Mukanda wa Thathu wa Yone 1:1-14
1 Ame mbuta muthu* ngudi musonegela Gayuse, phangi’ami ngana zumba muavula.
2 Phangi’ami ngana zumba, ngudi mukombelela hagula ndaga jiaye jiagasue jiyile muabonga nu ukhale nu ngolo mu muila gifua luholo udi* henyaha.
3 Ngasuangulugile muavula tangua aphangi ajile gunguwambela luholo udi ya gujinginyina mu giamatshidia nu luholo udi muwenda mu giamatshidia.
4 Gushigo nu ndaga yajiya gungusuanguluisa muavula gubalega eyi: gula ngavua egi an’ami adi mulandula guwenda mu giamatshidia.
5 Phangi’ami wa guzumba, udi mumonesa khadilo dia gujinginyina mu ndaga udi mukalegela aphangi, ikhale anyi ushigo mujiya.
6 Ene azuedi ndaga yatadila guzumba guaye gutuama dia hungu. Ngudi gugutoga ha guya guatuala mu njila mu luholo ludi musuanguluisa Nzambi.
7 Handaga adi muya nu guwenda mukunda nu jina dienji, ashigo munenga egi enya a ha mavu awa a ahane ima.
8 Tudi naye gumonesa khadilo dia guyamba gudi athu a luholo elu, hagula tubue mafuta a mudimo mukunda nu giamatshidia.
9 Ngasonegela hungu mukanda, uvi Diotrefese, munu wana kamba guzula fundo dia thomo mukatshi diawo, gana nemesa ndo nga ndaga imoshi tuana zuela.
10 Gula ngaza mbangumonesa ndaga jiana tshita muene nu ndaga jiabola jiana zuela muene mukunda nu esue. Gana suga ndo hanyinyi, wana tuna guyamba aphangi nu ginemua. Aphangi anyi ana guayamba, muene wana kamba luholo lua guakanga njila nu guazola mu hungu.
11 Phangi’ami ngana zumba, ulandulago gifezegeselo gia athu adi mutshita ndaga jiabola, uvi landula gifezegeselo gia athu adi mutshita ndaga jiabonga. muthu udi mutshita ndaga jiabonga wakatugile gudi Nzambi. Uvi muthu udi mutshita ndaga jiabola gamonelego Nzambi.
12 Athu agasue adi muzuela ndaga jiabonga mukunda nu Demeteliuse, giamatshidia nji gidi mutshiginyisa ndaga yene. Esue nji tudi muzuela ndaga jiabonga mukunda nu muene. Jiya egi ndaga tudi muzuela jidi jia giamatshidia.
13 Ngudi nu ndaga jiavula jia guguwambela, uvi ngushigo mutshigina gugusonegela najio jiagasue mu mukanda.
14 Ngudi gudifelela ha guza muphushi hagula tudimone nu meso,* hagula tute maga.
Khala mu guhuima.
Mafut’etu agutumila moyo. Hana moyo gudi mafut’etu, muthu nu muthu mu jina dienji.
