Mukanda wa Mbadi wa Samuele 7:1-29
7 Fumu wayile mukhala mu inzo* yenji. Yehowa wamuhanele guhuima luholo luamuhuluishile muene ha mago a mbalagaji jienji jiagasue jiakhalele n’enji hehi.
2 Lusugu lumoshi, fumu wawambelele profete Natana egi: “Ame ngudi mu inzo ya sedre uvi Mushete wa Nzambi wa giamatshidia udi mu tenta ya milele.”
3 Natana wawambelele fumu egi: “Nda utshite ndaga yagasue watshigina, handaga Yehowa udi nu aye.”
4 Uvi mu phipha yene, Yehowa wawambelele Natana egi:
5 “Nda uwambele muenya mudimo wami Davidi egi: ‘Yehowa wazuela egi: “Aye udi naye gungutungila inzo hagula ngukhale muene ba?
6 Handaga sendese tangua ngazolele enya Isalele gu Ejipitu uu nu mangino, ngana khala ndo monzo; uvi ngakhalele muya nu guwendela mu tenta.
7 Matangua agasue ngakhalele muwenda nu enya Isalele* agasue, khenji ngawambelelego nga muthu mumoshi mukatshi dia mafumu ana tuameza iphuta ya Isalele, anyi ngatombele ha gubamba athu ami enya Isalele egi: ‘Mukunda natshi wangutungilego inzo ya sedre?’”’
8 Wambela muenya mudimo wami Davidi egi: ‘Yehowa Nzambi wa masuta wazuela egi: “Ngaguzudile mu temu fundo wakhalele mubamba imeme ha gugubuisa fumu wa athu ami enya Isalele.
9 Mbangukhala nu aye guagasue mbawuya. Mbangukatula mbalagaji jiaye jiagasue gutuama diaye; mbangukomesa jina diaye gifua jina dia athu akoma a ha mavu.
10 Mbanguhana athu ami enya Isalele fundo dia gukhala, mbaakhala guene, gushigo nga muthu mbawaasagesa. Athu abola mbaashigo luko guamonesa lamba gifua luholo akhalele mutshita ha thomo,
11 sendese mu masugu ngahagele manzuji ha gutuameza athu ami enya Isalele. Mbanguguhana guhuima tangua mbanguguhuluisa ha mago a mbalagaji jiaye jiagasue.
“‘“Yehowa waguwambelele nji egi Yehowa mbawutshita egi enya fami* yaye alandule guhinyina.
12 Tangua mbawuheta gu gisugishilo gia monyo waye nu mbawufua gifua muafuile akhakh’aye, mbanguhana ufumu gudi vungu* diaye, gudi mun’aye;* mbangukolesa diago ufumu wenji.
13 Muene mbawutunga inzo mukunda nu jina diami, mbangukolesa diago ufumu wenji mayilago.
14 Mbangubua sh’enji, muene mbawubua mun’ami. Gula watshita gubola, mbangumubalela, mbangumubeta ha gumuhana ndola* gifua luholo ana a athu* ana tshita.
15 Mbangulandula gumuzumba* tangua diagasue, mbangushigo gumubemba gifua luholo ngabembele Saula, munu ngakatuile gutuama diaye.
16 Fami yaye nu ufumu waye mbawukhala mayilago. Ufumu waye mbawulandula guhinyina ivo nu ivo.”’”
17 Natana wawambelele Davidi mbimbi eji jiagasue nu vizio eyi yagasue.
18 Fumu Davidi wayile mukhala hashi gutuama dia Yehowa, wazuelele egi: “Oo Yehowa Fumu Wabalega Gukoma, ame ngudi nanyi? Fami yami idi itshi ha guheta gubonga guavula ngegi?
19 Oo Yehowa Fumu Wabalega Gukoma, wangutshitshila gale ndaga jiavula, uvi wazuela luko egi fami yami mbayilandula gukhala matangua avula uu nu mu masugu adi muza. Oo Yehowa Fumu Wabalega Gukoma, ndaga eyi idi mukhuala mukunda nu athu agasue.
20 Oo Yehowa Fumu Wabalega Gukoma, ndaga itshi ngajiya guguwambela luko? Handaga aye wangujiya muabonga.
21 Wangukalegela ndaga eji jiagasue jiakoma nu wangumonesa najio ha gutagenesa mbimbi yaye mu gudivua nu gutshigina* guaye.
22 Udi diago wakoma, Oo Yehowa Fumu Wabalega Gukoma. Gushigo nu muthu gifua aye, gushigo nu Nzambi muko phamba aye; ndaga jiagasue tuavuile nu matshui etu jidi guyitshiginyisa.
23 Gudi nu gifutshi giko ha mavu gifua athu aye Isalele ba? Wahuluishile athu aye, waatshitshile ndaga jiakoma nu jia gushimana mukunda nu gutumbuisa jina diaye. Wakayele ifutshi nu nzambi jiawo jia mambo mukunda nu ene, handaga waahuluishile gu Ejipitu ha gukhala athu aye.
24 Watombele enya Isalele ha gukhala athu aye ivo nu ivo; Oo Yehowa aye wabuile Nzambi wawo.
25 “Oo Yehowa Nzambi taganesa ndaga walayi muenya mudimo waye nu fami yenji ivo nu ivo. Ngabuba, taganesa ndaga walayele.
26 Jina diaye ditumbuishiwe mayilago hagula athu azuele egi: ‘Yehowa Nzambi wa masuta, udi Nzambi wa Isalele!’ Fami ya muenya mudimo waye Davidi ijigamesewe gutuama diaye.
27 Handaga aye Yehowa Nzambi wa masuta, Nzambi wa Isalele, wawambelele muenya mudimo waye egi: ‘Enya fami* yaye mbakhala mafumu.’ Gishina giene ame muenya mudimo waye ngaheta gikhesa gia gutshita gisambu egi.
28 Oo Yehowa Fumu Wabalega Gukoma, udi Nzambi wa giamatshidia! Mbimbi jiaye jiakhala jia giamatshidia, walayele ndaga jiabonga gudi muenya mudimo waye.
29 Ngabuba, kuatesa fami ya muenya mudimo waye, alandule gukhala gutuama diaye ivo nu ivo; handaga aye Yehowa Fumu Wabalega Gukoma watendelele ndaga yene. Fami yami ihete gubonga mayilago mu njila ya ukuateshi waye.”
Mbimbi goshi'a diyiji
^ Nga “inzo ya fumu.”
^ Mu Hebelu: “ana a Isalele.”
^ Nga “inzo.”
^ Mu Hebelu: “mbuto.”
^ Mu Hebelu: “muthu mbawuzoga mu vumo diaye.”
^ Mu Hebelu: “mbangumubalela nu fimbo gifua athu.”
^ Nga ndo yajiya gukhala egi: “Adama.”
^ Nga “Mbangumumonesela guzumba gua giamatshidia.”
^ Nga “mutshima.”
^ Nga “inzo.”
