Gudi Enya gu Filiphi 4:1-23
4 Aphangi ngana guzumba muavula, ngudi nu uhote wenu handaga muana gungusuanguluisa muavula nu mudi gifua gifulu giami gia lutumbu. An’etu ngudi gumibubila ha gusala ya gujinginyina gudi Fumu.
2 Ngudi mububila Evodi nu Sentishe egi akhale nu gudivua guabonga hadi ene mukalegela Fumu mudimo.
3 Ngudi gugutoga nji nu aye futa diami wa mudimo,* muthu wafubidila egi kuatesa akhetu awa handaga ene atshitshile mudimo* wa lukuma luabonga hamoshi nu ame, nu Kelema nu mafut’etu ako a mudimo. Mukut’awo agasue majina awo adi mu mukanda wa monyo.
4 Suangulugenu tangua diagasue mukunda nu Fumu. Ngudi gumiwambela luko egi: Suangulugenu!
5 Monesenu gudi athu agasue egi mushigo enya ndaga jiakola-kola, handaga Fumu udi hehi.
6 Mudisagesago nga mukunda nu ndaga imoshi, uvi kombelelenu Nzambi mukunda nu ndaga jiagasue, mububilenu, muhanenu mersi, muwambelenu nji milonga yenu yagasue.
7 Ngenyi, Nzambi mbawumihana guhuima guabalega ndaga jiagasue athu ajiya gukotelesa. Guhuima guene mbagubamba mitshima yenu nu matangi’enu mu njila ya Klisto Yesu.
8 Aphangi, ha gusugisa ngudi gumiwambela egi landulenu gutangiza ndaga jiagasue jidi jia giamatshidia, jinyi athu ajiya gushila mutshima, jidi jiabonga, jishigo jia usala,* jinyi jidi mukuatesa athu ha gukhala nu guzumba, jidi nu lukuma luabonga, jidi jiatagana nu jidi naye gutumbuishiwa.
9 Ndaga jiagasue ngamilongesele nu eji muatshiginyile nu eji muavile nu eji muamonele gudi ame, jitumagelenu, ngenyi Nzambi wa guhuima mbawukhala n’enu.
10 Ngudi nu gusuanguluga guavula, ngudi muhana nji Fumu mersi handaga muamonesa luko egi muana gungutangiza. Ngudi mujiya egi muana gungutangiza tangua diagasue, uvi muakhalelego nu luholo lua guyimonesa.
11 Ngushigo muzuela ngenyi ha gumonesa egi ngudi nu funu ya ukuateshi, handaga ngana suanguluga nu ima ngudi nayo.
12 Ngudi mujiya luholo lua gukhala nu ima yazonda nu luholo lua gukhala nu ima yavula. Ngajiyile gale luholo lua gukhala nu gusuanguluga mu ndaga jiagasue, ikhale ngudi nu nzala nga ngudi ya gukuta. Ikhale ngudi nu ima yavula nga ngushigo gami nayo.
13 Ngudi nu ngolo jia gukolesela mu ndaga jiagasue handaga Nzambi wana gunguhana ngolo.
14 Uvi muakalegele muabonga luholo muangukuatesele mu malamba ami.
15 Enue enya gu Filiphi, mudi mujiya luko egi tangua muavile lukuma luabonga mu gisendeselo hangakatugile gu Maseduane, gushigo nu hungu diko diangukuatesele, phamba enue.
16 Tangua ngakhalele gu Tesalonike, muangutumile ima ngakhalele nayo funu mbala jiyadi.
17 Ngushigo mukamba egi munguhane ima, uvi ngudi mutshigina egi mukalagale ndaga jiawaha jiajiya gumibatela gubonga guavula.
18 Ngudi nu ima yagasue ngudi nayo funu, ngudi nayo yavula diago. Uvi henyaha ngabua nayo yavula sha handaga ngahetshi ima muangutumina nu phangi Ephafelodite. Ima yene idi gifua mananashi a vumba diabonga, mulambu wana suanguluisa Nzambi.
19 Nzambi wami udi nu ima yavula diago. Hene mu njila ya Klisto Yesu, muene mbawumihana ima yagasue mudi nayo funu.
20 Nzambi Tata wetu atumbuishiwe ivo nu ivo. Amen.
21 Hanenu aphangi agasue a gijila adi mu gudivua nu Klisto Yesu lumene. Aphangi adi nu ame amitumila nji lumene.
22 Athu agasue a gijila nu a monzo ya Sezale* amitumina lumene.
23 Fumu Yesu Klisto amivile khenda jiavula mukunda nu matangi abonga mudi nawo.
Mbimbi goshi'a diyiji
^ Mu Greke: “futa wabonga wa mudimo.”
^ Nga “atshitshile mudimo wakola.”
^ Nga “jiaphelegeta.”
^ Nga “fumu wa enya Roma.”
