Gudi Enya gu Efeso 1:1-23
1 Ame Phaula, mupostolo wa Klisto Yesu mu gutshigina gua Nzambi, ngudi musonegela athu a gijila adi gu Efeso, adi agujinginyina gudi Nzambi mu gudivua nu Klisto Yesu:
2 Khenda jiavula nu guhuima gua Nzambi Tata wetu nu gua Fumu Yesu Klisto gukhale n’enu.
3 Nzambi, Tata wa Fumu’etu Yesu Klisto atumbuishiwe, handaga watusuanguluisa nu ndaga jia maluholo agasue jia mu nyuma mu dilu, handaga tudi alandudi a Klisto.
4 Gutuama egi mavu afugiwe, watutombele ha gukhala hamoshi nu Klisto, hagula tukhale athu a gijila, adi nu guzumba, ashigo nga nu gubola gumoshi gutuama dienji.
5 Handaga wadiangele gututomba gifua an’enji mu njila ya Yesu Klisto, gifua muatshiginyile muene mu felela dienji
6 nu gutumbuga gua khenda jienji jiavula jiatumonesele muene mu njila ya Mun’enji wa guzumba.
7 Nzambi watukatudile mu uhiga mu njila ya mulambu* wa mahatshi wahanele Mun’enji. Mu khenda jienji jiavula watutotesele gubola guetu.
8 Nzambi watuvudishile khenda jiene nu ndunge nu gutema guagasue
9 luholo watukuatesele ha gujiya gisuegi gia gijila gia felela dienji. Wasuangulugile ha gubamba gisuegi giene
10 mukunda nu gutuameza ndaga mu tangua diatagana, ha gubungisa ima yagasue mu Klisto, ima idi mu dilu nu ima idi ha mavu. Yadiago mu Klisto,
11 munu tudi n’enji hamoshi nu tuadiangele gutombewa ha guhinyina n’enji gifua muakhalele felela dia Nzambi yago wana tagenesa ndaga jiagasue jiana laya muene gifua mudi gutshigina guenji,
12 hagula esue tuadiangele gusha gutshigina gudi Klisto tutumbuise Nzambi.
13 Uvi enue nji muashile gutshigina gudi muene tangua muavuile mbimbi ya giamatshidia yatadila lukuma luabonga lua guhuluga guenu. Tangua muatshiginyile, Nzambi wamihagele njimbu mu njila ya nyuma yenji gifua mualayele muene.
14 Nyuma yene idi gifua gima giadiangele guhana Nzambi mukunda nu guhinyina guetu, ha gukatula athu enji mu uhiga mu njila ya gibawu, mukunda nu lutumbu luenji.
15 Gishina giene ame nji, sendese tangua ngavile egi mudi musha gutshigina gudi Fumu Yesu, mudi muzumba nji athu agasue a gijila,
16 ngana landula guhana Nzambi mersi mukunda nu enue. Ngana landula nji gumisha mu isambu yami,
17 hagula Nzambi wa Fumu wetu Yesu Klisto, Tata wa lutumbu, amikuatese ha guheta ndunge jia gukotelesa ndaga jidi muzuela muene ha gumujiya muabonga.
18 Wamikuatesa ha gumona* nu ha gujiya felela didi muene gumibambela nu gubonga mbaguhana muene gudi athu a gijila.
19 Wamikuatesa nji ha gumona ngolo jiabalega gukoma jiana monesa muene gudi enya gutshigina. Wamonesele gukoma gua ngolo jienji
20 tangua diafuzumuine muene Klisto mu gufua. Gungima, wamuhagele gu koko dienji dia madia mu dilu,
21 holu dia baguvernema agasue nu uhinyinyi wagasue nu ngolo jiagasue nu ufumu wagasue nu majina agasue a masugu awa* nu a masugu adi muza.*
22 Nzambi wahagele nji ima yagasue goshi’a ikanzo ya Klisto, wamutombele ha gukhala fumu wa ima yagasue mu hungu.
23 Hungu diene didi muila wa Klisto, udi wa guzala pha nu ndaga jienji jiagasue. Muene wana zalesa ndaga jia maluholo agasue.
Mbimbi goshi'a diyiji
^ Nga “gibawu.”
^ Mu Greke: “gukangula meso a mitshima yenu.”
^ Nga “gindongo egi.” Tala Ukoteleshi wa Mbimbi.
^ Nga “gindongo gidi muza.”
