondega njila yami muabonga.
34 Muene udi mubuisa malu ami gifua malu a gabaji;Muene udi gungumagenesa holu dia tumilundu.
35 Muene udi mulongesa mago ami ha gulua ita;Mago ami ajiya gufugula uta wa manana wa kuivre.
36 Wanguhana tshibu yaye ha gunguhuluisa,Gudibulumuisa guaye guana gungubuisa muthu wakoma.
37 Udi gungukomesela njilaHagula malu ami akhakhugago.
38 Mbangulandula mbalagaji jiami, mbanguashiya mukut’awo agasue;Mbangushigo muvutuga gula ngaamaneselego.
39 Mbanguamanesela, mbanguasasumuna hagula azugigo luko;Ene mbaabua, ame mbanguadiata nu ikanzo yami.
40 Mbawunguhana ngolo ha gulua ita;Mbawubuisa mbalagaji jiami gutuama diami.
41 Mbawulengesa mbalagaji jiami gutuama diami;Athu agasue ana khala nu umbalagaji nu ame, mbanguashiya.
42 Adi mukamba ukuateshi uvi gushigo nga muthu wa guahuluisa;Adi mutamega nji Yehowa, uvi muene gashigo mutaya.
43 Mbanguabuisa gifua fuphi ya mavu;Mbanguasasumuna, mbanguadiata gifua ithotho mu bala-bala.
44 Mbawunguhuluisa ha mago a athu ami anyi ana zuela ndaga jiabola mukunda nu ame.
Mbawungubamba hagula ngukhale fumu wa ifutshi;Athu anyi ngushigo mujiya mbaabua enya mudimo ami.
45 Athu a ifutshi iko mbaaza mufugama gutuama diami;Ndaga mbaavua mukunda nu ame, mbajiatuma ha gungutumagela.*
46 Athu a ifutshi iko mbaaleba muila;Mbaazoga mu mafundo adisuegele ha gudibamba nu gudigita.
47 Yehowa udi nu monyo! Seso diami ditumbuishiwe!
Nzambi udi seso diami diana gunguhuluisa, atumbuishiwe!
48 Nzambi wa giamatshidia wavutula gubola gudi mbalagaji jiami;Wahaga athu goshi’a ikanzo yami hagula nguahinyine;
49 Muene wanguhuluisa ha mago a mbalagaji jiami.
Aye wanguhaga holu dia athu adi gunguluisa;Wanguhuluisa ha mago a mbundudi.
50 Oo Yehowa, gishina giene mbanguguhana mersi mukatshi dia ifutshi,Mbanguyimba ngimbo* ha gutumbuisa jina diaye:
51 Muene udi mutshita ndaga jiakoma ha guhuluisa fumu wenji;Udi mumonesa guzumba gua giamatshidia mayilago gudi muthu watombele muene,Gudi Davidi nu vungu* dienji.”
Mbimbi goshi'a diyiji
^ Tala Ukoteleshi wa Mbimbi.
^ Nga “ muhuluishi wami wa ngolo.”
^ Nga “Sheole,” yakotelesa egi, fundo ana funda athu agasue. Tala Ukoteleshi wa Mbimbi (Malumba).
^ Mu Hebelu: “matshui enji avuile.”
^ Nga “mahambu a muhehe.”
^ Mu Hebelu: “mago ami akhalele aphelegeta.”
^ Mu Hebelu: “mbaangutumagela mukunda nu ndaga mbaadivuila gu matshui.”
^ Nga “mbangushiga miziki.”
^ Mu Hebelu: “mbuto.”
