Mukanda wa Mbadi wa Samuele 8:1-18
8 Matangua azonda gungima, Davidi waluishile enya Filistiya, waabingile diago. Waatambuile Metege-Ama.
2 Wabingile enya Moaba, waabandesele mu mavu, waathesele nu shinga ya guthesela. Waakhaphumuine mu mahunji. Mahunji mbadi a athu akhalele naye gushiyiwa, uvi hunji dimoshi akhalele naye gusala nu monyo. Enya Moaba abuile enya mudimo a Davidi, akhalele gumubatela musomo.
3 Davidi wabingile fumu Hadadezele wa gu Soba mun’a Lehoba. Mu tangua diene, Hadadezele wakhalele muya ha guhinyina luko gu khanda ya Muta wa Efrata.
4 Davidi wakuatele athu a Hadadezele 1 700 akhalele muwendesa tubalu nu masuta 20 000 akhalele muwenda hashi. Wabatuile mishiya ya malu a tubalu tuagasue tuakhalele muwendesa phusu-phusu, uvi wabembele phamba tubalu 100.
5 Tangua enya Siliya a gu Damase ajile ha gukuatesa fumu Hadadezele wa gu Soba, Davidi washiyile masuta awo 22 000.
6 Davidi wahagele phundo jia masuta gu Siliya ya gu Damase. Enya Siliya abuile enya mudimo enji, akhalele gumuhana musomo. Guma guagasue Davidi wakhalele muya, Yehowa wakhalele gumukuatesa ha gubinga.*
7 Davidi wazudile nji tshibu jia wolo jia enya mudimo a Hadadezele, wajibatele gu Yelusalema.
8 Fumu Davidi wazudile kuivre yavula gu dimbo dia Beta nu Belote, membo a Hadadezele.
9 Gungima fumu Toyi wa gu Hamate wavuile egi Davidi wabinga masuta agasue a Hadadezele.
10 Hene Toyi watumine mun’enji Yolama gudi fumu Davidi ha gumuhula gula udi gikuatshi nu ha gumushimana luholo luabingile muene Hadadezele. (Handaga Hadadezele wakhalele muluisa Toyi muavula). Yolama wajile nu ima yalondewe nu utadi wa siliva nu wolo nu kuivre.
11 Fumu Davidi wahanele ima yene gudi Yehowa, gifua luholo luadiangele muene guhana utadi wa siliva nu wolo wazudile muene mu ifutshi yagasue yabingile muene:
12 gu Siliya nu Moaba, gudi enya Amona, enya Filistiya, enya Amaleke nu ima yatambuile muene gudi fumu Hadadezele wa gu Soba, mun’a Lehoba.
13 Jina dia Davidi diajiyiwe luko muavula hashiyile muene enya Edome 18 000 mu Baba dia Mungua.
14 Wahagele phundo jia masuta gu Edome. Wahagele phundo jiene mu gifutshi giagasue gia Edome. Enya Edome agasue abuile enya mudimo a Davidi. Guma guagasue guakhalele muya Davidi, Yehowa wakhalele gumukuatesa ha gubinga.*
15 Davidi walanduile guhinyina Isalele yagasue. Wakhalele musophesa athu enji agasue mu luholo luatagana.
16 Yoabe mun’a Seluya wakhalele fumu wa masuta, Yosafata mun’a Ahiluda muene wakhalele musonega milonga.
17 Zadoke mun’a Ahituba nu Ahimeleke mun’a Abiatare akhalele nganga-nzambi. Selaya wakhalele sekretere.
18 Benaya mun’a Yoyada wakhalele fumu wa enya Kerete nu enya Phelete. Ana a Davidi akhalele atuameji akoma.*
Mbimbi goshi'a diyiji
^ Nga “gumuhuluisa.”
^ Nga “gumuhuluisa.”
^ Mu Hebelu: “abuile nganga-nzambi.”
