Gudi Enya gu Galatiya 4:1-31
4 Ngudi muzuela egi gula muthu yago udi naye gusala nu umonyi udi mona wazonda, muene udi fumi’a ima yagasue, uvi gashigo yagudisha nu muhiga.
2 Udi naye gutumagela athu adi mubamba ima yagasue nu tuphita uu nu mu tangua diahagele sh’enji.
3 Esue nji tangua tuakhalele ana azonda, tuakhalele ahiga a ndaga* jia ha mavu awa.
4 Uvi hataganele tangua diatombewe, Nzambi watumine Mun’enji munu wavalewe gudi mukhetu mumoshi, nu wakhalele nji mutumagela mukhuala.
5 Muene wajile ha gusumba nu ha gukatula athu akhalele mu uhiga wa mikhuala, hagula Nzambi atutshigine ha gubua gifua an’enji.
6 Luholo enue mudi an’enji, Nzambi watumine nyuma ya Mun’enji mu mitshima yetu. Nyuma yene idi mukaluga egi: “Abba,* Tata!”
7 Hene ushigo luko muhiga, uvi udi mun’a Nzambi; gula udi mun’a Nzambi, muene mbawuguhana ima yana bamba muene mukunda nu an’enji.
8 Uvi tangua muakhalelego mujiya Nzambi, muakhalele ahiga a nzambi jia mambo.
9 Henyaha muajiya gale Nzambi, muene nji wamijiya. Uvi luholo lutshi mudi muvutugila luko ndaga jia githuhu jia ha mavu awa, nu mudi mutshigina gubua luko ahiga a ndaga jiene?
10 Muana nemesa muabonga masugu nu mbeji nu sungi nu ivo.
11 Ngudi muvua woma egi tangua diko mudimo wakola ngakalegele ha gumikuatesa, ukhale wa githuhu.
12 Aphangi, ngudi gumibubila egi buenu gifua ame, handaga ame nji ngakhalele gifua enue. Muangukalegelego nga gubola gumoshi.
13 Uvi mudi mujiya egi misongo yanguhanele luendu lua gumilongesa lukuma luabonga mbala ya thomo.
14 Misongo yami yamisagesele muavula. Uvi muangutunyilego nu muanguseguluilego.* Muanguyambele gifua muanjelo wa Nzambi, gifua Klisto Yesu.
15 Gusuanguluga muakhalele nago guaya gui? Handaga ngudi muzuela mukunda nu enue egi nga luholo luakhalele guene, nga muakatuile meso enu ha gunguhana nawo.
16 Henyaha ngabua mbalagaji wenu handaga ngudi gumiwambela giamatshidia ba?
17 Athu ako adi mukalagala ngolo ha gumibinga. Uvi ashigo guyitshita nu matangi abonga. Adi mutshigina gumikhaphumuna nu ame, hagula mukhale nu nzala yakola ya gualandula.
18 Uvi gula muthu udi mukalagala ngolo ha gumibinga mukunda nu ndaga yabonga, ishigo ndaga yabola ndo. Uvi gashigo naye guyitshita phamba mu tangua ngudi n’enu.
19 An’ami azonda, ngudi mumona luko lamba mukunda nu enue. Lamba diene didi gifua misongo yana guvua mukhetu mu tangua dia guvuala. Mbangulandula gukhala nu lamba edi uu nu tangua mbamumonesa makalegelo gifua a Klisto.
20 Ngudi muvua nzala ya gukhala n’enu luenyelu, hagula ngumiwambele ndaga mu luholo luko. Handaga ngushigo mujiya itshi ngajiya gukalagala mukunda nu enue.
21 Enue muana tshigina gutumagela mikhuala, nguwambelenu, mushigo mujiya ndaga yana zuela Mikhuala ba?
22 Ha gufezegesa, mukanda wa Nzambi udi muzuela egi Abalahama wakhalele nu ana a mala mbadi. Mumoshi wamuvalele nu muenya mudimo wenji wa mukhetu, uvi muko wamuvalele nu mukhetu gashigo muhiga.
23 Mona wavalewe gudi muenya mudimo wa mukhetu wavalewe gifua luholo ana agasue ana valewa.* Uvi mona yonu wavalewe gudi mukhetu gashigo muhiga wavalewe mu gutendelela gua Nzambi.
24 Ndaga eji jidi nu ukoteleshi wa luholo lua gifuanesa; akhetu awa adi mumonesa ikotelo mbadi. Gikotelo gimoshi gidi gia gu Mulundu wa Sinayi, gidi muvuala ana ha gubua ahiga. Giene gidi gifua Agare.
25 Agare udi mumonesa Mulundu wa Sinayi wa gu Arabi, muene udi gifua Yelusalema ya mangino, handaga muene nu an’enji adi ahiga.
26 Uvi Yelusalema ya mu dilu ishigo mu uhiga, yene idi gifua mama wetu.
27 Mukanda wa Nzambi udi muzuela egi: “Aye mukhetu wa gisula,* suanguluga; mba miyelele ya gusuanguluga, aye udi khenji wavile galego misongo ya guvala; handaga an’a mukhetu wabembewe adi avula gubalega an’a mukhetu udi nu yala.”
28 Aphangi, enue mudi an’a gutendelela gifua muakhalele Isaka.
29 Uvi mu tangua dinyi, mona wavalewe mu luholo luana valewa ana agasue,* wasendesele gusagesa mona wavalewe mu ukuateshi wa nyuma. Idi nji luholo lumoshi mangino.
30 Uvi mukanda wa Nzambi udi muzuela itshi? Udi muzuela egi: “Kaya muenya mudimo wa mukhetu nu mun’enji, handaga mona wa muenya mudimo mbagashigo muzangula khapho dia ima hamoshi nu mona wa mukhetu gashigo muhiga.”
31 Hene aphangi, esue tushigo an’a mukhetu wa muenya mudimo, uvi tudi an’a mukhetu munu gashigo muhiga.
Mbimbi goshi'a diyiji
^ Nga “ndaga jia thomo.”
^ Mu zuelelo dia Hebelu nga dia araméen yakotelesa egi “O Tata!”
^ Nga “muangufitshilego mate.”
^ Mu Greke: “mu muila.”
^ Nga “gikunya.”
^ Mu Greke: “mu muila.”
