Mukanda wa Mbadi Gudi Enya gu Tesalonike 3:1-18
3 Aphangi, ha gusugisa khalenu mukombelela mukunda nu esue hagula mbimbi ya Yehowa idivudise muphushi nu itumbuishiwe gifua luholo idi mutumbuishiwa mukatshi dienu,
2 hagula tuhuluishiwe ha mago a athu abola nu a enya khuta, handaga ishigo athu agasue ana monesa gutshigina.
3 Uvi Fumu wana taganesa mbimbi jienji, mbawumihana ngolo, mbawumibamba nji hagula muthu wabola gamitshitshigo gubola.
4 Luholo tudi alandudi a Fumu, tudi gumishila mutshima egi mudi mutumagela malongo tuamihanele nu mbamulandula nji guatumagela.
5 Tudi mukombelela hagula Fumu alandule gutuameza mitshima yenu, hagula muzumbe Nzambi nu mukolesele mukunda nu Klisto.
6 Aphangi, tudi gumiwambela mu jina dia Fumu wetu Yesu Klisto egi khalenu gualeha nu muthu wagasue gashigo mutumagela nu gashigo mulandula malongo tuamihanele.*
7 Mudi mujiya muabonga luholo mudi naye gulandula gifezegeselo gietu, handaga tuakhalelego gudituameza mu luholo luabola tangua tuakhalele mukatshi dienu.
8 Tuadilego nji nga gima gia muthu gia githuhu, uvi tuamonele lamba, tuakhalele nji mutshita mudimo wakola phipha nu muanya hagula tukhadigo ginemo giakola nga gudi muthu mumoshi mukatshi dienu.
9 Tuakhalele nu ufumu wa gumitoga ima, uvi tuamitogelego handaga tuatshiginyile egi mulandule gifezegeselo gietu.
10 Tangua tuakhalele n’enu, tuakhalele gumiwambela egi: “Gula muthu watuna gutshita mudimo, gashigo naye gudia.”
11 Tuavi egi athu ako mukatshi dienu ashigo muwenda mu luholo luabonga, ashigo mutshita mudimo nga hazonda, uvi adi gudinginyisa mu ndaga jiangane.
12 Tudi muwambela athu a luholo lulu mu jina dia Fumu Yesu Klisto egi akhadigo nu nguma, atshite mudimo hagula ene hakhawo ahete ima ya gudia.
13 Uvi enue aphangi, landulenu gutshita ndaga jiabonga.
14 Gula muthu gatumagelego mbimbi tuasonega mu mukanda wuwu, muhagelenu meso. Bembenu gudibungisa n’enji hagula avue musonyi.
15 Uvi mukhadigo gumutalela gifua mbalagaji, landulenu gumuhana malongo gifua phangi.
16 Fumu muhanyi wa guhuima amikuatese ha gukhala mu guhuima tangua diagasue nu mu maluholo agasue. Tudi mukombelela egi Fumu akhale nu enue mukut’enu agasue.
17 Ame Phaula ngasonega mukanda wuwu nu koko guami, ngamitumina lumene. Ngana sonega ngenyi mu mikanda yami yagasue, hagula mujiye egi ame ngasonega.
18 Khenda jiavula jia Fumu wetu Yesu Klisto jikhale nu muthu wagasue mukatshi dienu.
Mbimbi goshi'a diyiji
^ Nga ndo yajiya gukhala egi, “tuahanele.”
