Mukanda wa Mbadi wa Samuele 3:1-39
3 Ita yashiphile mukatshi dia athu akhalele gu khanda ya enya fami ya Saula nu athu akhalele gu khanda ya Davidi. Davidi wakhalele mubua nu ngolo jiavula, uvi athu akhalele gu khanda ya Saula ayile nu guleba.
2 Hakhalele Davidi gu Hebrone, wavualele ana. Mun’enji wa somi jina dienji Amenona, wamuvualele nu Ahinoama wa gu Yizelele.
3 Mun’enji wa mbadi jina dienji Kileabe, gin’enji Abigayile munu wakhalele thomo mukaji’a Nabale, muenya gu Karmele; mun’enji wa thathu jina dienji Abasaloma, gin’enji Maka. Maka wakhalele mun’a fumu Talemayi wa gu Geshule.
4 Mun’enji wa nguana jina dienji Adoniya, gin’enji Hagita; wa thano Shefatia gin’enji Abitale.
5 Mun’enji wa samano jina dienji Yiteleame, gin’enji Egela mukaji’a Davidi muko. Wawa ana avualele Davidi gu Hebrone.
6 Athu akhalele gu khanda ya fami ya Saula nu athu akhalele gu khanda ya Davidi alanduile gulua ita. Mu tangua diene Abnere wakhalele mubua nu ngolo jiavula mukatshi dia athu akhalele gu khanda ya fami ya Saula.
7 Saula wakhalele nu mukhetu muko jina dienji Rispa, wakhalele mun’a Aya. Lusugu lumoshi, Ishiboshete wahudile Abnere egi: “Mukunda natshi wabungishile muila nu mukaji’a* tata?”
8 Abnere wavuile khabu jiakola mukunda nu ndaga jiazuelele Ishiboshete. Wamuhudile egi: “Ame ngudi imbua ya mu mavu a Yuda? Uu nu mangino, ngana khala yagujinginyina gudi fami ya sh’aye Saula, nu gudi aphangi’enji nu mafut’enji; khenji ngaguyidilego giphungi ha guguhana ha mago a Davidi. Uvi mangino udi gunguhula milonga yatadila gubola ngakalegele nu mukhetu.
9 Nzambi anguhane ndola yakola gula ngakalegelego Davidi ndaga Yehowa wadilogele gudi muene egi:
10 mbawukatula ufumu mu fami ya Saula, mbawuwuhana gudi Davidi ha guhinyina Isalele yagasue nu mavu a Yuda, sendese gu Dane uu nu gu Belesheba.”
11 Ishiboshete gawambelelego Abnere nga gima gimoshi handaga wakhalele gumuvuila woma.
12 Abnere watumine mbala imoshi athu ha guya muwambela Davidi egi: “Nanyi udi mutuameza mavu awa?” Wazuelele luko egi: “Tukote gikotelo, ngenyi mbangutshita yagasue* hagula enya Isalele agasue akhale gu khanda yaye.”
13 Davidi wamuvutuile egi: “Idi ndaga yabonga. Mbangukota gikotelo nu aye. Uvi ha gumona phala yami, udi naye thomo gungubatela Mikale mun’a Saula, gula ndo ujigo.”
14 Davidi watumine athu ha guya muwambela Ishiboshete mun’a Saula egi: “Nguhane mukaji’ami Mikale handaga ngahanele ilema 100 ya mila ya uyala ya masuta a enya Filistiya ha gumuzula mu ulo.”
15 Hene Ishiboshete watumine athu ha guya mutambula Mikale gudi mulumi’enji Phaletiele mun’a Layisha.
16 Uvi Phaletiele waalanduile nu gudila uu nu gu Bahulime. Gungima Abnere wamuwambelele egi: “Vutuga!” Hene, wavutugile genji.
17 Mu tangua diene, Abnere watumine akulu a gu Isalele mbimbi egi: “Sendese mualeha muana tshigina egi Davidi abue fumu wenu.
18 Henyaha tangua dia gumubuisa fumu diatagana. Handaga Yehowa wawambelele Davidi egi: ‘Mu njila ya muenya mudimo wami Davidi, mbanguhuluisa athu ami enya Isalele ha mago a enya Filistiya nu ha mago a mbalagaji jiawo jiagasue.’”
19 Abnere watele nji maga nu enya giphuta gia Benjame. Gungima wayile gu Hebrone ha guta maga ene muyadi nu Davidi. Wamuwambelele luholo luadivuile muene nu enya Isalele nu athu agasue a mu giphuta gia Benjame.
20 Tangua Abnere nu mala 20 akhalele n’enji ahetele gu Hebrone, Davidi wakalegele wano mukunda nu ene.
21 Gungima Abnere wawambelele Davidi egi: “Fumu, ngubembe nguye ngubungise enya Isalele agasue ha gukhala gu khanda yaye hagula akote gikotelo nu aye. Ngenyi mbawubua fumu wa enya Isalele agasue.” Hene Davidi wabembele Abnere ha guya mu guhuima.
