Gudi Enya gu Galatiya 1:1-24
1 Ame mupostolo Phaula ngudi gumisonegela mukanda. Gushigo nga muthu wangutombele ha gukhala mupostolo. Uvi ngatombewe gudi Yesu Klisto nu gudi Tata Nzambi, yago wafuzumuine Yesu gu gufua.
2 Ame nu aphangi agasue ngudi nawo, tudi musonegela mahungu a gu Galatiya.
3 Tata Nzambi wetu nu Fumu Yesu Klisto, amivuile khenda jiavula, amihane nji guhuima.
4 Klisto wahanele monyo wenji mukunda nu gubola guetu hagula atuhuluise ha mavu awa abola,* gifua mudi gutshigina gua Tata Nzambi wetu.
5 Nzambi atumbuishiwe ivo nu ivo. Amen.
6 Ngudi gudihula handaga mudi mubemba* muthu wamitamegele mu khenda jiavula jia Klisto, ha gutshigina mbimbi jiko gifua jidi lukuma luabonga.
7 Jiyenu egi gushigo nu lukuma luko luabonga; uvi athu ako adi mutshigina gumiwunganesa nu gubolesa lukuma luabonga luatadila Klisto.
8 Uvi gula muthu mumoshi mukatshi dietu nga muanjelo wa mu dilu, wamilongesa ndaga jidi gifua lukuma luabonga, uvi ndaga jiene jishigo gudivua nu lukuma luabonga tuamilongesele, udi naye gutewa mukumbu.
9 Tuazuelela gale ndaga eyi, uvi henyaha ngudi guyizuelela luko egi gula muthu wamilongesa ndaga jidi gifua lukuma luabonga, uvi ndaga jiene jishigo gudivua nu jinyi muatshiginyine, udi naye gutewa mukumbu.
10 Henyaha ngudi mukamba gusuanguluisa Nzambi nga ngudi mukamba gusuanguluisa athu? Gula nga ngalanduile gukamba gusuanguluisa athu, nga ngabuilego muhiga wa Klisto.
11 An’etu, ngudi mutshigina mujiye egi lukuma luabonga ngamilongesele luakatugilego gudi athu.
12 Ame ngahetelego lukuma elu gudi athu; ishigo nji athu angulongesele nalo, uvi ngaluhetele gudi Yesu Klisto.
13 Yadiago, muavile makalegelo ngakhalele nawo thomo mu Gikombelelo gia enya Yuda. Ngakhalele mumonesa hungu dia Nzambi lamba diakola,* ngakambele nji gushiya hungu diene.
14 Ngakhalele mujiya muavula ndaga jiatadila Gikombelelo gia enya Yuda gubalega athu avula a mu gindongo* giami nu enya mu gifutshi gietu, handaga ngakhalele gudihana muavula mu mishambo ya akhakh’ami.
15 Uvi Nzambi yago watshiginyine egi nguvualewe, nu wangutamegene mu khenda jienji jiavula, watshiginyine egi
16 nguye ngulongese lukuma luabonga gudi athu a ifutshi iko hagula ajiye Mun’enji. Tangua diangutombele muene ha gutshita ngenyi, ngatogelego ukuateshi nga wa muthu mumoshi.*
17 Ngakandugilego nji gu Yelusalema gudi athu anyi abuile apostolo gutuama diami. Uvi ngayile gu Arabi, gungima ngavutugile gu Damase.
18 Gungima dia ivo thathu, ngakandugile gu Yelusalema ha gutala Sefase,* tuabalegesele n’enji masugu 15.
19 Uvi ngamonelego nga mupostolo muko. Ngamonele phamba Yakoba phangi’a Fumu.
20 Henyaha mukunda nu ndaga ngudi gumisonegela, ngudi muzuela gu meso a Nzambi egi ngushigo mumba mambo.
21 Gungima ngayile gu membo a gu Siliya nu a gu Silisia.
22 Uvi aphangi a mu mahungu a gu Yudea anyi akhalele nu gudivua guabonga nu Klisto, akhalelego gungujiya.
23 Akhalele muvua athu muzuela egi: “Muthu wakhalele gutusagesa nu wakhalele mukamba gushiya gikombelelo gietu, udi gale mulongesa lukuma luabonga.”
24 Asendesele gutumbuisa Nzambi mukunda nu ame.
Mbimbi goshi'a diyiji
^ Nga “gindongo egi giabola.” Tala Ukoteleshi wa Mbimbi.
^ Nga “adi gumikatula muphushi gudi.”
^ Mu Greke: “muavula gubalega.”
^ Nga “kanga.”
^ Mu Greke: “ngatogelego ukuateshi wa mu muila nga wa mu mahatshi.”
^ Wana tamegewa nji egi Phetelo.
