Mukanda wa Mbadi wa Samuele 5:1-25
5 Gungima, iphuta yagasue ya Isalele yayile gudi Davidi gu Hebrone, amuwambelele egi: “Tala tudi mahatshi aye.”*
2 Tangua Saula wakhalele fumi’etu, aye wakhalele mutuameza masuta a enya Isalele gu ita. Yehowa waguwambelele egi: ‘Aye mbawubamba athu ami enya Isalele, mbawubua fumu wa enya Isalele.’”
3 Akulu agasue a gu Isalele ayile mumona fumu Davidi gu Hebrone, wakotele nawo gikotelo gutuama dia Yehowa. Gungima amumbile maji ha gubua fumu wa Isalele.
4 Tangua Davidi wabuile fumu, wakhalele nu ivo 30. Wahinyine ivo 40.
5 Hakhalele muene gu Hebrone, wahinyine enya Yuda ivo 7 nu mbeji 6; uvi hakhalele muene gu Yelusalema, wahinyine Isalele yagasue nu enya Yuda ivo 33.
6 Fumu Davidi nu masuta enji ayile gu Yelusalema ha guluisa enya Yebuse akhalele gu khanda yene. Enya Yebuse asendesele gulela Davidi egi: “Mbawushigo mungina mu dimbo dietu nga hazonda! Nga yene ifofo nu ikata yajiya gugukaya.” Akhalele mutangiza egi Davidi gajiyilego gungina mu dimbo diawo nga hazonda.
7 Uvi Davidi watambuile dimbo diakhalele nu ibayi yakola gu Siona. Dimbo diene diana tamegewa mangino egi: Dimbo dia Davidi.
8 Mu lusugu luene, Davidi wazuelele egi: “Masuta adi muluisa enya Yebuse ayile mu njila ya meya ha gushiya ‘ikata nu ifofo’ inyi ngana tuna!” Gishina giene ana zuela egi: “Ifofo nu ikata yajiyilego gungina monzo nga hazonda.”
9 Gungima Davidi wayile mukhala mu dimbo diakhalele nu ibayi yakola, aditamegele* egi: Dimbo dia Davidi. Davidi wasendesele gutunga mu khulo ya dimbo diene, sendese gu ga Mulundu* uu nu mukatshi dia dimbo.
10 Davidi wakhalele mubua nu ngolo jiavula, Yehowa Nzambi wa masuta wakhalele n’enji.
11 Fumu Hirame wa gu dimbo dia Tile, watumine athu gudi Davidi nu mabaya a sedre, nu athu ana tshita mudimo wa mabaya, nu athu ana songa maseso ha gutunga ibayi. Asendesele gutunga inzo* mukunda nu Davidi.
12 Davidi wajiyile egi Yehowa wamuhagele diago fumu gu Isalele, wakomesele ufumu wenji mukunda nu gubonga gua athu enji enya Isalele.
13 Hakatugile Davidi gu Hebrone, wayile gu Yelusalema. Hahetele muene guene, wazudile akhetu avula a manda; wazudile nji akhetu ako mu ulo. Wavualele ana avula a mala nu a akhetu.
14 An’enji avualewe gu Yelusalema enyawa: “Shamua, Shobabe, Natana, Salomo,
15 Yibale, Elishua, Nefege, Yafia,
16 Elishama, Eliyada nu Elifelete.
17 Tangua enya Filistiya avuile egi Davidi wambiwa maji ha gubua fumu gu Isalele, mukut’awo agasue ajile gumukamba. Havuile Davidi ndaga yene, wayile gudisuega mu fundo dia ubambi.
18 Tangua enya Filistiya ajile, adimuangele mu baba dia Lefayima.
19 Davidi wahudile Yehowa egi: “Nguya muluisa enya Filistiya ba? Uza guahana ha mago ami ba?” Yehowa wamuvutudile egi: “Nda waaluise; handaga mbangudi diago guahana ha mago aye.”
20 Davidi wayile gu Bale-Phelasima, wabingile enya Filistiya guene. Wazuelele egi: “Yehowa wamuanga mbalagaji jiami gutuama diami gifua luholo meya ana muanga mikhinji.” Gishina giene Davidi wahanele fundo diene jina egi: Bale-Phelasima.*
21 Enya Filistiya abembele isongo yawo guene, Davidi nu athu enji ayizanguile.
22 Gungima enya Filistiya ajile luko, adimuangele mu baba dia Lefayima.
23 Davidi wahudile Yehowa, uvi muene wamuvutudile egi: “Uyigo gualuisa gutuama. Uvi kondomoga gungima diawo, uye waaluise ha sambua dia mitshi ya baka.
24 Tangua mbawuvua matululu gifua athu adi muwenda gosa mitshi ya baka, udi naye gualuisa muphushi handaga Yehowa mbawuya gutuama diaye ha gushiya masuta a enya Filistiya.”
25 Davidi watshitshile ndaga gifua muamuwambelele Yehowa. Washiyile enya Filistiya sendese gu Geba uu nu gu Gezele.
Mbimbi goshi'a diyiji
^ Mu Hebelu: “tudi ifuwa nu misunyi yaye.”
^ Nga ndo yajiya gukhala egi: “waditamegele egi.”
^ Nga “Milo.” Mbimbi eyi ya Hebelu yakotelesa egi: “Guzalesa.”
^ Nga “inzo ya fumu.”
^ Yakotelesa egi: “Fumu wa gumuanga.”
