Mukanda wa Mbadi wa Samuele 24:1-25
24 Yehowa wavidile luko enya Isalele khabu tangua muthu mumoshi watumile Davidi* ha gutshitshila enya Isalele ndaga yabola. Wawambelele Davidi egi: “Nda utange enya Isalele nu enya Yuda.”
2 Fumu Davidi wawambelele Yoabe, fumu wa masuta enji egi: “Ngabuba, nda mu iphuta yagasue ya Isalele sendese gu Dane uu nu gu Belesheba, utange athu hagula ngujiye gula adi guvula gutshi.”
3 Uvi Yoabe wawambelele fumu egi: “Fumu, Yehowa Nzambi waye avudise athu mbala 100; aye hakhaye udimonele ndaga yene nu meso aye. Uvi fumu, mukunda natshi udi mutshigina gukalagala ndaga ya luholo elu?”
4 Uvi fumu watunyile ndaga ya muwambelele Yoabe nu mafumu a masuta. Hene Yoabe nu mafumu a masuta akatugile gutuama dia fumu ayile mutanga athu a gu Isalele.
5 Azawugile Yordane, ahagele phundo yawo gu Aloele, gu sud ya dimbo diana khala mukatshi dia baba, gu khanda ya mavu a enya giphuta gia Gade. Ayile uu nu gu Yazele.
6 Gungima ayile gu Gileade nu mu mavu a Tatime-Hodeshi. Ayile nji gu Dane-Yana, gungima ayile gu Sidona.
7 Gungima ayile gu dimbo dia Tile diakhalele nu ibayi yakola, nu mu membo agasue a enya Hivi nu a enya Kanana. Gu suga, ayile gu Belesheba ya gu Negebe ya mu mavu a enya Yuda.
8 Awendele mu gifutshi giagasue, avutugile gu Yelusalema gungima dia mbeji 9 nu masugu 20.
9 Yoabe wahanele fumu mutango wa athu anyi atangewe. Athu akhalele atagana ha guya gu ita nu phogo ya ita akhalele 800 000 gu Isalele, uvi mala a enya Yuda akhalele 500 000.
10 Uvi gungima dia gutanga athu, mutshima wa Davidi wasendesele gubudiga. Davidi wawambelele Yehowa egi: “Ngatshita gubola guakoma luholo ngatanga athu. Yehowa ngabuba, totesela muenya mudimo waye gubola guenji handaga ngatshitshi ndaga nu guheya guagasue.”
11 Tangua diazugile Davidi mu gimenegena, Yehowa wawambelele profete Gade, muthu wa Davidi wakhalele mumona vizio egi:
12 “Nda uwambele Davidi egi, ‘Yehowa wazuela egi: “Ngudi nu ndola thathu jia guguhana. Tomba ndola imoshi ngudi naye guguhana.”’”
13 Gade wanginyile mu inzo ya Davidi, wamuwambelele egi: “Udi mutshigina nzala ingine mu gifutshi ivo sambadi? Nga udi mutshigina egi ukhale mulenga mbalagaji jiaye mbeji thathu? Nga ndo udi mutshigina egi misongo ya gisambugila ingine mu gifutshi masugu thathu? Tangigiza muabonga hagula nguye nguwambele muthu wangutumi.”
14 Davidi wawambelele Gade egi: “Ngudi nu gikenene giavula. Ngudi mutshigina egi tubue ha mago a Yehowa handaga udi muenya khenda jiavula; uvi ngubuigo ha mago a muthu.”
15 Gungima Yehowa watumine misongo ya gisambugila gu Isalele, sendese mu gimenegena uu nu mu tangua diatombewe. Athu 70 000 afuile sendese gu Dane uu nu gu Belesheba.
16 Tangua muanjelo wasunuine koko ha gushiya Yelusalema, Yehowa wavuile gikenene* mukunda nu lamba diene. Wawambelele muanjelo wakhalele mushiya athu egi: “Guahui! Shigula koko diaye.” Muanjelo wa Yehowa wakhalele hehi nu fundo dia gusuwila* mbuto dia Alauna, muenya Yebuse.
17 Tangua Davidi wamonele muanjelo wakhalele mushiya athu, wawambelele Yehowa egi: “Gubola gudi guami, ame ngatshitshi ndaga yabola. Uvi imeme yiyi yatshita itshi? Ngabuba, nguhane ame ndola nu enya fami ya tata.”
18 Lusugu luene Gade wayile gumbo dia Davidi, wamuwambelele egi: “Kanduga utungile Yehowa giwotshielo ha fundo dia gusuwila mbuto dia Alauna muenya Yebuse.”
19 Davidi watumagele mbimbi ya Yehowa, wakandugile guene gifua muamuwambelele Gade.
20 Tangua Alauna wamonele fumu nu enya mudimo enji muza gudi muene, wayile mbala imoshi guatagana, wafugamele gutuama dia fumu, washiwugile phala mu mavu.
21 Alauna wahudile egi: “Fumu, mukunda natshi waza gumbo diami?” Davidi wamuvutudile egi: “Ngaji musumba fundo diaye dia gusuwila mbuto ha gutungila Yehowa giwotshielo hagula malamba adi mubuila athu ahue.”
22 Uvi Alauna wawambelele Davidi egi: “Fumu, zula gaye fundo diene utshite ndaga yagasue idi yabonga gu meso aye.* Ngombe jiene jiji uhane mulambu wa guwotshia. Mukunda nu khunyi, tudi nu mitshi ya gusuwila mbuto nu mitshi tuana haga ha shingo jia ngombe.
23 Fumu, ima eyi yagasue ngaguhana* nayo.” Gungima, Alauna wawambelele luko fumu egi: “Yehowa Nzambi waye agukuatese.”
24 Uvi fumu wawambelele Alauna egi: “Ndo, ngudigile nayo. Ngajiyilego guhana Yehowa Nzambi wami milambu ya guwetshia yangutelego nga gima.” Hene Davidi wasumbile fundo dia gusuwila mbuto nu ngombe mu bashekele 50 a utadi wa siliva.*
25 Gungima Davidi watungile giwotshielo mukunda nu Yehowa; wahanele milambu ya guwotshia nu milambu ya guhuima. Yehowa wavile isambu atshitshile mukunda nu gifutshi, hene lamba diakhalele mutagana nadio enya Isalele diahuile.
Mbimbi goshi'a diyiji
^ Nga “tangua atumine Davidi.”
^ Nga “wadisagesele.”
^ Nga “gusungunuina.”
^ Nga “ndaga yagasue yagubongela.”
^ Mu Hebelu: “Alauna waguhana.”
^ Shekele imoshi yakhalele bagrame 11,4. Tala App. B14.
