Gudi Enya gu Galatiya 3:1-29
-
Gukhala nu gutshigina guabalega gukalagala ndaga jidi muzuela Mukhuala (1-14)
-
Muthu wabonga mbawukhala nu monyo mukunda nu gutshigina guenji (11)
-
-
Laji diahanele Nzambi gudi Abalahama diataganelego mu njila ya Mukhuala (15-18)
-
Klisto udi mujigulu wa Abalahama (16)
-
-
Gishina Nzambi wahanele Mukhuala nu felela dia mukhuala wene (19-25)
-
Muana tamegewa egi ana a Nzambi handaga muana gusha gutshigina gudi Klisto (26-29)
-
Athu a Klisto adi ajigulu a Abalahama (29)
-
3 Enue enya Galatiya muaheya! Nanyi wamihuiga, handaga tuamilongesele muabonga ndaga yatadila gushiyiwa gua Yesu Klisto ha mutshi.
2 Ngudi mutshigina gumihula* muhu umoshi: Muahetele nyuma ya Nzambi handaga muakalegele ndaga jiana zuela mukhuala, nga ndo handaga muashile gutshigina gu lukuma luabonga muavile?
3 Mudi lume athu aheya ba? Gu gisendeselo muatshiginyile egi nyuma ya Nzambi imituameze,* henyaha gu gisugishilo mudi mulandula matangi a athu ba?*
4 Mualabele gumona malamba avula ba? Ngudi muzuela giamatshidia egi mualabelego genu diago gumona malamba.
5 Muthu wana gumihana nyuma nu wana tshita ndaga jia gushimana mukatshi dienu, wana guyikalagala handaga muana tshita ndaga jiana zuela mukhuala, nga handaga muana gusha gutshigina mu lukuma luabonga muavile?
6 Idi nji luholo lumoshi mukunda nu Abalahama. Abalahama “washile gutshigina gudi Yehowa, hene watangewe egi udi muthu wabonga gu meso enji.”
7 Mudi mujiya muabonga egi athu adi nu gutshigina, ene adi ana a Abalahama.
8 Mukanda wa Nzambi wadiangele guzuela egi Nzambi mbawutamega athu a ifutshi iko egi adi athu abonga gu meso enji mukunda nu gutshigina. Wadiangele nji guwambela Abalahama lukuma luabonga egi: “Athu a ifutshi yagasue mbaakhala nu gusuanguluga mu njila yenji.”
9 Hene athu anyi adi nu gutshigina adi musuanguluishiwa hamoshi nu Abalahama, yago wakhalele nu gutshigina.
10 Athu agasue anyi ana gusha mutshima mu ndaga jidi muzuela mukhuala, atewe gale mukumbu, handaga mukanda wa Nzambi udi muzuela egi: “Muthu wagasue gashigo nu khadilo dia gutumagela ndaga jiasonegewe mu mukanda wa Mikhuala, udi naye gutewa mukumbu.”
11 Idi mumonega nji haphelo egi muthu ganago gutamegewa egi muthu wabonga gu meso a Nzambi mukunda nu ndaga jidi muzuela mukhuala, handaga “muthu wabonga mbawukhala nu monyo mukunda nu gutshigina guenji.”
12 Mukhuala wanago gutoga muthu ha gukhala nu gutshigina. Uvi udi muzuela egi “muthu wagasue udi mutumagela mukhuala, mbawukhala nu monyo mukunda nu mukhuala.”
13 Klisto watusumbile nu watukudile mu uhiga wa mukumbu wa Mikhuala, ngenyi muene wabuile mukumbu ha fundo dietu. Mukanda wa Nzambi udi muzuela egi: “Muthu wagasue washiyiwa ha mutshi, udi muthu watewa mukumbu.”
14 Yakalegewe ngenyi hagula athu a ifutshi iko ahete gusuanguluga gua Abalahama mu njila ya Klisto Yesu, nu hagula egi esue nji tuhete nyuma yatulayile Nzambi mukunda nu gutshigina guetu.
