Gumonesa Gudi Yone 11:1-19
11 Anguhanele mutshi umoshi gifua muhango,* dijui dimoshi dianguwambelele egi: “Zuga, thesa fundo dia gijila dia tempelo ya Nzambi nu giwotshielo nu athu adi mukombelela mukatshi,
2 uvi gibanzala gidi hanze ya fundo dia gijila dia tempelo gibembe, ugitheshigo, handaga giahanewe gudi enya ifutshi. Ene mbaadiata dimbo dia gijila mbeji 42.
3 Mbangutuma matemue ami mbadi agusudiga jisagi* ha gulongesa masugu 1 260.”
4 Matemue ene adi mitshi mbadi ya olive nu ihagelo ya mienda iyadi, adi agumagana gutuama dia Fumu wa ha mavu.
5 Gula muthu watshigina guatshita gubola, tshuya mbatuzoga mu makano awo, mbatuwotshia mbalagaji jiawo. Muthu wagasue watshigina guatshita gubola mbawushiyiwa luholo lulu.
6 Ene adi nu ngolo jia gukanga dilu* hagula mvula inogigo mu masugu agasue adi ene mulongesa. Adi nji nu ngolo jia gubalumuna meya abui mahatshi nu ajiya nji gubata malamba avula ha mavu mu luholo atshigina.
7 Tangua mbadimanesela ene gulongesa, shitu ya mu foto idi muzoga mu wina dishigo nu gisugishilo mbayaluisa, mbayabinga nu mbayashiya.
8 Mvumbi jiawo mbajibembewa mu bala-bala diakoma dia dimbo diakoma didi mutamegewa mu luholo lua gifuanesa egi Sodoma nu Ejipitu, fundo diakhokhewe Fumu yawo ha mutshi.
9 Athu a ilema ya muila ya gudisha, nu iphuta, nu mazuelelo, nu ifutshi, mbaatala mvumbi jiawo masugu thathu nu ndambo. Mbaashigo mutshigina egi afundiwe mu malumba.
10 Enya ha mavu mbaasuanguluga muavula mukunda nu gufua gua baprofete awa mbadi, mbaakalagala mawano nu mbaaditumila ba kado handaga baprofete awa mbadi akhalele guasagesa.
11 Gungima dia masugu thathu nu ndambo, Nzambi waambile muhehe wa monyo hene azugile. Athu anyi a amonele avile woma wavula.
12 Ene avile dijui diakola mukatuga mu dilu guawambela egi: “Kandugenu gugu.” Akandugile mu dilu mu tuta, mbalagaji jiawo jiaamonele.*
13 Mu tangua diene mavu adigitshile mangololo, gitshinyi gimoshi mukatshi dia itshinyi 10 ya dimbo giabuile. Athu 7 000 ashiyiwe gu gudigita gua mavu. Athu ako anyi asalele avile woma nu atumbuishile Nzambi wa mu dilu.
14 Lamba dia ngiadi diabalega gale. Tegelela! Lamba dia thathu dimuza muphushi.
15 Muanjelo wa sambadi washigile phungi yenji. Majui akola azogele mu dilu, azuelele egi: “Ufumu wa ha mavu wabua ufumu wa Fumu wetu nu wa Klisto wenji, muene mbawuhinyina ivo nu ivo.”
16 Akulu 24 anyi akhalele ha nguasa jiawo jia ufumu gutuama dia Nzambi afulumigile phala jiawo mu mavu nu akombelele Nzambi.
17 Azuelele egi: “Yehowa Nzambi, tuaguhana mersi, aye Nzambi wa Ngolo Jiagasue, munu udi guene nu wakhalele, handaga wakalegela ngolo jiaye jiakoma nu wasendesa guhinyina.
18 Ifutshi yagasue ya ha mavu yavile khabu, aye nji wavile khabu. Tangua diatombewe diatagana ha gusophesa athu a gufua nu ha guhana lufuto gudi ahiga aye anyi adi baprofete nu gudi athu a gijila nu gudi athu anyi adi muvua woma wa jina diaye, nu athu azonda nu athu akoma* nu ha gushiya athu adi mubolesa mavu.”
19 Fundo dia gijila dia tempelo ya Nzambi idi mu dilu diakangugile. Mushete wa gikotelo gienji wamonegele ha fundo dia gijila dia tempelo yenji. Ngamonele guhenya gua mvula, ngavile majui nu miandu, mavu adigitshile, mvula ya may’a nzanza yanogele.
Mbimbi goshi'a diyiji
^ Nga “muhango wa guthesela.”
^ Nga “ngombo.”
^ Nga “gosa.”
^ Nga “jiakhalele guaatala.”
^ Nga “athu ashigo nu ndando nu athu adi nu ndando.”
