Mukanda wa Mbadi wa Samuele 23:1-39
23 Eji mbimbi jia gisugishilo jia Davidi:
“Mbimbi jia Davidi mun’a Yese,Mbimbi jia muthu wahanewe lutumbu,Muthu Nzambi wa Yakoba watombele ha gukhala fumu,Muyimbi wabonga wa ngimbo* jia gu Isalele.
2 Nyuma ya Yehowa yazuelele mu njila yami;Mbimbi yenji yakhalele ha ludimi luami.
3 Nzambi wa Isalele wazuelele;Seso dia Isalele dianguwambelele egi:
‘Gula muthu udi muhinyina athu udi muthu wabongaNu udi muhinyina nu woma wa Nzambi,
4 idi gifua muanya wa gimenegena hana zoga kumbi,Idi gifua mu gimenegena tangua gosa gushigo nu matuta,Gifua muanya wana zoga gungima dia mvula,Wana zola muangu ha mavu.
5 Fami yami idi nji ngenyi gutuama dia Nzambi,Handaga wakotele gikotelo gia mayilago nu ame;Walondele ndaga jiagasue, mbajishigo musombegesa.
Gikotelo giene gidi gunguhuluisa diago nu gidi gungusuanguluisa.
Gishina giene mbawutaganesa diago gikotelo giene.
6 Uvi athu abola aheya agasue mbaabishidiwa gifua tumitshi tua miya,Handaga muthu gajiyilego guyikuata nu koko.
7 Gula muthu udi mutshigina guyikuata,Udi naye gukhala nu ikadigilo ya utadi nu mutshi wa mulumbu;Adi naye guyikonda tshuya ha fundo idi.”
8 Wawa majina a masuta a ngolo a Davidi: Yosheba-Bashebeta muenya gu Hakemoni; wakhalele fumu wa masuta thathu. Mu tangua dimoshi, washiyile athu 800 nu mulumbu wenji.
9 Suta dia mbadi diakhalele Eleazale mujigulu wa Ahohi, mun’a Dodo. Wakhalele mukatshi dia masuta thathu a ngolo anyi ayile nu Davidi mukambela enya Filistiya nguma. Enya Filistiya adibungishile ha guluisa enya Isalele, uvi tangua masuta a Isalele avutugile gungima,
10 Eleazale wamaganele, walanduile gushiya enya Filistiya uu nu tangua koko diamuholele; koko diamumaganele tshididi handaga wakuatele phogo ya khusa muavula. Mu lusugu luene, Yehowa waakuatesele ha gubinga.* Gungima masuta alanduile Eleazale ha guzula ima ya enya Filistiya anyi afuile.
11 Suta dia thathu diakhalele Shama mun’a Aga muenya Halalite. Enya Filistiya adibungishile gu Lehi fundo diakhalele dihia dia guzala nu makunde. Masuta alengele mukunda nu enya Filistiya.
12 Uvi muene wamaganele mukatshi dia gilanga giene. Waluile hagula gilanga giene gitambudiwago, washiyile enya Filistiya; Yehowa waakuatesele ha gubinga.*
13 Mu sungi yagukatula mbuto, mafumu thathu mukatshi dia mafumu 30 ayile musanga Davidi gu wina dia seso dia Adulama. Thundu ya masuta a enya Filistiya ahagele phundo yawo mu baba dia Refayime.
14 Davidi wakhalele fundo diayile gudisuega muene. Thundu imoshi ya masuta a enya Filistiya akhalele gu Beteleheme.
15 Gungima Davidi wavuile luhungu,* wazuelele egi: “Gula nga ngudi nu meya a mu wina didi hehi nu mufulo wa Beteleheme, nga ngudi munua gami!”
16 Hene masuta thathu a ngolo anginyile mu phundo ya enya Filistiya gu ngolo, athayele meya a mu wina diakhalele hehi nu mufulo wa Beteleheme, a abatele gudi Davidi. Uvi muene watunyile gunua meya ene, waabundudile gutuama dia Yehowa.
