Gudi Enya gu Galatiya 6:1-18
6 Aphangi, gula muthu mumoshi wakalagala ndaga yabola uvi muene nu gujiya ndo, enue mudi agukula mu nyuma, kambenu gumukuatesa nu gutuluga guagasue. Uvi tema hagula aye nji ubuigo mu gubola.
2 Landulenu gudibatesa inemo, ngenyi mbamutagenesa mukhuala wa Klisto.
3 Handaga gula muthu udi gudimona egi udi nu ndando, hoho muene gashigo genji nu ndando, udi gudihuiga.
4 Uvi muthu nu muthu udi naye gutadila midimo idi mutshita muene hakhenji, gudifuanesa ndo nu muthu muko. Ngenyi mbawusuanguluga mukunda nu ndaga jidi mutshita muene.
5 Handaga muthu nu muthu mbawudibatela ginemo gienji.
6 Muthu wagasue udi mulongesewa mbimbi ya Nzambi, akhaphe ima yenji yagasue yabonga nu muthu udi gumulongesa mbimbi yene.
7 Mudihuigigo. Nzambi ganago gulelewa. Handaga ima idi mukuna muthu, yene mbayikatula muene.
8 Muthu udi mukuna ha gusuanguluisa muila wenji mbawumuna gufua. Uvi muthu udi mukuna ha gusuanguluisa nyuma ya Nzambi, mbawuheta monyo wa ivo nu ivo mukunda nu nyuma.
9 Hene tubembigo gukalagala ndaga jiabonga, handaga gila tangua diatagana, mbatukatula mbuto gula tualebelego muila.*
10 Gula luholo ludi guene,* tutshitenu ndaga jiabonga gudi athu agasue, uvi muavula gubalega gudi aphangi’etu tudi nawo gutshigina gumoshi.
11 Talenu gukoma gua isona ya mukanda ngamisonegela nu koko diami.
12 Athu agasue anyi adi mutshigina gudimonesa gu meso a athu ako* egi adi athu abonga, ene adi mutshigina gumishinjiga ha gumbiwa gu mukanda. Adi mutshita ngenyi phamba hagula asagesewago mukunda nu mutshi wa lamba* wa Klisto.
13 Handaga nu ene athu ana mbiwa gu mukanda, anago gutumagela Mukhuala. Uvi adi mutshigina egi mumbiwe gu mukanda hagula ahete luendu lua gudisunzula mukunda nu enue.*
14 Ame nganago gudisunzula nga hazonda mukunda nu ndaga iko. Uvi ngana gudisunzula phamba mukunda nu mutshi wa lamba* wa Fumi’etu Yesu Klisto. Mukunda nu muene, ngana mona athu a ha mavu awa gifua athu a gufua.* Ene nji ana gungumona gifua muthu wa gufua.
15 Handaga gumbiwa gu mukanda nu gutuna gumbiwa gu mukanda ishigo nu ndando. Uvi gima gidi diago nu ndando gidi gubuishiwa muthu muhe-muhe gudi Nzambi.
16 Guhuima nu khenda gukhale nu athu agasue adi muwenda mu luholo luabonga mu gudivua nu mukhuala owu, ayi, gudi Isalele ya Nzambi.
17 Sendese mangino, nga muthu mumoshi gangusagesago handaga ngudi nu njimbu mu muila wami jidi mumonesa egi ngudi muhiga wa Yesu.
18 Aphangi, khenda jiavula jia Fumi’etu Yesu Klisto jikhale nu makalegelo abonga mudi mumonesa. Amen.
Mbimbi goshi'a diyiji
^ Nga “tuabembelego.”
^ Mu Greke: “tangua diatagana.”
^ Nga “adi mutshigina gudimonesa mu muila.”
^ Tala Ukoteleshi wa Mbimbi.
^ Mu Greke: “mu mila yenu.”
^ Tala Ukoteleshi wa Mbimbi.
^ Nga “akhokhewe ha mutshi.”
