Gumonesa Gudi Yone 12:1-17
12 Ndaga* imoshi yakoma ya gushimana yamonegele mu dilu: Mukhetu mumoshi wakhalele wa gusudiga kumbi, ngonda yakhalele goshi’a ikanzo yenji, wakhalele nu gipho gu muto wenji gialondewe nu themua 12,
2 wakhalele gu vumo, wakhalele mukaluguga mukunda nu misongo nu lamba dia guvuala.
3 Ndaga iko ya gushimana yamonegele mu dilu. Tala! Dragona yakoma yabenga gifua tshuya, yakhalele nu mito sambadi nu mbinga kumi, holu dia mito yenji yagasue hakhalele nu ipho ya ufumu.
4 Mukila wenji wananele gitshinyi gimoshi mukatshi dia itshinyi thathu ya themua jia mu dilu, wajibishidile ha mavu. Dragona yene yamagenele gutuama dia mukhetu munu wakhalele mutshigina guvuala, hagula tangua divuala muene, yene yidie mun’enji.
5 Mukhetu muene wavualele mona wa yala munu mbawutuameza ifutshi yagasue nu muhango wa utadi. Akatuile mona muene muphushi amubatele gudi Nzambi nu gu nguasa yenji ya ufumu.
6 Mukhetu muene walengele, wayile mu mavu a luselenga, guene Nzambi wamulondediele fundo, nu guene mbaakhala gumudisa masugu 1 260.
7 Ita yazogele mu dilu: Mikaele* nu anjelo enji aluishile dragona, dragona nu anjelo enji aluile
8 uvi abingilego,* guakhalelego luko nga fundo dimoshi mukunda nu ene mu dilu.
9 Dragona yakoma yabishidiwe, nyoga ya mualeha, inyi yana tamegewa egi Diabulu nu Satana, munu wana huiga athu a ha mavu agasue, wabishidiwe ha mavu, nu anjelo enji abishidiwe n’enji.
10 Ngavile dijui diakola mu dilu muzuela egi:
“Henyaha guhuluga nu ngolo nu Ufumu wa Nzambi wetu nu uhinyinyi wa Klisto wenji watagenesewa, handaga abishila muthu wana funda aphangi’etu, munu wana guafunda phipha nu muanya gutuama dia Nzambi wetu!
11 Ene amubingile mu njila ya mahatshi a mun’a gimeme nu mu njila ya mbimbi jialongesele ene, azumbilego mionyo* yawo ikhale gutuama dia gufua.
12 Hene, aye dilu nu athu adi guene suangulugenu! Uvi lamba diavula ha mavu nu mu kianga, handaga Diabulu wabulumuga gudi enue, udi nu khabu jiakola, handaga udi mujiya egi wasala nu tangua diazonda.”
13 Tangua Dragona yamonele egi yabishidiwa ha mavu, yasagesele mukhetu munu wabutshile mona wa yala.
14 Uvi ahanele mukhetu muene mahambu mbadi a khuyi hagula wajiya guzuga ha gulenga muya gu fundo dienji mu mavu a luselenga, guene akhalele naye gumudisa mukunda nu tangua dimoshi nu matangua* mbadi nu ndambo gualeha nu nyoga.
15 Nyoga yalushile meya gifua muta mu kano dienji gungima dia mukhetu, hagula mukhetu muene ashiwuge mu muta wene.
16 Uvi mavu ajile mukuatesa mukhetu, akanguile kano aminyile muta walushile dragona mu kano dienji.
17 Hene dragona yavidile mukhetu muene khabu, yayile muluisa an’enji asalele anyi ana tumagela mikhuala ya Nzambi nu adi nu mudimo wa gulongesa lukuma luatadila Yesu.
Mbimbi goshi'a diyiji
^ Mu Greke: “gijiyishilo.”
^ Yakotelesa egi: “nanyi udi gifua Nzambi?”
^ Nga ndo yajiya gukhala egi, “dragona yabelele ita.”
^ Tala Ukoteleshi wa Mbimbi.
^ Yakotelesa egi: “matangua thathu nu ndambo.” Mu Greke: “tangua dimoshi nu matangua.”