15 Aphangi, ngudi gumihana gifezegeselo gia ndaga athu ana kalagala muavula: Gula athu akota gikotelo, ikhale gikotelo giene giakotewa phamba gudi muthu mumoshi, gushigo nu muthu wajiya gugishiya nga gulunda ndaga jiko holu dia gikotelo giene.
16 Nzambi wahanele laji gudi Abalahama nu gudi mujigulu* wenji. Mukanda wa Nzambi ushigo muzuela egi “nu gudi ajigulu aye,”* ha gumonesa gifua adi avula. Uvi udi muzuela egi “nu gudi mujigulu waye,”* ha gumonesa egi udi mumoshi, muene Klisto.
17 Ngudi muzuela luko egi: Mikhuala yajile gungima dia ivo 430, uvi ishigo mushiya gikotelo giadiangele gukota Nzambi nga gukatula laji diahanele muene.
18 Gula khapho dia ima yana hana Nzambi, wana guyihana mukunda nu mikhuala, idi mumonesa egi ganago guyihana luko mukunda nu gutendelela. Uvi Nzambi wayihanele gudi Abalahama nu mutshima umoshi mu gutendelela guamutendelele muene.
19 Gula idi ngenyi, mukunda natshi Mikhuala yahanewe giwa? Mikhuala yalundjiwe ha gumonesa ndaga jiabola haphelo, uu nu tangua mbadiza mujigulu* yago Nzambi walayile Abalahama. Mikhuala yahanewe nji mu njila ya anjelo ha mago a mutageneshi wa gikotelo hakatshi dia athu nu Nzambi.
20 Gula gikotelo gidi mutadila phamba muthu mumoshi, mutageneshi wa gikotelo ganago gukhala nu funu. Uvi Nzambi udi phamba mumoshi.
21 Mikhuala idi mbalagaji ya gutendelela gua Nzambi ba? Ndo sha! Handaga gula nga mikhuala yahanewe mukunda nu guhana athu monyo, nga athu ana tamegewa egi athu abonga gu meso a Nzambi phamba gula atumagela mikhuala.
22 Uvi Mukanda wa Nzambi wamonesele egi athu anginyishiwe mu uhiga wa gubola. Hakiene, enya gutshigina ajiya guheta gubonga gualayele Nzambi gudi athu adi musha gutshigina gudi Yesu Klisto.
23 Uvi gutuama dia gusha gutshigina gudi Klisto, tuakhalele mu uhinyinyi wa mikhuala; yakhalele gutubamba, tuakhalele munengena ndaga mbajimonesa Nzambi.
24 Hene Mukhuala wabuile giledi* gietu uu nu tangua diajile Klisto, hagula tubue athu abonga gu meso a Nzambi mukunda nu gutshigina.
25 Uvi henyaha luholo tudi musha gutshigina gudi Klisto, tushigo luko mu uhinyinyi wa giledi.*
26 Yadiago, luholo muana gusha gutshigina gudi Klisto Yesu, mukut’enu agasue mudi ana a Nzambi.
27 Handaga mukut’enu agasue muabatijiwe mu Klisto, muasudigile Klisto.
28 Gushigo nu muenya Yuda nga muenya Greke, gushigo muhiga nga muthu gashigo muhiga, gushigo yala nga mukhetu handaga mukut’enu agasue muakhala nu gudivua guabonga nu Klisto Yesu.
29 Gula mudi athu a Klisto, ngenyi mudi diago ajigulu* a Abalahama, mbamuheta khapho dialayile Nzambi gudi Abalahama.
Mbimbi goshi'a diyiji
^ Mu Greke: “gukamba gujiya.”
^ Mu Greke: “muasendesele nu nyuma.”
^ Mu Greke: “mudi mubemba egi ndaga jia muila jimituameze ba?”
^ Mu Greke: “vungu.”
^ Mu Greke: “vungu.”
^ Mu Greke: “vungu.”
^ Mu Greke: “vungu.”
^ Nga “ndeji.”
^ Nga “ndeji.”
^ Mu Greke: “vungu.”
