Mukanda wa Mbadi wa Samuele 9:1-13
-
Davidi wamonesela Mefiboshete guzumba gua giamatshidia (1-13)
9 Gungima Davidi wahudile egi: “Gushigo nga muthu udi nu monyo mu fami ya Saula, munu ngajiya gumonesela guzumba gua giamatshidia mukunda nu Yonatana ba?”
2 Guakhalele nu muenya mudimo mumoshi mu fami ya Saula, jina dienji Ziba. Amutamegele gumbo dia Davidi. Fumu wamuhudile egi: “Aye Ziba?” Muene wamuvutudile egi: “Ayi fumu, ame Ziba.”
3 Fumu wamuhudile luko egi: “Gushigo nu muthu mu fami ya Saula munu ngajiya gumonesela guzumba gua giamatshidia gifua guana monesa Nzambi?” Ziba wamuvutuile egi: “Mun’a Yonatana mumoshi yowu guene; udi malu a gufua.”*
4 Fumu wamuhudile egi: “Mona muene udi gui?” Ziba wamuvutuile egi: “Udi gumbo dia Makile mun’a Amiele gu Lo-Debale.”
5 Fumu Davidi watumine athu mbala imoshi ha guya gumukamba gumbo dia Makile mun’a Amiele gu Lo-Debale.
6 Tangua Mefiboshete mun’a Yonatana, mujigulu wa Saula wajile gudi Davidi, mbala imoshi wafugamele phala mu mavu. Gungima Davidi wamutamegele egi: “Mefiboshete!” Muene watayele egi: “Fumu, ame yowu.”
7 Davidi wamuwambelele egi: “Uvuigo woma handaga ngudi diago gugumonesela guzumba gua giamatshidia mukunda nu sh’aye Yonatana. Mbanguguvutuila mavu agasue a khakh’aye Saula. Mbawukhala mudia* gu mesa ami masugu agasue.”
8 Mefiboshete wafugamele luko, wazuelele egi: “Ame ngudi nanyi hagula udisagese mukunda nu ame, imbua yagudifuila?”
9 Fumu watamegele Ziba muenya mudimo wa Saula, wamuwambelele egi: “Ima yagasue ya Saula nu ya enya fami yenji agasue ngudi guyihana gudi mujigulu wa fumi’aye.
10 Aye nu an’aye nu enya mudimo waye mbamudima ilanga mukunda nu muene. Mbuto mbamuzola mbajikhala mukunda nu gudisa enya fami agasue a mujigulu wa fumi’aye. Uvi Mefiboshete mujigulu wa fumi’aye, mbawukhala mudia gu mesa ami.
Ziba wakhalele nu ana 15 nu enya mudimo 20.
11 Gungima Ziba wawambelele fumu egi: “Fumu, mbangutshita ndaga yagasue wanguwambela ha gukalagala.” Mefiboshete wakhalele mudia gu mesa a Davidi gifua mun’a fumu.
12 Mefiboshete wakhalele nji nu mona wa yala jina dienji Mika. Athu agasue akhalele mu inzo ya Ziba, abuile enya mudimo a Mefiboshete.
13 Gungima Mefiboshete wayile mukhala gu Yelusalema, handaga wakhalele mudia masugu agasue gu mesa a fumu. Wakhalele malu a gufua.
