Mukanda wa Mbadi Gudi Enya gu Tesalonike 1:1-12
1 Ame Phaula, hamoshi nu Silase nu Timote, ngudi musonegela hungu dia gu Tesalonike didi mu gudivua nu Nzambi Tata wetu nu Fumu Yesu Klisto.
2 Tata Nzambi nu Fumu Yesu Klisto amivile khenda jiavula nu amikuatese ha gukhala mu guhuima.
3 Aphangi, tudi naye guhana Nzambi mersi tangua diagasue mukunda nu enue, handaga gutshigina guenu gudi mukola, mudi nji gudizumba muavula mukatshi dienu.
4 Gishina giene tudi gudihala mukunda nu enue mukatshi dia mahungu a Nzambi, handaga muana monesa gutshigina, muana kolesela nji mu usageshi wagasue nu mu malamba avula mudi mutagana nawo.
5 Ndaga jiji jidi mumonesa egi Nzambi wana sophesa mu luholo luabonga; jidi nji mumonegesa egi mudi muatagana ha gungina mu Ufumu wa Nzambi unu mudi mumonela malamba.
6 Nzambi wana sophesa mu luholo luatagana, gishina giene mbawuhana ndola gudi athu adi gumimonesa lamba.
7 Uvi enue athu mudi mumona lamba mbatukatudiwa n’enu mu lamba tangua Fumu Yesu nu anjelo enji a ngolo mbaamonega mu dilu
8 nu madimi a tshuya, tangua mbadihana muene ndola gudi athu ashigo mujiya Nzambi nu anyi ashigo mutumagela lukuma luabonga luatadila Fumu wetu Yesu.
9 Fumu wetu mbawusophesa athu wawa, mbaaheta ndola ya gufua gua mayilago. Ngenyi, muene mbagashigo guatala luko nu mbagashigo guakuatesa nu ngolo jienji jiavula.
10 Tangua mbadiza muene ha gutumbuishiwa hamoshi nu athu enji a gijila, athu agasue ana sha gutshigina gudi muene mbaamutala nu gushimana. Luholo muashile gutshigina mu ndaga tuamiwambelele, enue nji mbamukhala mukatshi dia athu ene.
11 Gishina giene tuana kombelela tangua diagasue mukunda nu enue hagula Nzambi wetu amone egi mudi muatagana mukunda nu gutamega guamitamegele muene, nu hagula mu ngolo jienji atagenese ndaga jiagasue jiabonga jiana gumusuanguluisa, nu hagula midimo muana kalagala mukunda nu gutshigina ibinge.
12 Ngenyi jina dia Fumu wetu Yesu ditumbuishiwe mu njila yenu, enue mutumbuishiwe hamoshi n’enji mu gudivua nu khenda jiavula jia Nzambi wetu nu jia Fumu Yesu Klisto.
