Mukanda wa Mbadi wa Samuele 4:1-12
4 Tangua Ishiboshete mun’a Saula wavuile egi Abnere wafua gu Hebrone, muila wamulebele. Ndaga yene yasagesele diago enya Isalele agasue.
2 Guakhalele nu athu mbadi mukatshi dia masuta a Ishiboshete mun’a Saula, akhalele mutuameza hunji dia masuta akhalele muya mukuya ima. Majina awo akhalele: Bana nu Lekabe; akhalele ana a Limona muenya gu Belote, wa mu giphuta gia Benjame. (Handaga Belote yakhalele nji mutangewa mukatshi dia membo a mu mavu a Benjame.
3 Enya gu Belote alengele, ayile gu Gitayime; guene ana khala gifua ngenji uu nu mangino.)
4 Yonatana mun’a Saula wakhalele nu mona wa yala mumoshi, wakhalele malu a gufua. Jina dienji diakhalele Mefiboshete. Hakhalele muene nu ivo thano, muthu mumoshi wakatugile gu Yizelele, wajile guawambela lumene lua gufua gua Saula nu Yonatana. Giledi* gienji giamuzanguile, walenga n’enji. Uvi hakhalele mulenga muene nu woma, mona muene wabuile, malu amubogogele.
5 Lekabe nu Bana ana a Limona muenya gu Belote anginyile monzo ya Ishiboshete mukatshi dia muanya, hakhalele muene yagubanda mu midi.
6 Anginyile monzo gifua athu aya muzula mbuto jia ble, atuile Ishiboshete phogo mu vumo, gungima alengele.
7 Tangua anginyile monzo, Ishiboshete wakhalele yagubanda gu sugu yenji. Amutuile phogo, amushiyile, amubatuile muto. Gungima ayile nu muto wene phipha-phipha mu njila ya gu Araba.
8 Ayile nu muto wa Ishiboshete gu Hebrone gudi Davidi. Amuwambelele egi: “Owu muto wa Ishiboshete mun’a Saula, mbalagaji waye wakhalele mutshigina gugushiya.* Mangino Yehowa wavutula gubola gudi Saula nu gudi ajigulu enji mukunda nu fumu.”
9 Uvi Davidi wawambelele Lekabe nu phangi’enji Bana ana a Limona muenya gu Belote egi: “Ngudi gumiwambela giamatshidia mu jina dia Yehowa Nzambi wa monyo, munu wanguhuluishile* mu malamba ami agasue egi,
10 tangua muthu mumoshi wajile gunguwambela egi Saula wafua, wakhalele mutangiza egi waji gungutela lumene luabonga; ngamukuatele, ngamushiya gu Sikelage. Luene lufuto ngamuhanele!
11 Athu abola ashiyi muthu wabonga wakhadi yagubanda monzo yenji ha gitanda, adi naye guhanewa ndola yakola gubalega. Ngudi gumivutuila gubola, luholo muamushiyi.* Mudi naye gufua.”
12 Davidi wawambelele mavuala a mala ha guashiya. A abatuile mago nu malu, a azenzelesele hehi nu gijiba gia meya gia gu Hebrone. Uvi azudile muto wa Ishiboshete, awufundjile mu malumba afundjile Abnere gu Hebrone.
Mbimbi goshi'a diyiji
^ Nga “ndeji.”
^ Nga “wakhalele mukamba monyo waye.”
^ Mu Hebelu: “wahuluishile monyo wami.”
^ Nga “Ngudi gumitoga mukudi wa mahatshi enji muazodi.”