17 Wazuelele egi: “Oo Yehowa, ngajiyilego nga hazonda gutshita ndaga eyi! Ngajiyilego gunua meya awa, adi gifua mahatshi a athu ayi mumba monyo wawo mu gingonza.” Watunyile gunua meya ene. Eji ndaga jiakalegele masuta a Davidi thathu a ngolo.
18 Abishayi phangi’a Yoabe mun’a Seluya wakhalele fumu wa masuta ako thathu. Lusugu lumoshi washiyile athu 300 nu mulumbu wenji. Muene nji wajiyiwe muavula gifua masuta a Davidi thathu a ngolo.
19 Abishayi wakhalele nu lutumbu luavula gubalega masuta ako thathu a mu thundu yakhalele mutuameza muene, wakhalele nji fumi’awo. Uvi gahetelego mu ndonga ya masuta a Davidi thathu a ngolo.
20 Benaya mun’a Yoyada wakhalele muenya gikhesa.* Wakalegele ndaga jiavula jia gushimana gu Kabesele. Washiyile ana mbadi a mala a Ariele muenya gu Moaba, gungima wanginyile mu wina dia meya mu lusugu luakhalele munoga neje ha gushiya khoshi.
21 Washiyile nji muenya Ejipitu mumoshi wakhalele waleha diago. Muenya Ejipitu muene wakhalele nu mulumbu ha koko dienji, uvi Benaya wayile gumuluisa nu mutshi. Watambuile mulumbu wakhalele ha mago a muenya Ejipitu muene, wamushiyile nawo.
22 Jiji ndaga jiakalegele Benaya mun’a Yoyada. Wakhalele nji mujiyiwa muavula gifua masuta a Davidi thathu a ngolo.
23 Ikhale wakhalele nu lutumbu luavula gubalega masuta 30, uvi gahetelego mu ndonga ya masuta a Davidi thathu a ngolo. Uvi Davidi wamutombele ha gukhala fumu wa masuta akhalele gumubamba.
24 Asaele phangi’a Yoabe wakhalele mukatshi dia masuta 30. Majina a masuta ene enyawa: Elehanana mun’a Dodo wa gu Beteleheme,
25 Shama muenya Halode nu Elika muenya Halode,
26 Helese muenya gu Phalete, Ira mun’a Ikeshi muenya gu Tekoa,
27 Abiezele muenya gu Anatota, Mebunayi muenya gu Husha,
28 Salemona muenya gu Ahohi, Mahalayi muenya gu Netofa,
29 Helebe mun’a Bana muenya gu Netofa, Itayi mun’a Ribayi muenya gu Gibea mu mavu a enya Benjame,
30 Benaya muenya gu Philatona, Hidayi muenya mu mababa* a Gashi,
31 Abialabone muenya gu Bete-Araba, Azemavete muenya gu Bahulime,
32 Eliyabe muenya gu Shalebima, ana a Yashene, Yonatana,
33 Shama muenya Halalite, Ahiama mun’a Shalale muenya Halalite,
34 Elifelete mujigulu wa Maka mun’a Ahasabayi, Eliyama mun’a Ahitofele muenya gu Gilo,
35 Heselayi muenya gu Karmele, Phalayi muenya gu Alaba,
36 Yigeyale mun’a Natana muenya gu Soba, Bani muenya mu giphuta gia Gade,
37 Seleke muenya gu Amona, Nahalayi muenya gu Belote munu wakhalele mubata iluilo ya Yoabe mun’a Seluya,
38 Ira muenya gu Iteli, Galebe muenya gu Iteli,
39 nu Uriya muenya Hete. Mukut’awo agasue akhalele 37.
Mbimbi goshi'a diyiji
^ Nga “ Muyimbi wa ngimbo athu akhalele muzumba gu Isalele.
^ Nga “waahuluishile.”
^ Nga “waahuluishile.”
^ Nga “phuila.”
^ Mu Hebelu: “mun’a muenya ngolo.”
^ Tala Ukoteleshi wa Mbimbi (Baba).
