Mukanda wa Mbadi Gudi Timote 1:1-18
1 Ame Phaula, mupostolo wa Klisto Yesu mu gutshigina gua Nzambi, mu gudivua nu felela dia monyo tuahetele mu njila ya Klisto Yesu,
2 ngudi musonegela Timote, mun’ami ngana zumba muavula.
Tata Nzambi nu Fumu wetu Klisto Yesu aguvile khenda jiavula nu agukuatese ha gukhala mu guhuima.
3 Ngudi muhana Nzambi mersi, ngana gumukalegela mudimo wa gijila nu mutshima waphelegeta gifua luholo akhakh’ami akhalele mukalagala. Ngana gugutangiza tangua diagasue ha ngana bubila Nzambi phipha nu muanya.
4 Gula ngatangiza masoji aye, ngumuvua uhote wavula wa gugumona, hagula ngukhale nu gusuanguluga guavula.
5 Ame muwunguluga gutshigina guaye gua giamatshidia, gunu guakhalele thomo nu khakha waye Loise nu gin’aye Enise. Ngudi diago musha mutshima egi aye nji udi nu gutshigina gua luholo lumoshi.
6 Gishina giene ngudi guguwunguluisa* egi khapho dia Nzambi dinyi diaguhanewe tangua ngaguhagele mago, dilemese gifua tshuya.
7 Handaga nyuma yana gutuhana Nzambi yana gutubuisa ndo enya woma, uvi yana gutuhana ngolo, yana gutukuatesa ha gukhala nu guzumba nu matangi abonga.
8 Uvigo musonyi ha gulongesa ndaga yatadila Fumu wetu nga mukunda nu ame muenya bologo wenji. Uvi khala hehi ha gumona malamba mukunda nu lukuma luabonga, sha mutshima mu ngolo jia Nzambi.
9 Muene watuhuluishile, watutamegele nji ha gukhala athu a gijila. Gatutamegelego mukunda nu midimo yetu, uvi mukunda nu felela dienji nu khenda jienji jiavula. Watumonesele khenda jiene mu gudivua nu Klisto Yesu sendese mualeha.
10 Uvi henyaha khenda jiene jiamonega diago haphelo mu njila ya gumonega gua Muhuluishi wetu Klisto Yesu, yonu wakatudile gufua. Wamonesele mu njila ya lukuma luabonga luholo tuajiya guheta monyo nu muila unu wajiyilego gufukha.
11 Angutombele ha gumuanga lukuma luabonga, ha gukhala mupostolo nu ha gulongesa lukuma luene.
12 Gishina giene ngudi mumona malamba awa, uvi ngushigo muvua musonyi. Ngudi mujiya Nzambi ngana shila mutshima, ngudi mutshigina egi muene udi nu ngolo jia gubamba ima yagasue ngamuhanele uu nu mu tangua diatombewe.
13 Landula gifezegeselo gia mbimbi jiabonga wavile gudi ame, landula nji gumonesa gutshigina nu guzumba luholo udi mu gudivua nu Klisto Yesu.
14 Bamba umonyi wabonga mu ukuateshi wa nyuma ya Nzambi idi mukatshi dietu.
15 Gifua luholo udi guyijiya, athu agasue a mu provense ya Azi angulengi, nu Fijele nu Helemogene nji.
16 Fumu avile fami ya Onesifolo khenda handaga matangua avula wakhalele gunguhana gikhesa. Muene gavilego musonyi mukunda nu bologo diami.
17 Hakhalele muene gu Roma, wangukambele muabonga uu nu tangua diangumonele muene.
18 Ngudi musamba egi Yehowa Fumu mbaamuvuile khenda mu lusugu luene. Aye udi mujiya muabonga midimo yagasue yakalegele muene gu Efeso.
Mbimbi goshi'a diyiji
^ Nga “kukuyabuluisa.”
