Gudi Enya gu Filiphi 1:1-30
1 Ame Phaula nu Timote, ahiga a Klisto Yesu, ngudi musonegela athu agasue a gijila adi mu gudivua nu Klisto Yesu nu akulu nu akuateshi a mudimo adi gu Filiphi:
2 Tata Nzambi nu Fumu Yesu Klisto amivile khenda jiavula nu amikuatese ha gukhala mu guhuima.
3 Tangua diagasue ngana gumitangiza, ngana hana Nzambi mersi
4 mu isambu* yami yagasue ngana kalagala mukunda nu mukut’enu agasue. Ngana gumububila nu gusuanguluga guagasue,
5 handaga sendese lusugu lua thomo uu nu mangino muana gudihana ha gukuatesa* mu mudimo wa gulongesa lukuma luabonga.
6 Ngudi nu gutshigina egi luholo Nzambi wasendesele mudimo owu wabonga mukatshi dienu, mbawumikuatesa nji ha guwumanesela uu nu mu lusugu lua Klisto Yesu.
7 Ngudi naye gutangiza ngenyi mukunda nu enue handaga ngana gumizumba muavula. Mukut’etu agasue Nzambi watuvidile khenda jiavula. Muangukuatesele tangua ngakhalele mu bologo nu tangua ngakhalele mumonesa gutuama dia mafumu egi lukuma luabonga ludi naye gulongesewa.
8 Nzambi udi mujiya egi ngudi nu nzala yakola ya gumimona mukut’enu agasue, handaga ngana gumizumba muavula gifua luholo Klisto Yesu wana gumizumba.
9 Ngudi mulandula gutoga mu gisambu egi mukhale nu guzumba guavula diago nu ujiyi wa giamatshidia nu ukoteleshi watagana,
10 hagula mukambe gujiya ndaga jiabalega ndando, ngenyi muajiya gukhala nu mitshima ya phelegeta nu mubuishigo athu ako mu gubola uu nu mu lusugu lua Klisto,
11 hagula mu ukuateshi wa Yesu Klisto mukhale nu makalegelo abonga ha gunemesa Nzambi nu gumutumbuisa.
12 Aphangi, ngudi gumiwambela egi malamba ngudi mutagana nawo adi mukuatesa hagula mudimo wa gulongesa lukuma luabonga uye gutuama.
13 Athu agasue nu masuta ana bamba inzo ya fumu adi mujiya egi ngudi mu bologo mukunda nu Klisto.
14 Aphangi avula adi mukalagala mudimo wa Fumu aheta gikhesa giavula luholo ngudi mu bologo, ashigo muvua woma ha gulongesa mbimbi ya Nzambi.
15 Athu ako adi mulongesa ndaga yatadila Klisto handaga adi gunguvila fuwa nu adi gunguluisa. Uvi ako adi mulongesa nu mutshima wabonga.
16 Athu anyi ana longesa nu mutshima wabonga, ana guyikalagala handaga ana zumba Klisto. Ana jiya egi ame Phaula ngatombewe mukunda nu guluila lukuma luabonga.
17 Uvi athu anyi ana gulongesa nu giphi giagasue ana guyikalagala nu matangi abola. Adi mutshigina gunguvudishila malamba tangua ngudi mu bologo.
18 Ikhale adi mulongesa ndaga yatadila Klisto nu matangi abonga nga ndo, gushigo mulonga handaga athu wawa guategelela. Ndaga yene idi gungusuanguluisa, mbangulandula nji gusuanguluga
19 handaga ngudi mujiya egi mbanguhuluishiwa mukunda nu isambu yenu nu mu ukuateshi wa nyuma ya Yesu Klisto.
20 Ngudi nu gutshigina nu felela egi mbangushigo muvua musonyi nga mu ndaga imoshi. Uvi henyaha ngushigo muvua woma wa guzuelela ndaga yatadila Klisto gifua luholo ngana tshita gale. Mbangumutumbuisa ikhale ngudi nu monyo nga ngafua.
21 Ngudi mujiya egi gula ngudi nu monyo idi mukunda nu Klisto, uvi gula ngafua idi nji ndaga yabonga.
22 Uvi gula ngafuilego,* mbangukalagala mudimo wavula mukunda nu Klisto; na ngushigo mujiya itshi mbangutomba.
23 Ndaga mbadi jidi gungunana khanda nu khanda: ngudi mutshigina egi nguzolewe mu bologo, ngudi mutshigina nji gukhala nu Klisto. Uvi gukhala nu Klisto guene guabalega ndando.
24 Uvi idi nu ndando yavula egi ngukhale nu monyo* mukunda nu enue.
25 Ngudi nu gutshigina mu ndaga eyi, ngudi mujiya egi mbangukhala nu monyo, mbangukhala n’enu ha gumikuatesa ha gukula mu nyuma hagula gutshigina guenu gumikuatese ha gukhala nu gusuanguluga.
26 Ngenyi tangua mbanguza luko gudi enue, mbamukhale nu gusuanguluga guavula handaga mudi alandudi a Klisto Yesu.
27 Wendenu* mu luholo luatagana ludi gudivua nu lukuma luabonga luatadila Klisto, hagula ikhale ngaza gumitala nga ndo, nguvue egi mudi nu gutshigina guakola, mudi matangi amoshi,* felela dimoshi,* mudi nji mutshita mudimo hamoshi ha gukhala nu gutshigina mu lukuma luabonga.
28 Muvigo woma wa mbalagaji jienu handaga ndaga eji jiagasue jidi mumonesa egi ene mbashiyiwa, uvi enue mbamuhuluishiwa. Nzambi udi guyimonesa haphelo.
29 Muahetele luendu lua gusha gutshigina gudi Klisto nu ha gumona malamba mukunda nu muene.
30 Handaga mudi mumona malamba gifua anyi ngataganele nawo, mudi mujiya nji egi uu nu henyaha ame gami mulua nu malamba ene.
Mbimbi goshi'a diyiji
^ Mu Greke: “gububila.”
^ Nga “ha guhana mago.”
^ Mu Greke: “muila wami wafuilego.”
^ Mu Greke: “muila wami ukhale nu monyo.”
^ Nga “wendenu gifua afumi’a dimbo.”
^ Mu Greke: “pneuma.” Yakotelesa egi ‘nyuma.’
^ Nga “mbimbi imoshi.”
