Gudi Enya gu Efeso 3:1-21
3 Ame Phaula, muenya bologo mukunda nu Klisto Yesu nu mukunda nu gubonga guenu enya ifutshi iko.
2 Muavile diago lumene lua mudimo wanguhuile Nzambi mu khenda jienji jiavula mukunda nu gubonga guenu
3 nu luholo angumonesele gisuegi gia gijila mu vizio, gifua luholo ngadiangele guyisonega mu mbimbi jiazonda.
4 Ngenyi gula muatanga mukanda wuwu, mbamujiya muabonga luholo ngana kotelesa gisuegi gia gijila giatadila Klisto.
5 Mu indongo yabalega, Nzambi gamoneselego gisuegi giene gudi athu, gifua luholo wagimonesa henyaha gudi apostolo a gijila nu baprofete mu njila ya nyuma yenji,
6 yakotelesa egi, mu gudivua nu Klisto Yesu nu mu njila ya lukuma luabonga, athu a ifutshi iko adi naye guhinyina hamoshi nu Klisto; mbaabua hunji dimoshi* nu mbaaheta gubonga gualayele Nzambi hamoshi nu esue.
7 Ngabuile muenya mudimo wa gisuegi gia gijila handaga Nzambi wangumonesele khenda jiavula mu njila ya nyuma yenji.
8 Mukatshi dia athu agasue a gijila, eme ngushigo nu ndando nga yazonda, uvi Nzambi wanguvidile khenda jiavula hagula ngulongese athu a ifutshi iko lukuma luabonga luatadila umonyi wa Klisto ushigo nu gisugishilo
9 nu ha gukuatesa athu agasue ha gumona utuameji wa gisuegi gia gijila giasuegele Nzambi mufugi wa ima yagasue, sendese mualeha.
10 Yakalegewe ngenyi hagula henyaha mu njila ya hungu, baguvernema nu mafumu a mu mafundo a mu dilu, akotelese ndunge jiavula jia Nzambi jiana monega mu maluholo agudisha.
11 Ndaga yene idi gudivua nu felela dia ivo nu ivo dialondele Nzambi mukunda nu Fumu wetu Klisto Yesu.
12 Mukunda nu gutshigina tuana sha gudi Klisto, tuana zuela woma ndo, tuana kombelela Nzambi nu mutshima umoshi.
13 Hene ngudi gumiwambela egi mulebigo muila mukunda nu malamba ngudi mumona mukunda nu enue, handaga ngudi guamona mukunda nu lutumbu luenu.
14 Gishina giene ngudi mufugama gutuama dia Tata
15 wafugile* fami yagasue idi mu dilu nu idi ha mavu.
16 Ngudi mukombelela egi Nzambi wa lutumbu luakoma amihane ngolo jiana hana nyuma yenji, hagula jikolese mitshima yenu nu matangi enu.*
17 Ngenyi mu njila ya gutshigina guenu, Klisto akhale mu mitshima yenu nu guzumba. Muajiya gujiga miji, muajiya nji gukhala nu fondasio yakola,
18 hagula enue nu athu agasue a gijila mukotelese muabonga gukoma nu guleha nu gitala nu jinga* dia ndaga jia Nzambi,
19 mujiye nji guzumba gua Klisto guabalega ujiyi wagasue, hagula muhete makalegelo agasue a Nzambi.
20 Nzambi wana gutuhana ngolo jiana gutukuatesa. Wajiya nji gutukalegela ndaga jiavula diago gubalega ima yagasue tuana gumutoga nu tuana tangiza.
21 Indongo yagasue imutumbuise ivo nu ivo mu njila ya hungu nu mu njila ya Klisto Yesu. Amen.
Mbimbi goshi'a diyiji
^ Nga “itshinyi ya muila umoshi.”
^ Mu Greke: “wahanele jina gudi.”
^ Mu Greke: “umuthu wenu wa mukatshi.”
^ Nga “ulehelo.”
