Gudi Enya gu Efeso 2:1-22
2 Nzambi wamihanele luko monyo, uvi muakhalele a gufua mukunda nu gubola guenu nu masumu enu
2 muakhalele mukalagala thomo tangua muakhalele mulandula ndaga jia ha mavu awa, nu gukalagala gutshigina gua mutuameji wa nyuma ya ha mavu awa, nyuma yene yana khala gifua muhehe udi mutuameza athu agasue ana gulumbugila Nzambi.
3 Thomo tuakhalele gudituameza nawo gifua muakhalele nzala jia muila wetu, tuakhalele mukalagala gutshigina gua muila wetu nu gua matangi etu. Nzambi wakhalele naye gutuvuila khabu luholo lumoshi nu athu ako.
4 Uvi luholo Nzambi wa khenda jiagasue wana gutuzumba muavula,
5 watuhanele luko monyo hamoshi nu Klisto, hoho tuakhalele athu a gufua mukunda nu gubola guetu. Wamihuluishile mukunda nu khenda jienji jiavula.
6 Nzambi watuhanele nji monyo hamoshi nu Klisto Yesu, watukhalesele n’enji hamoshi mu dilu,
7 hagula mu masugu adi muza* muene mbaamonese khenda jienji jiavula nu gubonga guenji gudi esue tudi mu gudivua nu Klisto Yesu.
8 Nzambi wamihuluishile mukunda nu khenda jienji jiavula handaga muashile gutshigina. Muahuluishiwego mukunda nu ndaga muakalegele, uvi idi gutshigina gua Nzambi.
9 Ishigo mukunda nu makalegelo enu, ngenyi muthu gajiyilego gudisunzula.
10 Nzambi watufugile,* luholo tudi alandudi a Klisto Yesu, tuafugiwe mukunda nu gukalagala ndaga jiabonga jinyi jiadiangele guzuela Nzambi hagula tukalagale.
11 Uvi mujimbilago egi thomo “athu anyi ambiwe gu mukanda” akhalele gumitamega enue enya ifutshi iko egi “mushigo athu ambiwe gu mukanda.”
12 Mu tangua diene muakhalelego nu Klisto, muakhalelego enya Isalele,* muakhalelego nji mujiya ikotelo yatadila laji dia Nzambi. Muakhalelego nga nu felela nga nu Nzambi ha mavu awa.
13 Thomo muakhalele gualeha nu Nzambi, uvi henyaha muasuena hehi n’enji mu gudivua nu Klisto Yesu, nu mu njila ya mahatshi enji.
14 Klisto udi guhuima guetu, muene wamuangele gibayi* giakhalele mukhaphumuna mahunji ene mbadi, waabungishile abua hunji dimoshi.
15 Mu njila ya muila wenji, wakatudile Mukhuala wa Moize nu ijila yenji yakhalele mubata umbalagaji, hagula mahunji ene mbadi akhale mu gudivua n’enji, abue muthu mumoshi muhe-muhe, akhale mu guhuima.
16 Wabungishile mahunji ene mbadi, waabuishile hunji dimoshi.* Tangua diashiyiwe muene ha mutshi wa lamba,* wakatudile umbalagaji wakhalele guakhaphumuna nu Nzambi, waakuatesele ha gudivua n’enji.
17 Hajile muene, walongesele lukuma luabonga lua guhuima gudi enue enya ifutshi iko muakhalelego gudivua nu Nzambi nu gudi enya Yuda akhalele mu gudivua n’enji.
18 Handaga muene watukuatesele esue enya mahunji ene mbadi ha gudivua nu Tata mu njila ya nyuma imoshi.
19 Hene, enue mushigo luko enya gifutshi giko nga athu a gualeha, uvi mudi enya gifutshi gimoshi nu athu a gijila. Mudi enya giphuta gia Nzambi.
20 Muatungiwe holu dia fondasio ya apostolo nu baprofete. Uvi Klisto Yesu hakhenji, muene udi seso dia ha khomo ya fondasio.
21 Mu gudivua nu muene, itshinyi yagasue ya inzo idi mubungishiwa muabonga hamoshi ha gubua tempelo ya gijila ya Yehowa.
22 Mu gudivua nu muene, enue nji mudi mutungiwa hamoshi ha gubua fundo diana khala Nzambi mu njila ya nyuma yenji.
Mbimbi goshi'a diyiji
^ Nga “gindongo gidi muza.” Tala Ukoteleshi wa Mbimbi.
^ Nga “tudi midimo ya mago enji.”
^ Mu Greke: “enya giphuta gia Isalele.”
^ Nga “kibindji.”
^ Mu Greke: “muila umoshi.”
^ Tala Ukoteleshi wa Mbimbi.
