Gudi Filememo 1:1-25
1 Ame Phaula, muenya bologo mukunda nu Klisto Yesu nu phangi’etu Timote, ngudi musonegela Filemona muenya mudimo na muku’etu tuana zumba muavula,
2 nu phangi’etu wa mukhetu Afia nu Aleshiphe suta na muku’etu nu hungu diana gudibungisa monzo yaye.
3 Nzambi Tata wetu nu Fumu Yesu Klisto amivile khenda jiavula nu amikuatese ha gukhala mu guhuima.
4 Tangua diagasue ngana hana Nzambi mersi ha ngana tanga jina diaye mu isambu yami,
5 handaga ngana vua egi udi nu gutshigina guakola, wana zumba Fumu Yesu nu athu agasue a gijila.
6 Ngudi musamba egi gutshigina udi nago hamoshi nu aphangi ako gugukuatese ha gukotelesa ndaga jiagasue jiabonga tuahetele mu njila ya Klisto.
7 Mun’etu, ngasuangulugile muavula, ngahetele nji gikhesa tangua ngavile lumene lua guzumba guaye. Wakolesele mitshima ya athu a gijila.
8 Gishina giene, ngatshima mukunda nu Klisto ngushigo nu woma wa guguwambela gima giabonga udi naye gukalagala,
9 uvi ngudi gugububila ha gukalagala ndaga eji luholo wana zumba athu ako, handaga ame Phaula ngakola gami, ngudi nji mu bologo mukunda nu Klisto Yesu.
10 Ngudi gugububila mukunda nu Onesimo, muene wabuile gale mun’ami masugu awa ngudi mu bologo.*
11 Thomo gakhalelego nu ndando gu meso aye, uvi henyaha udi nu ndando nu gudi aye nu gudi ame.
12 Ngamuvutula gudi aye, ngana gumuzumba muavula.
13 Ngatshigina egi akhale haha angukuatese ha fundo diaye tangua ngudi mu bologo mukunda nu lukuma luabonga.
14 Uvi ngatshiginyilego gukalagala nga ndaga imoshi aye gujiya ndo, hagula aye utshitshigo ndaga yabonga gifua adi gugushinjiga gu ngolo, uvi uyitshite nu mutshima waye wagasue.
15 Yajiya gukhala gishina giene gialengele muene mukunda nu tangua* diazonda, hagula wajiya guvutuga gudi aye mayilago.
16 Henyaha gashigo luko muhiga, uvi wabalega muhiga. Muene udi mun’etu wa guzumba, ngana gumuzumba muavula, aye mbawumuzumba muavula gubalega gifua muhiga waye nu gifua Muklisto na muku’etu.
17 Gula wana gunguzula ame gifua futa diaye, muyambe gifua luholo wajiya gunguyamba ame.
18 Gula wagutshitshile ndaga yabola nga waguzanguile gima gimoshi, gisonege mu jina diami.
19 Ame Phaula ngudi musonega mukanda wuwu nu koko diami mbangudi guguvutuila nagio. Ngushigo nu funu ya guguwunguluisa egi aye nji udi naye gunguhana monyo waye.
20 Mun’etu, ngudi mutoga ukuateshi gudi aye, handaga tudi alandudi a Fumu. Kolesa mutshima wami mu gudivua nu Klisto.
21 Ngudi muhaga mutshima egi mbawukalagala ndaga ngagutoga. Tangua ngudi musonega mukanda owu, ngudi mujiya egi mbawumutshita ndaga jiavula gubalega eji ngazuela.
22 Uvi ngudi gugutoga nji egi ngulondele fundo dia gubanda, handaga ngudi gudifelela egi mu njila ya isambu yenu mbangumuvutuga gudi enue.*
23 Epafrase muenya bologo n’a muku’etu mukunda nu Klisto Yesu wagutumila moyo.
24 Mako nu Aristarke nu Demase nu Luka, mafut’ami a mudimo agutumila nji lumene.
25 Khenda jiavula jia Fumu Yesu Klisto jikhale nu khadilo diabonga mudi mumonesa.
Mbimbi goshi'a diyiji
^ Mu Greke: “ya gujitshiga malenge.”
^ Mu Greke: “kumbi.”
^ Nga “mbanguzolewa mu bologo mukunda nu enue.”
