Mukanda wa Mbadi Gudi Timote 4:1-22
4 Gutuama dia Nzambi nu gutuama dia Klisto Yesu munu udi naye gusophesa athu adi nu monyo nu adi a gufua, mu njila ya gumonega guenji nu ya Ufumu wenji, ngudi guguwambela egi:
2 Longesa mbimbi; ilongese nu gikhesa mu matangua abonga nu mu matangua a lamba; khala guavutula mu njila, khala guabela, khala muhana gikhesa. Kalagala ndaga eji jiagasue nu guhuiminyina guagasue gifua mulongeshi wabonga.
3 Handaga gudi nu tangua mbaatuna guvua malongo abonga, uvi ha gutagenesa nzala jiawo, mbaakamba alongeshi ha gualongesa ndaga matshui awo adi mutshigina guvua.
4 Ene mbaatuna guvua giamatshidia ha gulandula mene jia mambo.
5 Uvi aye, khala nu matangi abonga mu ndaga jiagasue, kolesela mu malamba, longesa lukuma luabonga, tagenesa mudimo waye muabonga.
6 Ame ngudi gale mubundudiwa gifua mulambu wa matombe, tangua diami dia guzoga mu bologo diasuena hehi.
7 Ngalui ita yabonga, ngazudi phushi uu nu gu gisugishilo, ngabambi gutshigina guami.
8 Henyaha Fumu wana sophesa mu luholo luatagana wangubambela gifulu gia ufumu gia athu ana kalagala ndaga jiabonga. Mbawunguhana nagio gifua lufuto mu lusugu luene, mbagashigo gunguhana nagio phamba ame, uvi mbawuhana nji athu agasue ana nengena gumonega guenji.
9 Tshita yagasue ha guza gudi ame muphushi.
10 Demase wangulengi handaga wazumbi ndaga jia ha mavu awa,* wayi gu Tesalonike. Khelesene wayi gu Galatiya, Tito wayi gu Dalamatiya.
11 Ngasala phamba nu Luka. Iza nu Mako, handaga udi watagana ha gungukuatesa mu mudimo ngana kalegela Nzambi.
12 Uvi Tishike ngamutumi gu Efeso.
13 Gula waza, ngubatele gazawu ngabembele gu Toloase gumbo dia Kalepuse. Ngubatele nji ba rulo, uvi ujimbilago ba rulo anyi a ilema* ya shitu.
14 Alekisandele mbembo ya utadi wa kuivre wangukalegele diago ndaga jiabola. Yehowa mbawumufuta gifua mudi makalegelo enji.
15 Aye nji mutemene, handaga muene gatshiginyilego nga hazonda ndaga tuakhalele muzuela.
16 Tangua ngasophesewe mbala ya thomo, gushigo nga muthu wakhalele gu khanda yami, athu agasue angulengele. Nzambi gaatangelago gubola guawo.
17 Uvi Fumu wakhalele nu ame, wanguhanele ngolo hagula mu njila yami lukuma luabonga lulongesewe muabonga, ifutshi yagasue ivue lukuma luene. Ngahuluishiwe gu kano dia khoshi.
18 Fumu mbawunguhuluisa mu ndaga jiagasue jiabola, mbawunguhuluisa nji mukunda nu Ufumu wenji wa mu dilu. Muene atumbuishiwe ivo nu ivo. Amen.
19 Hana Prisile nu Akila lumene nu fami ya Onesifolo.
20 Elasto wasadi gu Kolinto, uvi Telofime ngamubembi gu Milete handaga udi mukata.
21 Tshita yagasue hagula uze gutuama egi sungi ya guhuma isendese.
Ebuluse nu Pudense nu Linuse nu Klodia nu aphangi agasue agutumila lumene.
22 Ngudi musamba egi Fumu akhale nu matangi abonga udi mumonesa. Aguvile nji khenda jienji jiavula.
