Gumonesa Gudi Yone 1:1-20
1 Jiji ndaga jiamonesele Yesu Klisto; Nzambi wamuwambelele najio ha gumonesa ahiga enji ndaga jidi hehi ha gutagana. Yesu watumile muanjelo wenji ha gumonesa ndaga jiene mu ijiyishilo gudi Yone muhiga wa Nzambi.
2 Yone walongesele ndaga jiatadila mbimbi ya Nzambi nu ndaga jiatadila malongo a Yesu Klisto, ayi, nu ndaga jiagasue jiamonele muene.
3 Gusuanguluga gudi nu muthu udi mutanga mu dijui diakola nu athu adi mutegelela mbimbi idi mu profesi eyi nu athu adi mutumagela ndaga jidi jia gusonega muene, handaga tangua diatombewe diasuena hehi.
4 Ame Yone ngudi musonegela mahungu sambadi a mu provense ya Azi:
Ngudi mukombelela hagula muhete khenda jiavula nu guhuima gudi mukatuga gudi “Muthu udi guene, yonu wakhalele nu yonu udi muza” nu gua nyuma sambadi jidi gutuama dia nguasa yenji ya ufumu
5 nu gua Yesu Klisto, “Temue wa Gujinginyina,” “muthu wa thomo wafuzumugile mu gufua,” “Fumu wa mafumu a ha mavu.”
Yesu watuzumbile nu watukatuile mu uhiga wa gubola guetu mu njila ya mahatshi enji —
6 nu watshitshile egi tubue mafumu nu nganga-nzambi ha gukalegela Nzambi, Tata wenji, ayi, atumbuishiwe nu ahete ngolo mayilago. Amen.
7 Talenu! Yowu muza mu matuta, athu agasue mbaamumona nu ene anyi amutuile mulumbu. Iphuta yagasue ya ha mavu mbayidila nu gikenene mukunda nu muene. Ayi, ndaga eji mbajitagenesewa diago. Amen.
8 Yehowa Nzambi udi muzuela egi: “Ame ngudi Alfa nu Omega.* Muthu udi guene, wakhalele nu udi muza, Nzambi wa Ngolo Jiagasue.”
9 Ame phangi’enu Yone, muthu udi mumona n’enu malamba nu mbawuheta n’enu ufumu hamoshi nu udi mukolesela hamoshi n’enu handaga ngudi mulandudi wa Yesu. Ngakhalele gu hongo diana tamegewa egi Patimose, handaga ngalongesele ndaga yatadila Nzambi nu ndaga yatadila Yesu.
10 Mu ngolo jia nyuma ya Nzambi, ngahetele mu lusugu lua Fumu, ngavile dijui diakola gungima diami gifua dia phungi
11 muzuela egi: “Ndaga udi mumona, jisonege mu rulo ujitume mu mahungu sambadi: gu Efeso, gu Similene, gu Phelegame, gu Tiyatile, gu Sarde, gu Filadelefiya nu gu Laodise.”
12 Ngabalumugile ha gutala muthu wakhalele muzuela nu ame, tangua ngabalumugile ngamonele ihagelo ya mienda sambadi ya wolo,
13 hakatshi dia ihagelo ya mienda yene ngamonele muthu mumoshi gifua mun’a muthu, wakhalele wagusudiga mulele waleha uu nu gu ikanzo, wakhalele nji nu mukaba wa wolo ha thulo yenji.
14 Sanga dia gu muto wenji diakhalele dia phelegeta diago gifua linene ilaphe, meso enji akhalele gifua dimi dia tshuya.
15 Ikanzo yenji yakhalele muhenya gifua kuivre ya phelegeta idi mulema ha tshuya, dijui dienji diakhalele gifua matululu a meya avula.
16 Wakhalele nu themua sambadi gu koko dienji dia madia, phogo ya khusa yaleha ya mazo abala yazogele mukano dienji, phala yenji yakhalele muhenya gifua hana henya kumbi.
17 Tangua ngamumonele, ngabuile mu malu enji gifua muthu ya gufua.
Muene wangukuatele nu koko dienji dia madia, wanguwambelele egi: “Uvigo woma. Ngudi muthu wa Thomo nu wa Gisugishilo,
18 ngudi muthu udi nu monyo. Ngafile, uvi henyaha tala, ngudi nu monyo ivo nu ivo. Ngudi nji nu saphi jia gufua nu jia Malumba.*
19 Hene, sonega ndaga eji wamonyi nu ndaga jidi mubalega luenyelu nu ndaga mbajikalegewa gungima dia ndaga eji.
20 Gisuegi gia gijila gia themua sambadi wamonyi ha koko diami dia madia nu ihagelo ya mienda sambadi ya utadi wa wolo gienyegi: Themua sambadi jidi mumonesa anjelo a mahungu sambadi. Ihagelo ya mienda sambadi idi mumonesa mahungu sambadi.
Mbimbi goshi'a diyiji
^ Nga “A nu Z.” Alfa idi gisona gia thomo, Omega idi gisona gia gisugishilo mu zuelelo dia Greke.
^ Nga “Hadese.” Fundo ana funda athu agasue. Tala Ukoteleshi wa Mbimbi.
