Gudi Enya gu Efeso 5:1-33
5 Landulenu gifezegeselo gia Nzambi; muene wana gumizumba muavula handaga mudi an’enji.
2 Khalenu gudizumba mukatshi dienu gifua luholo luatuzumbile Klisto,* wahanele monyo wenji mukunda nu esue* gifua mulambu wa vumba diabonga gudi Nzambi.
3 Uthambi* nu ndaga jia usala jia maluholo agasue nu nzala ya ima yavula ikhadigo mukatshi dienu nga hazonda, handaga mudi athu a gijila;
4 ndaga jia musonyi nu mbimbi jiabola nu ilelesa yabola, nga ndaga jiko jishigo jiatagana jitumbudiwago nji mukatshi dienu, uvi khalenu muhana Nzambi mersi.
5 Handaga enue hakhenu mudi mujiya egi, muthu wagasue udi mukalagala uthambi* nga ndaga jia usala nga muthu udi nu nzala ya ima yavula, yakotelesa egi mukombeledi wa isongo, mbagashigo mungina mu Ufumu wa Klisto nu wa Nzambi.
6 Muthu gamihuigigo nu mbimbi jia githuhu, handaga mukunda nu ndaga eji, Nzambi mbawuhana ndola gudi athu anago gumutumagela.
7 Hene, mudibungisago nawo,
8 thomo muakhalele mu phipha, uvi henyaha mudi mu muanya mu gudivua nu Fumu. Khalenu muwenda gifua athu adi mu muanya;*
9 handaga muanya wana gutukuatesa* ha gukhala nu mutshima wabonga mu ndaga jiagasue, ha gukalagala ndaga jidi jiatagana nu ha guwenda mu giamatshidia.
10 Mubembigo gukamba gujiya ndaga jidi musuanguluisa Fumu.
11 Bembenu gukalagala midimo ya githuhu, uvi monesenu haphelo egi midimo yene idi yabola.
12 Handaga ndaga ana tshita mu gisuegi jikuatesa musonyi ha gujizuela.
13 Muanya wana kuatesa ha gumona ndaga jiagasue haphelo, handaga mu muanya gima giagasue giana monega luholo gidi.
14 Gishina giene ana zuela egi: “Aye udi gu tulo phaphumuga, zuga mu gufua, Klisto mbawugulemela gifua muanya.”
15 Hakiene, temienu hagula muwendjigo gifua athu aheya, uvi wendenu gifua athu atema.
16 Kalegelenu tangua dienu mu luholo luabonga,* handaga masugu adi abola.
17 Ngenyi mukhadigo gifua athu ashigo mutangiza muabonga, uvi landulenu gukamba ha gujiya gula gutshigina gua Yehowa gudi itshi.
18 Mukuatewago matombe,* handaga gukuatewa matombe guana tuma muthu ha gutshita ndaga jiabola, uvi landulenu gudizalesa nu nyuma.
19 Tangua mudi muta maga nu aphangi’enu,* khalenu muyimba ngimbo jia mu nyuma jidi mutumbuisa Nzambi, hamoshi nu miziki mu mitshima yenu ha gutumbuisa Yehowa.
20 Mu jina dia Fumu wetu Yesu Klisto, khalenu muhana Nzambi Tata wetu mersi mukunda nu ima yagasue.
21 Khalenu guditumagela mukatshi dienu, ha gumonesa egi muana nemesa Klisto muavula.
22 Akhetu atumagele alumi’awo gifua luholo ana tumagela Fumu,
23 handaga yala udi fumu wa mukaji’enji gifua luholo Klisto udi Fumu wa hungu. Hungu didi muila wenji, muene wadihuluishile.
24 Luholo hungu diana tumagela Klisto, akhetu nji adi naye gutumagela alumi’awo mu ndaga jiagasue.
25 Enue mala, landulenu guzumba akaji’enu gifua luholo Klisto wazumbile hungu. Wahanele monyo wenji mukunda nu hungu,
26 ha gudibuisa dia gijila nu ha gudiweva nu meya a mbimbi ya Nzambi.
27 Wakalegele ngenyi hagula hungu dikhale diabonga gu meso enji, dikhadigo nu ditona nga usala nga gubola nga nu ndaga jiko jia luholo elu, uvi dikhale dia gijila.
28 Luholo lumoshi nji, mala adi naye guzumba akaji’awo gifua luholo ana zumba muila wawo. Yala wana zumba mukaji’enji wana gudizumba hakhenji.
29 Gushigo nga muthu wana tuna muila* wenji, uvi wana guwudisa nu wana guwubamba gifua muana kalagala Klisto mukunda nu hungu,
30 handaga tudi itshinyi ya muila wenji.
31 “Gishina giene, yala mbawubemba sh’enji nu gin’enji, mbawudibungisa nu mukaji’enji, ene muyadi mbaabua muthu* mumoshi.”
32 Gisuegi egi gia gijila gidi giakoma. Henyaha ngudi muzuela ndaga yatadila Klisto nu hungu.
33 Uvi, yala wagasue mukatshi dienu udi naye guzumba mukaji’enji gifua luholo luana gudizumba muene hakhenji. Mukhetu nji udi naye gunemesa mulumi’enji muavula diago.
Mbimbi goshi'a diyiji
^ Nga ndo yajiya gukhala egi, “gifua luholo luamizumbile Klisto.”
^ Nga ndo yajiya gukhala egi, “mukunda nu enue.”
^ Mu Greke: porneya. Tala Ukoteleshi wa Mbimbi.
^ Tala Ukoteleshi wa Mbimbi.
^ Mu Greke: “gifua ana a muanya.”
^ Mu Greke: “mabundu ana zola muanya adi.”
^ Mu Greke: “sumbienu tangua.”
^ Mu Greke: “vinyo.”
^ Nga ndo yajiya gukhala egi, “mukatshi dienu.”
^ Mu Greke: “musunyi.”
^ Mu Greke: “muila.”
