Gudi Enya gu Filiphi 2:1-30
2 Kalagalenu ngolo ha gukolesa athu ako* mu gudivua nu Klisto, ha guahana gikhesa nu guzumba, ha guakuatesa, nu ha guazumba muavula, nu guavila khenda.
2 Khalenu matangi amoshi, dizumbenu, khalenu nu gudivua guabonga mukatshi dienu, khalenu mutshima umoshi. Gula muatshita ngenyi, mbangusuanguluga muavula diago.
3 Mutshitshigo nga gima gimoshi nu nguma nga nu matangi a gubalega athu ako, uvi khalenu nu khadilo dia gudibulumuisa, khalenu mumona egi athu ako amibalega,
4 mukambigo phamba gubonga guenu, uvi kambenu nji gubonga gua athu ako.
5 Khalenu nu matangi gifua akhalele nawo Klisto Yesu,
6 ngatshima wakhalele gifua Nzambi, uvi gatangijilego nga hazonda ha gudithesa n’enji, yakotelesa egi gukhala luholo lumoshi nu Nzambi.
7 Uvi wabembele ima yagasue yakhalele naye muene, wabuile gifua muhiga, wabuile muthu.*
8 Hajile muene ha mavu gifua muthu,* wadibulumuishile, watumagele Nzambi uu nu mu gufua guenji ha mutshi wa lamba.*
9 Gishina giene Nzambi wamukanduishile holu dia ima yagasue, wamuhanele jina diabalega majina ako agasue,
10 hagula athu agasue* adi mu dilu nu adi ha mavu nu adi goshi’a mavu afugame mu jina dia Yesu.
11 Athu agasue* adi naye gujiya muabonga egi Yesu Klisto udi Fumu mukunda nu gutumbuisa Tata Nzambi.
12 Aphangi ngana zumba muavula, muana tumaga tangua diagasue ngana khala n’enu, mudi mutumaga nji muavula hangushigo n’enu. Ngenyi, kalagalenu ngolo, khalenu nu woma nu gudigita hagula Nzambi amihuluise.
13 Handaga Nzambi wana gumihana nzala nu ngolo jia gutshita ndaga hagula mumusuanguluise.
14 Kalagalenu ndaga jiagasue gunyema* ndo, giphapha ndo,
15 hagula mukhale athu adi nu mitshima ya phelegeta, ashigo nu ditona, ana a Nzambi ashigo nu gubola mukatshi dia gindongo gia athu abola adi mukalagala ndaga jia musonyi. Khalenu mulema mukatshi diawo gifua muanya ha mavu.
16 Kuatenu mangololo mbimbi ya monyo hagula ngajiya gukhala nu gusuanguluga mu lusugu lua Klisto, handaga ngudi mujiya egi ngazanguilego phushi jia githuhu, mudimo wakola ngakalagele wakhalelego wa githuhu.
17 Ngudi gifua mulambu wa matombe* udi mubundudiwa ha giwotshielo. Ngudi gumikuatesa ha gukhala ya gujinginyina gudi Nzambi nu ha gumukalegela mudimo wa gijila, uvi ngudi musuanguluga hamoshi nu enue.
18 Enue nji suangulugenu nu ame.
19 Gualeha ndo gula Fumu Yesu watshigina, ngudi gumitumila Timote hagula mbanguhete gikhesa gula ngavua mene jienu.
20 Handaga ngushigo nu muthu muko udi nu khadilo gifua dienji nu wana gudisagesa muavula mukunda nu enue.
21 Athu ako agasue ana kamba phamba gubonga guawo, uvi gua Yesu Klisto ndo.
22 Uvi mudi mujiya egi Timote gashigo gifua athu ene, tuakalegele n’enji hamoshi mudimo wakola gifua mona nu sh’enji hagula lukuma luabonga luye gutuama.
23 Muene mbangutuma gula ngajiya ndaga mbajingubuila.
24 Ngudi musha mutshima egi gula Fumu watshigina, gualeha ndo ngudi muza.
25 Uvi henyaha ngudi gumitumila Ephafelodite phangi’ami, futa diami wa mudimo, suta gifua ame, muthu muatumile ha gungubatela ima ngakhalele naye funu.
26 Udi muvua uhote wenu, udi nji gudisagesa handaga muavuile egi wakhalele mukata.
27 Wakatele muavula, wabandele gufua, uvi Nzambi wamuvidile khenda, wanguvidile nji nu ame khenda hagula ngukhadigo nu gikenene giavula.
28 Gishina giene ngudi gumutuma muphushi gudi enue, ngenyi gula muamumona mukhale luko nu gusuanguluga, ame nji ngukhadigo luko nu gikenene giavula.
29 Muyambenu nu gusuanguluga guagasue gifua luholo muana yamba alandudi a Fumu, khalenu muzumba athu a luholo elu
30 handaga muene wabandele gufua mukunda nu mudimo wa Klisto.* Watshiginyile gutotesa monyo wenji* ha guza gungukuatesa handaga enue muakhalelego hene ha gungukuatesa.
Mbimbi goshi'a diyiji
^ Mu Greke: “guawambela ndaga jia mu nyuma.”
^ Mu Greke: “wabuile gifua muthu.”
^ Mu Greke: “wajile mu gifuanesa gia muthu.”
^ Tala Ukoteleshi wa Mbimbi.
^ Mu Greke: “mabongo agasue.”
^ Mu Greke: “madimi agasue.”
^ Nga “guboguta.”
^ Mu Greke: “vinyo.”
^ Nga ndo yajiya gukhala egi, “mudimo wa Fumu.”
^ Nga “wambile monyo wenji mu gingoza.”
