Mukanda wa Mbadi Gudi Timote 2:1-26
2 Aye mun’ami, landula guheta ngolo mu khenda jiavula jiana monesa Klisto Yesu.
2 Ndaga wavile gudi ame, jinyi athu avula atshiginyishile, jilongese gudi athu a gujinginyina hagula ene nji abue athu atagana ha gulongesa athu ako.
3 Luholo udi suta diabonga dia Klisto Yesu, kolesela mu malamba.
4 Muthu wana kalagala mudimo wa gisuta ganago gudinginyisa mu ndaga jia mungenda,* hagula fumu wenji asuanguluge n’enji.
5 Luholo lumoshi nji, hagula muthu wana kalagala saga ahete lufuto, udi naye gulandula mikhuala ya saga jiene.
6 Muthu wana kalagala mudimo wakola wa mahia, udi naye gukhala muthu wa thomo ha gudia mbuto.
7 Tangua diagasue khala mutangigiza ndaga ngudi muzuela; Fumu mbawugukuatesa ha gukotelesa ndaga jiagasue.
8 Ujimbilago egi Yesu Klisto wafuzumugile mu gufua, wakhalele mujigulu wa Davidi mu gudivua nu lukuma luabonga ngudi mulongesa.
9 Ngudi mumona lamba mukunda nu lukuma luene, ngambiwe mu bologo gifua mbundudi. Uvi mbimbi ya Nzambi ishigo ya gujitshiga.
10 Gishina giene ngudi mukolesela mu ndaga eji jiagasue mukunda nu athu atombewe hagula ene nji ahuluishiwe mu njila ya Klisto Yesu nu ahete lutumbu lua ivo nu ivo.
11 Ndaga eyi idi yatagana ha guyishila mutshima: Gula tuafua hamoshi n’enji, mbatujinga nji hamoshi n’enji.
12 Gila tuakolesela, mbatuhinyina n’enji hamoshi gifua mafumu; uvi gila tuamutuna, muene nji mbawututuna.
13 Gila esue tushigo ya gujinginyina, muene mbawumusala ya gujinginyina handaga gajiyilego gudituna.
14 Khala guawunguluisa* ndaga eji, alongese gutuama dia Nzambi ha gutuna gulua mukunda nu mbimbi, handaga gulua mukunda nu mbimbi gushigo nu ndando nga hazonda nu guana bata malamba* gudi athu ana tegelela.
15 Kalagala ngolo hagula Nzambi asuanguluge nu aye. Khala muenya mudimo yonu gashigo nu gima gia guvila musonyi, longesa nu kotelesa mbimbi ya giamatshidia mu luholo luabonga.
16 Uvi tuna mbimbi jia githuhu jiana segulula ndaga jia gijila, handaga jiana tuma athu ha gutuna gunemesa Nzambi.
17 Mbimbi jia athu ene mbajidivudisa gifua luholo phuta yana koma mu muila wa muthu. Himene nu Filete adi mukatshi dia athu ene.
18 Athu ene atunyile gale giamatshidia, ana zuela egi gufuzumuga guakalegewe gale, adi mubolesa gutshigina gua athu ako.
19 Uvi fondasio yakola yahagele Nzambi idi ya gumagana. Idi yagusonega mbimbi eji: “Yehowa wana jiya athu enji,” nu “Muthu wagasue udi mutamega jina dia Yehowa abembe gutshita ndaga jiabola.”
20 Mu inzo yakoma muana khalago phamba nu ima* ya wolo nu ya utadi wa siliva, uvi muana khala nji nu ima yasongewe nu mitshi nu ima ya wuma. Ima iko yana kalegewa mukunda nu ndaga jia lutumbu, uvi iko ishigo mukunda nu ndaga jia lutumbu.
21 Gula muthu udi gualeha nu ima inyi ishigo mukunda nu ndaga jia lutumbu, muene mbawukhala gikadigilo* mukunda nu ndaga jia ndando, mbawukhala wa gijila, mbawukhala gikadigilo gia ndando mukunda nu fumu wenji, mbawukhala nji hehi mukunda nu mudimo wagasue wabonga.
22 Lenga nzala jia ulenge, uvi landula gukalagala ndaga jiabonga, khala nu gutshigina nu guzumba, khala mu guhuima hamoshi nu athu ana tamega Fumu nu mutshima waphelegeta.
23 Tuna iphapha ya githuhu nu ya guheya, handaga yana zola nguma.
24 Muhiga wa Fumu gashigo naye gulua, uvi udi naye gukhala nu gisemo gudi athu agasue, udi naye gujiya gulongesa muabonga, udi naye gudikanda gila athu amukalegela gubola.
25 Udi naye gukhala nu guhuiminyina tangua didi mulongesa muene athu ana tuna gutumagela ndaga mudi muzuela. Nzambi wajiya guakuatesa ha gubalumuna mutshima* hagula ahete ujiyi wa diago wa giamatshidia.
26 Ngenyi ene mbaakhala nu matangi abonga, mbaazoga mu muheto wa Diabulu waakuatele nu monyo ha gukalagala gutshigina guenji.
Mbimbi goshi'a diyiji
^ Nga ndo yajiya gukhala egi, “midimo ya lusugu nu lusugu.”
^ Nga “kuayabuluisa.”
^ Nga “gushiya; gubolesa.”
^ Nga “malonga; mabungu.”
^ Nga “bungu nga longa.”
^ Nga “gubalumuna matangi.”
