Mukanda wa Mbadi wa Samuele 6:1-23
6 Davidi wabungishile luko masuta agasue a ngolo a Isalele. Akhalele mala 30 000.
2 Muene nu athu enji agasue ayile gu Bale-Yuda ha guzangula Mushete wa Nzambi wa giamatshidia. Gutuama dia Mushete wene, guene athu ana kombelela Yehowa Nzambi wa masuta, udi yagukhala ha nguasa ya ufumu holu* dia basheribe.
3 Ayile monzo ya Abinadaba yakhalele holu dia gamulundu ha guzula Mushete wa Nzambi wa giamatshidia. Uvi awumbile mu phusu-phusu ihe-ihe. Ana a Abinadaba Uza nu Ahiyo ene akhalele mutuameza phusu-phusu yene.
4 Azanguile Mushete wa gikotelo wa Nzambi wa giamatshidia monzo ya Abinadaba yakhalele holu dia gamulundu. Ahiyo wakhalele muwenda gutuama dia Mushete wene.
5 Davidi nu enya Isalele agasue atshitshile wano gutuama dia Yehowa nu ima ya gushigila miziki ya maluholo agasue yalondewe nu mutshi wa jenevriye, nu itare nu ima ya gushigila miziki yana khala nu shinga, nu tungoma nu jisashi nu sembale.
6 Uvi tangua ahetele ha fundo dia gusuwila mbuto dia Nakona, ngombe jiatshiginyile gubuisa Mushete wa Nzambi wa giamatshidia; Uza wasunuine koko, wakuatele Mushete wene hagula ubuigo.
7 Gishina giene Yehowa wavuidile Uza khabu, wamushiyile ha fundo diene handaga ganemeselego mukhuala wenji. Hene Uza wafuile hehi nu Mushete wa Nzambi wa giamatshidia.
8 Uvi Davidi wavuile khabu handaga Yehowa wavuidile Uza khabu jiakola. Sendese mu tangua diene uu nu mangino fundo diene diana tamegewa egi Phelese-Uza.*
9 Lusugu luene, Davidi wavuidile Yehowa woma wavula, wazuelele egi: “Luholo lutshi Mushete wa Yehowa wajiya guheta fundo ngudi?”
10 Davidi gatshiginyilego gukatula Mushete wa Yehowa ha fundo wakhalele ha guya nawo mu Dimbo dia Davidi. Uvi wayile nawo gumbo dia Obede-Edome muenya gu Gate.
11 Mushete wa Yehowa watshitshile mbeji thathu monzo ya Obede-Edome muenya gu Gate. Hene Yehowa wakhalele mukuatesa muavula Obede-Edome nu athu agasue a monzo yenji.
12 Lusugu lumoshi, awambelele fumu Davidi egi: “Yehowa udi mukuatesa Obede-Edome muavula nu ima yenji yagasue handaga Mushete wa Nzambi wa giamatshidia udi gumbo dienji.” Hene Davidi wayile muzangula Mushete wa Nzambi wa giamatshidia gumbo dia Obede-Edome, wakandugile nawo mu Dimbo dia Davidi nu gusuanguluga guagasue.
13 Tangua athu akhalele mubata Mushete wa Yehowa ambile mathambo samano, Davidi wahanele mulambu wa ngombe nu wa shitu iko ya maji-maji.
14 Davidi wakhalele mukina nu gujietuluga nu ngolo jiagasue ha gutumbuisa Yehowa,* wasudigile efode ya linene.
15 Davidi nu enya Isalele agasue akhalele mubata Mushete wa Yehowa akhalele mumba milolo ya gusuanguluga, akhalele nji mushiga phungi.
16 Uvi tangua Mushete wa Yehowa wahetele mu Dimbo dia Davidi, Mikale mun’a Saula watalele ha fenetre, wamonele fumu Davidi mukina nu gujietuluga nu gutshiphuga ha gutumbuisa Yehowa; wasendesele gusegulula Davidi mu mutshima.
17 Ayile nu Mushete wa Yehowa, awuhagele ha fundo dienji mu inzo ya tenta yalondele Davidi mukunda nu Mushete wene. Gungima Davidi wahanele milambu ya guwotshia nu milambu ya guhuima gutuama dia Yehowa.
18 Tangua Davidi wamanesele guhana milambu ya guwotshia nu milambu ya guhuima, wakombelele mu jina dia Yehowa Nzambi wa masuta hagula akuatese athu.
19 Davidi wazanguile dipha dialondewe gifua munengu nu gato galondewe nu mabundu a date nu gato galondewe nu mabundu a vinyo, wayihanele gudi enya Isalele agasue nu mala nu akhetu. Gungima enya Isalele agasue avutugile gu jinzo jiawo.
20 Tangua Davidi wavutugile ha gukombelela Nzambi hagula akuatese enya fami yenji, Mikale mun’a Saula wajile gumutagana. Wamuwambelele egi: “Mangino fumu wa Isalele waditumbuisa mangololo tangua diakatula muene milele gutuama dia enya mudimo a akhetu a tuphungu* tuenji, gifua muana tshita muenya malui!”
21 Davidi wavutudile Mikale egi: “Ngatshitshi wano gutuama dia Yehowa wangutombele ha fundo dia sh’aye nu dia enya inzo ya sh’aye; wangutombele ha gukhala fumu wa enya Isalele, athu a Yehowa. Gishina giene ngudi mutshita wano ha gutumbuisa Yehowa.
22 Mbangudibulumuisa luko muavula gubalega, mbangutshita nji ndaga jidi mumonega gu meso ami egi ngudi muthu wa githuhu. Uvi enya mudimo wawa a akhetu udi muzuelela, ene mbaangutumbuisa.”
23 Mikale mun’a Saula gavualelego ana uu nu gu gufua guenji.
Mbimbi goshi'a diyiji
^ Nga ndo yajiya gukhala egi: “hakatshi.”
^ Yakotelesa egi: “khabu jiakola avuidile Uza.”
^ Mu Hebelu: “wakhalele mukina gutuama dia Yehowa.”
^ Nga “tulugu.”