22 Mu tangua diene, Yoabe nu masuta a Davidi akhalele muza guma ayile mulua ita. Akhalele nu ima yavula atambudile gu ita. Uvi Abnere wakhalele wakatuga gale gu Hebrone, handaga Davidi wamubembele ha guya mu guhuima.
23 Hahetele Yoabe nu masuta agasue akhalele n’enji, muthu mumoshi wawambelele Yoabe egi: “Abnere mun’a Nere waji mutala fumu. Fumu wamubembi ha guvutuga mu guhuima.”
24 Yoabe wayile gudi fumu, wamuwambelele egi: “Ndaga itshi wakalagala? Abnere waza haha, uvi wamubemba, wavutuga mu guhuima! Mukunda natshi?
25 Udi mujiya muabonga Abnere mun’a Nere! Waji ha guguhuiga nu ha gujiya mafundo agasue udi muya nu ndaga jiagasue udi mukalagala.”
26 Yoabe wakatugile gudi Davidi, watumine athu ha gulandula Abnere mu njila. Amukuatele hehi nu wina wa meya wa Sila, avutugile n’enji. Uvi Davidi gakhalelego mujiya nga gima gimoshi.
27 Tangua diavutugile Abnere gu Hebrone, Yoabe wayile n’enji gu khanda mu khulo ya mufulo ha guta n’enji maga mu gisuegi. Uvi gungima wamutuile phogo mu vumo, Abnere wafuile. Yoabe washiyile Abnere handaga muene washiyile phangi’enji* Asaele.
28 Tangua Davidi wavuile ndaga yene, wazuelele egi: “Ame nu ufumu wami tushigo nu gubola nga guazonda gu meso a Yehowa mukunda nu mahatshi a Abnere mun’a Nere.
29 Mahatshi a Abnere akhale ha muto wa Yoabe nu athu agasue a monzo ya sh’enji. Mu indongo yagasue ya fami ya Yoabe, mbangukhala nu mala adi mukata misongo ya gasele,* nga enya hute nga mala adi mutshita mudimo nu mutshi wa gutungila milele,* nga athu mbaashiyiwa gu phogo ya khusa nga ndo athu mbaakhala nu lamba dia guheta ima ya gudia!”
30 Yoabe nu phangi’enji Abishayi ashiyile Abnere handaga washiyile phangi’awo Asaele tangua akhalele mulua ita gu Gibeona.
31 Gungima Davidi wawambelele Yoabe nu athu agasue akhalele n’enji egi: “Tawulenu milele yenu, sudigienu sagi jia ngombo, hagenu masaga mukunda nu Abnere.” Fumu Davidi wakhalele mulandula gungima dia gitanda akhalele mubatela kimbi.
32 Afundjile Abnere gu Hebrone; Fumu wadidile mangololo gu malumba a Abnere, athu agasue nji asendesele gudila.
33 Fumu wayimbile lungimbo mukunda nu Abnere egi:
Abnere wakhadi naye gufua gifua muana fua muthu wa gituhu ba?
34 Mago aye akhalelego agujitshiga,Malu aye akhalelego mu milulu.*
Wafua gifua muthu washiyiwa gudi mbundudi.”
Tangua athu agasue avuile ngenyi, asendesele luko gudila.
35 Gungima, gutuama egi kumbi dishiwuge, athu agasue ayile muhana Davidi mapha ha gumuhana gikhesa;* uvi Davidi wadilogele egi: “Nzambi anguhane ndola yakola gula ngadia dipha nga gima giko gutuama egi kumbi dishiwuge!”
36 Athu agasue amonele ndaga yakalegele fumu, asuangulugile naye gifua luholo akhalele musuanguluga nu ndaga jiagasue jiakhalele mutshita fumu.
37 Lusugu luene, athu agasue a Davidi nu enya Isalele agasue akotelesele egi fumu gakhalelego mujiya nga gima mukunda nu gufua gua Abnere mun’a Nere.
38 Gungima fumu wawambelele enya mudimo enji egi: “Mushigo mujiya egi muthu wafua gu Isalele mangino udi mutuameji, muthu wakoma?
39 Ngatshima angumbile maji ha gukhala fumu, uvi mangino muila wanguleba. Umbundudi wa athu awa, ana a Seluya, wangubalega ngolo. Yehowa ahane ndola gudi muthu wakalagala gubola gifua mudi gubola guenji.”
Mbimbi goshi'a diyiji
^ Nga “mukhetu muko.”
^ Mu Hebelu: “Tala! koko diami didi nu aye.”
^ Mu Hebelu: “mukunda nu mahatshi a phangi’enji.”
^ Idi misongo yana zola mahatshi nga tushina gu muila wa uyala.
^ Yajiya gukhala egi adi muzuelela yala udi mago nga nu malu a gufua, udi mutshita midimo ya akhetu.
^ Mu Hebelu: “milulu ya kuivre.”
^ Nga “mapha a gafunda.”
