Gudi Enya gu Galatiya 2:1-21
2 Gungima dia ivo 14, ngakandugile luko gu Yelusalema nu Barnabase nu Tito.
2 Ngakandugile guene gifua luholo luanguwambelele Fumu. Ngawambelele aphangi lukuma luabonga ngana longesa mukatshi dia athu a ifutshi iko. Uvi ngayikalegele mu gisuegi gutuama dia athu akhalele munemesewa muavula ha gujiya gula mudimo ngakalegele mukunda nu Nzambi wakhalele wabonga nga wa githuhu.
3 Tito tuayile n’enji wakhalele muenya Greke. Uvi gushigo nga muthu wamushinjigile egi ambiwe gu mukanda.
4 Ndaga eyi yazogele mukunda nu enya mambo anginyishiwe mu gisuegi mu hungu. Athu ene anginyine mukatshi dietu nu masunga agasue ha gutukatula mu gudivua nu Klisto Yesu, hagula tuvutuge luko mu uhiga wa mukhuala.
5 Uvi esue tuaavuidilego nga hazonda, tuaatumagelego nji nga mu tangua diazonda,* hagula egi giamatshidia giatadila lukuma luabonga gikhale mukatshi dienu.
6 Uvi mukunda nu athu akhalele mumonega gifua athu a ndando—ikhale ene akhalele gawo luholo lutshi, ishigo nu ndando gu meso ami handaga Nzambi ganago gutala phala jia athu. Athu anyi akhalele munemesewa muavula anguwambelelego nga gima gimoshi gihe-gihe.
7 Uvi tangua amonele egi ngahetele luendu lua gulongesa lukuma luabonga gudi athu adi khenji ambiwe galego gu mukanda, gifua luholo luahetele nji Phetelo luendu lua gulongesa athu ambiwe gale gu mukanda—
8 handaga muthu wahanele Phetelo ngolo jia gukhala mupostolo wa athu ambiwe gale gu mukanda, muene nji wanguhanele ngolo jia gukhala mupostolo wa athu a ifutshi iko.
9 Akotelesele nji egi Nzambi wanguvidile khenda jiavula. Hene Yakoba nu Sefase* nu Yone, akhalele gifua makunji a hungu, atuhanele nu Barnabase koko dia madia ha gumonesa egi atshiginyile* egi tuye gudi athu a ifutshi iko, uvi ene aye gudi athu ambiwe gale gu mukanda.
10 Atuwambelele phamba egi tutangize phutu. Ngakalegele ngolo ha gutshita ngenyi.
11 Uvi tangua diajile Sefase* gu Antiokia, ngamuwambelele ha meso a athu agasue* egi ndaga yatshitshile muene yakhalele yabola.*
12 Handaga gutuama egi athu anyi atumiwe gudi Yakoba ahete, Sefase wakhalele mudia nu athu a ifutshi iko. Uvi tangua diahetele ene, wabembele gudia nawo nu wadikhaphele nawo, handaga wakhalele muvua woma mukunda nu athu anyi ambiwe gu mukanda.
13 Enya Yuda ako nji amulanduile mu mambo enji. Anginyishile nji Barnabase mu mambo awo.
14 Uvi tangua ngamonele egi akhalelego mutshita ndaga mu gudivua nu giamatshidia giatadila lukuma luabonga, ngawambelele Sefase* ha meso a athu agasue egi: “Gula aye muenya Yuda udi mukalagala ndaga gifua luholo athu a ifutshi iko ana tshita, luholo lutshi wajiya gushinjiga athu a ifutshi iko ha gutshita ndaga gifua muana kalagala enya Yuda?”
15 Esue tuavalewe enya Yuda, tushigo enya gubola anyi akatugile mu ifutshi iko.
16 Tudi mujiya egi muthu ganago gutamegewa egi muthu wabonga gu meso a Nzambi mukunda nu ndaga jidi muzuela mukhuala, uvi wana tamegewa egi muthu wabonga gu meso a Nzambi phamba gula udi musha gutshigina gudi Yesu Klisto. Hene esue tuashile gutshigina gudi Klisto Yesu hagula tutamegewe egi athu abonga gu meso a Nzambi mukunda nu gutshigina guetu gudi Klisto uvi mukunda nu ndaga jidi muzuela mukhuala ndo. Handaga gushigo nga muthu* mumoshi mbawutamegewa egi muthu wabonga gu meso a Nzambi mukunda nu ndaga jidi muzuela mukhuala.
17 Henyaha tangua tudi mukamba egi tubue athu abonga gu meso a Nzambi mu njila ya Klisto, gula athu atumona egi tudi enya gubola, idi mukotelesa egi Klisto udi muenya mudimo wa gubola ba? Ndo sha!
18 Gula ngatunga luko ima inyi ngamuangele thomo, mbangumonesa egi ngudi mushiyi wa mikhuala.
19 Handaga luholo ngakhalele mutumagela mikhuala idi gifua ngafile mukunda nu mikhuala, hagula ngukhale nu monyo mukunda nu Nzambi.
20 Ngakhokhewe ha mutshi hamoshi nu Klisto. Ishigo luko ame ngudi nu monyo, uvi Klisto udi nu monyo mu gudivua nu ame. Yadiago, monyo ngudi nawo henyaha mu muila, ngudi nawo mukunda nu gutshigina ngana gusha gudi Mun’a Nzambi, munu wanguzumbile nu wadihanele mukunda nu ame.
21 Ngushigo mutuna* khenda jiavula jiatuvidile Nzambi, handaga gula muthu watamegewa egi muthu wabonga gu meso a Nzambi mukunda nu ndaga jidi muzuela mukhuala, idi mumonesa egi Klisto walabele genji gufua.
Mbimbi goshi'a diyiji
^ Mu Greke: “tangua dimoshi.”
^ Wana tamegewa nji egi Phetelo.
^ Nga “atuhanele koko dia madia ha gumonesa egi adibungishile nu esue.”
^ Wana tamegewa nji egi Phetelo.
^ Nga “ngatunyile mbimbi jienji haphelo.”
^ Nga “wafishiwe milonga.”
^ Wana tamegewa nji egi Phetelo.
^ Mu Greke: “muila.”
^ Nga “ngabishidilego.”
