Mukanda wa Mbadi Gudi Enya gu Tesalonike 2:1-17
2 Aphangi, mu ndaga yatadila guza gua Fumu’etu Yesu Klisto nu gudibungisa guetu n’enji, tudi gumitoga egi
2 mubuishigo matangi’enu tunga-tunga gula muthu wamiwambela egi lusugu lua Yehowa luaheta gale. Mudisagesago ngatshima azuela egi lukuma luene ludi mukatuga gudi Nzambi, nga amiwambela egi luatangewa gu mikanda inyi athu adi muzuela egi esue tuasonega.
3 Muthu gamidimbigo nga mu ndaga imoshi, handaga gutuama egi lusugu luene luze, athu ana lumbugila Nzambi* adi naye guzoga thomo, muthu wana shiya mikhuala udi naye gumonega. Muene mbawushiyiwa.
4 Muthu muene udi mbalagaji. Wana gudikanduisa gutuama dia muthu yagasue wana tamegewa egi nzambi nga gutuama dia gima athu ana kombelela.* Gishina giene udi ya guditumbiga mu tempelo ya Nzambi, wana gudimonegesa nji gu meso a athu agasue egi udi nzambi.
5 Enue mushigo muwunguluga egi tangua ngakhalele n’enu ngamiwambelele ndaga jiji ba?
6 Henyaha mudi mujiya gima gidi gumukanga njila hagula muene mbaamonege mu tangua diamuhagewe.
7 Idi yadiago egi ndaga jiji jiana shiya mukhuala jiana kalagala gale mudimo mu gisuegi. Uvi mbajikhala jia gusuega uu nu tangua muthu wana gujikanga njila mbawukatudiwa.
8 Mu tangua diene, muthu wana shiya mikhuala mbawumonega. Fumu Yesu mbawumushiya nu mbimbi jiakola mbajizoga mu kano dienji* nu mbawumubuisa gima gia githuhu mu lusugu lua gumonega guenji.
9 Uvi, Satana wana tshita egi muthu wana shiya mikhuala amonege. Udi gumuhana ngolo jia gukalagala ndaga jiakoma nu ijiyishilo ya mambo nu ndaga jia gushimana
10 nu ha gumba mambo a maluholo agasue ha guhuiga athu adi naye gushiyiwa. Athu ene mbaahanewa ndola handaga azumbilego nu atshiginyilego giamatshidia giakhalele naye guahuluisa.
11 Gishina giene Nzambi udi mubemba egi ahuigiwe mu malongo a mambo, hagula atshigine ndaga jia mambo.
12 Ngenyi, mukut’awo agasue mbaasophesewa handaga atshiginyilego giamatshidia, uvi akhalele musuanguluga nu ndaga jiabola.
13 Aphangi, Yehowa wana gumizumba. Tudi naye gulomba Nzambi tangua diagasue mukunda nu enue, handaga sendese mu gisendeselo, muene wamitombele hagula muhuluishiwe, wamibuishile athu a gijila mu njila ya nyuma yenji handaga muashile gutshigina mu giamatshidia.
14 Muene wamitamegele hagula muhuluge mu njila ya lukuma luabonga tuana longesa, hagula muajiya guheta lutumbu lua Fumu wetu Yesu Klisto.
15 Aphangi, khalenu ya gumagana tenyi, bambenu malongo mualongesewe, ikhale anyi tuamiwambelele gu kano nga anyi tuamisonegele.
16 Nzambi Tata wetu wana gutuzumba nu wana gutukuatesa mayilago nu wana gutuhana felela diabonga mu njila ya khenda jienji jiavula. Tudi musamba egi muene nu Fumu wetu Yesu Klisto
17 akolese mitshima yenu, amikuatese* hagula tangua diagasue muajiya gukalagala nu guzuela ndaga jiabonga.
Mbimbi goshi'a diyiji
^ Nga “ba aposta.”
^ Nga “gufugamela.”
^ Mu Greke: “nyuma ya mu kano dienji.”
^ Nga “amihane gikhesa.”
