Gudi Enya gu Filiphi 3:1-21
3 Aphangi, ha gusugisa, ngudi gumiwambela egi khalenu musuanguluga handaga mudi alandudi a Fumu. Ngushigo muhuila ha gumisonegela ndaga ngamisonegele gale, handaga idi mukunda nu gumibamba.
2 Temenenu athu adi gifua jimbua nu athu ana tshita ndaga jiabola, temenenu nji athu ana shinjiga athu ako ha gumbiwa gu mukanda.
3 Handaga esue tuambiwe gu mukanda wa diago. Nyuma ya Nzambi yana gutukuatesa ha gukalagala mudimo wa gijila. Tudi gudisunzula mukunda nu ndaga jiakalegele Klisto Yesu, tuanago gusha mutshima mu mishambo ya athu.
4 Ame ngudi nu ndaga jiavula gubalega athu ako jiajiya gungutuma ha gusha mutshima mu mishambo ya athu.
Gula gudi nu muthu udi mutangiza egi udi nu ndaga jiavula jiajiya gumutuma ha gusha mutshima mu mishambo ya athu, ame ngamubalega.
5 Angumbile gu mukanda tangua ngakhalele nu masugu 8, ngudi muenya Isalele wa mu giphuta gia Benyamine, ngudi muenya Hebelu, ngavualewe mukatshi dia enya Hebelu; mu ndaga yatadila mukhuala ngudi Mufalese.
6 Ngasagesele hungu muavula diago; ngakhalele mutumagela ndaga jiagasue jiabonga jiakhalele muzuela mukhuala.
7 Uvi ima ngakhalele mumona egi idi nu ndando, ngayibembele nu mutshima umoshi mukunda nu Klisto.
8 Ngabembele ima yagasue handaga ngajiyile egi gujiya ndaga jiatadila Fumi’ami Klisto Yesu gudi nu ndando yavula gubalega. Ngatunyile ima eyi yagasue mukunda nu muene, ngana guyimona gifua ima ya ha shita hagula ngajiya gukhala nu ufuta wakola nu Klisto*
9 nu ha gukhala mulandudi wenji. Ngushigo muzuela egi ngudi muthu wabonga handaga ngana tumagela Mukhuala, uvi ngudi muthu wabonga handaga ngana sha gutshigina gudi Klisto. Yadiago athu ana sha gutshigina gudi Klisto, Nzambi wana guamona egi adi athu abonga.
10 Felela diami didi dia gujiya Klisto nu gujiya ngolo jia gufuzumuga guenji nu gumona malamba amonele muene. Ngudi mutshigina nji gufua gifua muene,
11 hagula gula luholo ludi guene ame nji mbanguhete luendu lua gufuzumuga mu gufuzumuga gua thomo.
12 Uvi khenji nguheta galego gishimbigo giene nga gubua muthu watagana, uvi ngudi mutshita ngolo ha gukalagala ndaga yangutombele* Klisto ha gutshita.
13 Aphangi, ngushigo muzuela egi ngahetele gale gishimbigo giene. Uvi ndaga ya giamatshidia idi egi nganago gutangiza luko ima ngabembele gale, handaga meso ami adi mutala gishimbigo mbanguheta mu masugu adi muza.
14 Ngudi mutshita ngolo ha gutagenesa felela diami dia guheta gishimbigo. Gishimbigo giene gidi monyo wa mu dilu unu Nzambi mbawuhana gudi athu atamegele muene mu njila ya Klisto Yesu.
15 Hene mukut’etu agasue tuakudile gale mu nyuma tukhalenu nu matangi a luholo elu. Uvi gula matangi enu adi agudisha nu awa ngazuelela, Nzambi mbawumikuatesa ha gutangiza gifua luholo ngazuela.
16 Ikhale tuakudile gale luholo lutshi, tubembigo guwenda mu luholo luatagana mu njila yene imoshi.
17 Aphangi, kalagalenu ngolo mukut’enu agasue ha gulandula gifezegeselo giami. Hagenu meso enu gudi athu adi mulandula gifezegeselo gietu.
18 Gudi nu athu ako adi musegulula gufua gua Klisto ha mutshi wa lamba.* Ngana gumiwambela ndaga yawo mbala jiavula, uvi henyaha ngudi gumiwambela nji nayo nu gudila, nu masoji gu meso.
19 Gisugishilo giawo gidi gufua, vumo diawo diene nzambi yawo, ndaga jia musonyi jiene ana gusuanguluga najio; ana tangiza phamba ndaga jia ha mavu.
20 Uvi esue gifutshi gietu gidi mu dilu, guene tudi munengena muhuluishi, Fumu Yesu Klisto nu mutshima zagu-zagu.
21 Ngolo jienji jiavula mbajimukuatesa ha gubalumuna muila wetu wa githuhu hagula ubue muila wa lutumbu gifua wenji, mbajimukuatesa nji ha guhinyina ima yagasue.
Mbimbi goshi'a diyiji
^ Mu Greke: “ha guheta Klisto.”
^ Mu Greke: “wanguhagele koko.”
^ Tala Ukoteleshi wa Mbimbi.
